EZRA 10

₁Ezra a ku a ha khongela, a tivula, a ri karhi a rila, a khinsamile emahlweni ka yindlu ya Xikwembu, ku hlengeletana eka yena nhlengeleto leyikulu ngopfu, ya Vaisraele, vavanuna, ni vavasati, ni vana; kambe tiko ri rila hi ku vaviseka lokukulu. ₂Kutani Xekaniya, n'wana Yehiele, wa vana va Elamu, a vulavula, a ku eka Ezra: “Hi dyohele Xikwembu xa hina hi ku teka vasati vambe va matiko lawa; hambiswiritano ku tshemba ka ha ri kona eka Vaisraele, emhakeni yoleyo. ₃Sweswi, a hi endleni ntwanano na Xikwembu xa hina ku tlherisa vasati valavo hinkwavo, ni vana lava velekiweke hi vona, hi laha hosi yanga yi vulaka hakona, ni lava rhurhumerisiwaka hi milawu ya Xikwembu xa hina; kutani a ku endliwe hi milawu. ₄Yima, hikuva mhaka leyi yi na wena, hi ta ku yimela, tiyisa mbilu, u tirha.”

₅Kavaloko Ezra a yima a hlambanyisa tihosana ta vaprista, ni ta Valevhi, ni ta Vaisraele, hinkwavo leswaku va endla hi marito walawo kutani va hlambanya. ₆Ezra a suka emahlweni ka yindlu ya Xikwembu a nghena ekamareni ya Yohanani, n'wana Eliyaxibi, kuteloko a nghenile kona, a nga dyi vuswa, a nga nwi mati, hikuva a a vavisekile hi ku tiarisa ka lava nga tlhela eku bohiweni.

₇Kutani va tivisa hinkwavo lava tlheleke eku bohiweni etikweni ra Yuda na Yerusalema, va ku: ₈“Hlengeletanani eYerusalema, kutani mani na mani la nga tiki hi masiku manharhu hi ku vula ka tihosana ni vakulukumba, swilo hinkwaswo swa yena swi ta dyiwa, yena a humesiwa enhlengeletanweni ya lava tlheleke eku bohiweni.” ₉Kutani vanhu hinkwavo va Yuda, ni va Yerusalema, ni va Benjamini, va hlengeletana eYerusalema hi masiku manharhu; yi nga n'hweti ya ntlhanu na mune, hi siku ra makume mambirhi ra n'hweti. Tiko hinkwaro ri ta tshamisa erivaleni, emahlweni ka yindlu ya Xikwembu, va ri karhi va rhurhumela hikwalaho ka mhaka leyi nga kona, ni hikwalaho ka timpfula. ₁₀Kutani muprista Ezra a yima a ku eka vona: “Mi dyohile hi ku teka vasati vambe, mi engeterile hakona, milandzu ya Israele. ₁₁Sweswi, dzunisani Yehovha Xikwembu xa vatata wa n'wina, mi endla hi ku rhandza ka yena mi tihlawula eka vamatiko ya misava, ni le ka vavasati vambe.” ₁₂Kutani nhlengeletano hinkwayo yi hlamula hi marito lama tlakukeke, va ku: “E, hi fanele ku endla swoleswo hilaha u vulaka hakona. ₁₃Kambe tiko ri kurile, kutani hi nkarhi wa timpfula letikulu, a ku na laha hi nga yimaka kona ehandle, kambe a hi ntirho wa siku rin'we, kumbe wa masiku mambirhi, hikuva hi tele ngopfu, lava hi dyoheke emhakeni yoleyo. ₁₄A ku yime tihosana ta hina ematshan'weni ya nhlengeletano hinkwayo, kutani hinkwavo lava tekeke vasati vambe emitini ya vona, va ta ta hi nkarhi lowu nga ta vekiwa, va ri ni vakulukumba va muti wun'wana ni wun'wana, ni vaavanyisi va vona, mahlundzu ya vukari bya Xikwembu xa hina ma ko ma suka ehenhla ka hina hikwalaho ka mhaka leyi.”

