GENESA 10

₁Vatukulu va vana va Nowa hi volavo: Xeme, na Hamu, na Yafeta; kutani va kume vana va vavanuna endzhaku ka ndhambi.

₂Vana va Yafeta: Gomere, Magogo, Madayi, Yavhani, Tubala, Mexeke na Tirasi. ₃Vana va Gomere: Axikenazi, Rifata na Togarima. ₄Vana va Yavhani: Elixa na Tarxixi, Kipra na Rhoda. ₅Ku hambanyisiwe xikarhi ka volavo swihlale swa matiko hi matiko ya vona, un'wana ni un'wana hi ririmi ra yena, ni tinyimba ta vona, ematikweni ya vona.

₆Vana va Hamu: Kuxi, Egipta, Putu na Kanana. ₇Vana va Kuxi: Seba, Havhila, Sabita, Rhama, Sabiteka. Vana va Rhama: Xeba na Dedani. ₈Kuxi a veleka Nimrodo; hi yena loyi a sunguleke ku va ni matimba emisaveni. ₉A xi ri xihloti xa matimba emahlweni ka Yehovha; hikwalaho-ke va nga te: “Kukotisa Nimrodo, xihloti xa matimba emahlweni ka Yehovha.” ₁₀Masungulo ya ku fuma ka yena a ri Babele na Ereke na Akade na Kaline, etikweni ra Xinara. ₁₁Kuteloko a suke etikweni lero, a ya Asiriya, a aka eNinivha na Rehoboto-Ira na Kala, ₁₂na Resene, exikarhi ka Ninivha, na Kala; hi wona muti lowukulu.

₁₃Mitsrayimi a veleka Valudu, na Vaanamu, na Valehaba, na Vanafetuhi, ₁₄na Vapatroso, na Vakasiluhi, (hi vona ku nga humelela Vafilista eka vona), na Vakafitoro.

₁₅Kanana a veleka Sidoni, lowa mativula, na Heti, ₁₆na Vayebusi na Vaamori na Vagirigaxi, ₁₇na Vahivhi na Vaariki na Vasini, ₁₈na Vaarivhada na Vasemari na Vahamata; endzhaku, tinyimba ta Vakanana ti hangalaka. ₁₉Kutani maavana ya Vakanana ma suka eSidoni ku ya fika eGerara na Gaza, ni hitlhelo ra Sodoma na Gomora, na Adama na Seboyimi, ku fika eLaxa. ₂₀Hi vona vana va Hamu hi tinyimba ta vona ni tindzimi ta vona, emaavaneni ni le matikweni ya vona.

₂₁Ku velekiwe vana ni le ka Xeme, a nga tata wa vana hinkwavo va Ebere, ni makwa wa Yafeta lowa mativula. ₂₂Vana va Xeme: Elamu, Axuru, Aripakixada, Ludu, Aramu. ₂₃Vana va Aramu: Usi, Hulu, Getere na Maxa. ₂₄Aripakixada a veleka Xela, Xela a veleka Ebere. ₂₅Eka Ebere, ku velekiwe vana vambirhi; vito ra un'wana a a ri Pelege, hikuva enkarhini wa yena, misava yi avanyisiwile, vito ra makwavo a a ri Yokotani. ₂₆Yokotani a veleka Alimodada, Xelefi, Hasari-Mavheti, Yera, ₂₇Hadorama, Uzala, Dikila, ₂₈Obala, Abimaele, Xeba, ₂₉Ofira, Havhila na Yobabu; volavo hinkwavo a va ri vana va Yokotani. ₃₀A va akile entshaveni ya Vuxa ku suka eMexa, tlhelo ra Sefara. ₃₁Hi vona vana va Xeme hi tinyimba ta vona, ni tindzimi ta vona, ni maavana ya vona, ni matiko ya vona.

₃₂Hi tona tinyimba ta vana va Nowa, hi tinxaka ta vona, ematikweni ya vona; matiko lama hangalakeke emisaveni endzhaku ka ndhambi, ya humile eka vona.