VAGALATIYA 4

₁Kutani ndzi ri: Loko mudyi wa ndzhaka a ha ri ntsongo, a ku na laha a nga faniki na nandza, hambi a ri yena n'wini wa hinkwaswo; ₂kambe wa ha fumiwa hi valanguteri ni varisi ku ko ku fika nkarhi lowu vekiweke hi tata wa yena.

₃A swi ri tano na hina, loko ha ha ri vana, a hi ri ku fumiweni hi timhaka to rhanga ta misava. ₄Kambe loko mikarhi yi herile, Xikwembu xi rhumile N'wana wa xona, la tswariweke hi wansati, a velekiwa a ri hansi ka nawu, ₅leswaku a kutsula lava nga ehansi ka nawu, ni leswaku hi kuma ku amukeriwa. ₆Kutani leswi mi nga vana, Xikwembu xi rhumile etimbilwini ta n'wina, Moya wa N'wana wa xona, lowu huwelelaka: “Abba,” hileswaku “Tatana!” ₇Hikwalaho u nga ha tshami u ri nandza, kambe u n'wana, kutani loko u ri n'wana, u mudyi wa ndzhaka hi ku rhandza ka Xikwembu.

₈Kambe khale; loko mi nga si tiva Xikwembu, a mi tirhela swikwembu leswi nga riki swona hi xiviri. ₉Kambe sweswi, leswi mi tivaka Xikwembu, ngopfu ndzi nga ku, leswi mi nga tiviwa hi Xikwembu, xana mi tlhelela yini etimhakeni ta khale leti nga riki na matimba, ta vusiwana, leti mi rhandzaka ku tlhela mi tiboha eka tona? ₁₀Mi hlaya masiku, ni tin'hweti, ni mikarhi, ni malembe! ₁₁Ndza tshuka hikwalaho ka n'wina hikuva onge ndzi tirhele swahava eka n'wina.

₁₂Kotisani mina, hikuva na mina ndzi kotisa n'wina, ndza mi khongela, vamakwerhu.

A mi ndzi dyohelanga ha nchumu; ₁₃kambe ma swi tiva leswaku loko ndzi sungule ku mi byela Evhangeli, a ndzi ri ku tsaneni enyameni; ₁₄kutani a mi ndzi solanga, a mi ndzi alelanga hikwalaho ka miringo ya mina leyi nga enyameni ya mina; kambe mi ndzi amukerile kukotisa ntsumi ya Xikwembu, ni kukotisa Yesu Kriste. ₁₅Ku kateka ka n'wina ka mikarhi yoleyo a ku huma kwihi-ke? Hikuva ndzi nga va mbhoni ya leswaku ingi mi tixokole mahlo ku ndzi nyika wona, loko ngi swi nga va swi endleka. ₁₆Xana ndzi hundzukile nala wa n'wina hi ku mi byela ntiyiso xana? ₁₇Valavo va mi chivirikela kambe a va mi chivirikeli swinene kambe va rhandza ku mi tshunxa eka hina, leswaku mi ta chivirikela vona. ₁₈I swinene ku chivirikela swo saseka hi masiku, ku nga ri siku ndzi nga kona eka n'wina ntsena.

₁₉Vana vanga, n'wina lava ndzi mi velekaka eku vavisekeni, Kriste a ko a vumbiwa endzeni ka n'wina! ₂₀Ndzi nga swi rhandza ngopfu loko ndzi va na n'wina sweswi, ndzi ta tiva ku vulavula hi mukhuva wun'wana, hikuva ndzi tikeriwa hikwalaho ka n'wina.

₂₁Ndzi byeleni, n'wina lava rhandzaka ku va ehansi ka nawu, xana a mi yingisi nawu xana? ₂₂Kasi ku tsariwile leswaku: Abrahama a a ri ni vana vambirhi; un'wana a a ri wa nsati la nga fuyiwa, un'wana a a ri wa xitekwa. ₂₃Kambe loyi wa la nga fuyiwa, u velekiwe hi mukhuva wa nyama, kambe lowun'wana, wa la nga fuyiwangiki, u tswariwe hikwalaho ka ku tshembisa. ₂₄Kutani timhaka teto i xifaniso; hikuva i mitwanano mimbirhi; wun'wana i wa ntshava ya Sinayi, lexi velekelaka vukhumbi; lexo i Hagara ₂₅(hikuva Hagara, hi yona Sinayi, ntshava ya Arabiya), u fanisa Yerusalema wa sweswi, la bohiweke ni vana va yena. ₂₆Kambe Yerusalema wa le henhla, a nga bohiwanga, hi yena la nga mana wa hina hinkwerhu. ₂₇Hikuva ku tsariwile va ku: “Titsakele wena mhika loyi u nga velekiki, tlakusa rito u huwelela, wena loyi u nga pfumala mbeleko, hikuva vana va loyi a tshikiweke va ta tlula hi ku tala va loyi a nga ni nuna.” ₂₈Loko hi ri hina vamakwerhu, hi vana va ku tshembisa, ku kotisa Isaka.

₂₉Kutani enkarhini wolowo, kukota loko la velekiweke hi nyama a xanisa loyi a nga tswariwa hi Moya, ni sweswi, swa ha ri tano.

₃₀Kambe Matsalwa ma te yini? “Hlongola mufuyiwa ni n'wanakwe; hikuva n'wana wa la fuyiwaka a nga ka a nga dyi ndzhaka swin'we ni n'wana wa la nga fuyiwiki.” ₃₁Hikwalaho vamakwerhu, a hi vana va mufuyiwa, kambe hi va loyi a nga fuyiwiki.