₁₅Kambe Yonatani, n'wana Asahele na Yahaziya, n'wana Tikivha, va ala, va yimeriwa hi Mexulama na Xabetayi, Valevhi. ₁₆Loko va ri lava tlheleke eku bohiweni, vona va endlisa sweswo, va veka muprista Ezra, ni vavanuna van'wana, lava va nga tihosana ta tindlu ta vatata wa vona, va hlawuriwa hi tindlu ta vatata wa vona, hinkwavo va vuriwa hi mavito ya vona, va ta swin'we, hi siku ro sungula ra n'hweti ya vukhume, ku ta lavisisa mhaka yoleyo. ₁₇Hi siku ro sungula ra n'hweti yo rhanga, va hetisa timhaka ta vavanuna lava tekeke vasati vambe.

₁₈Ku kumiwa vana van'wana va vaprista lava tekeke vavasati valavo; eka vana va Yexuwa, n'wana Yosadaka, ni ka vana va vamakwavo, Maaseya, Eliezere, Yaribi, Gedaliya; ₁₉vona va tlakusa mavoko, va tiboha, leswaku va ta tlherisa vasati va vona, hikuva a va ri ni nandzu; va tlhavela milandzu ya vona magandzelo ya khuna lerintshwa. ₂₀Eka vana va Imere, Hanani, na Zebadiya; ₂₁eka vana va Harimi, Maaseya, Eliya, Xemaya, Yehiele, Uziya; ₂₂eka vana va Paxahuru, Eli-Howenayi, Maaseya, Iximaele, Netanele, Yozabadi, Eliyasa.

₂₃Eka vana va Levhi: Yozabadi, Ximeyi, Kelaya (a nga Kelita), Petahiya, Yuda, Eliezere.

₂₄Exikarhi; ka vayimbeleri: Eliyaxibi; eka valanguteri va tinyangwa: Xalumi, na Teleme, na Uri.

₂₅Loko va ri va Israele, eka vana va Paroxi: Ramiya, Yiziya, Malikiya, Miyamini, Eliyazara, Malikiya, Benaya. ₂₆Eka vana va Elamu: Mataniya, Zakariya, Yehiele, Abidi, Yeremoto, Eliya. ₂₇Eka vana va Zatu: Eli-Howenayi, Eliyaxibi, Mataniya, Yeremoto, Zabada, Aziza. ₂₈Eka vana va Bebayi: Yohanani, Hananiya, Zabayi, Atalayi. ₂₉Eka vana va Bani: Mexulama, Maluka, Adaya, Yaxubu, Xeyala, Yeremoto. ₃₀Eka vana va Pahata-Mowabu: Adina, Kelala, Benaya, Maaseya, Mataniya, Besalele, Binuyi, Manase. ₃₁Eka vana va Harimi: Eliezere, Yixiya, Malikiya, Xemaya, Ximeyoni, ₃₂Benjamini, Maluka, Xemariya. ₃₃Eka vana va Haxumu: Matenayi, Matata, Zabada, Elifelete, Yeremayi, Manase, Ximeyi. ₃₄Eka vana va Bani; Maadayi, Amirama, Uwele, ₃₅Benaya, Bedeya, Keluhi, ₃₆Vhaniya, Meremoto, Eliyaxibi, ₃₇Mataniya, Matenayi, Yaasu, ₃₈Bani, Binuyi, Ximeyi, ₃₉Xelemiya, Natani, Adaya, ₄₀Makina-Debayi, Xaxayi, Xarayi, ₄₁Asarele, Xelemiya, Xemariya, ₄₂Xalumi, Amariya, Yosefa. ₄₃Eka vana va Nebo: Yeyiele, Matitiya, Zabada, Zebina, Yadayi, Yuwele, Benaya. ₄₄Valavo hinkwavo, a va tekile vasati vambe, van'wana eka vona a va velekeriwe vana hi vasati valavo.