GENESA 11

₁Misava hinkwayo a yi ri ni ku vulavula kun'we, ni marito man'we. ₂Kuteloko va suke evuxeni, va kuma rivala etikweni ra Xinara, va aka kona. ₃Kutani va byelana, va ku: “A hi yeni hi ya vumba switina hi swi hisa hi ndzilo.” Kutani va va ni switina ematshan'weni ya maribye, ni nhlaka ematshan'weni ya mbompfi. ₄Va engeta va ku: “A hi yeni hi ya tiakela muti ni xihondzo, xihlungwa xa xona xi fika etilweni, hi tiendla vito, hi nga ti tshuka hi hangalasiwa ehenhla ka misava hinkwayo.”

₅Kambe Yehovha a xika ku ta vona muti ni xihondzo xexo vana va vanhu a va ri karhi va xi aka. ₆Kutani Yehovha a ku: “Maswivo, va tiko rin'we, ni ririmi ra vona hinkwavo i rin'we ntsena; kambe leswo i ku sungula ka makungu ya vona, kutani a ku na nchumu lexi nga va sivelaka ku heta hinkwaswo leswi va swi kaneleke. ₇A hi yeni, hi xika, hi hambanyisa kona ku vulavula ka vona, leswaku va nga ha twanani.” ₈Yehovha a va hangalasa emisaveni hinkwayo; kutani va tshika ku aka muti. ₉Hi kwalaho va wu thya vito ra Babele, hikuva hi kona Yehovha a hambanyiseke ku vulavula ka misava hinkwayo; kutani hi kona Yehovha a va hangalaseke ehenhla ka misava hinkwayo.

₁₀Tinxaka ta Xeme, hi leti: Xeme, loko a ri ni dzana ra malembe, a veleka Aripakixada hi lembe ra vumbirhi endzhaku ka ndhambi; ₁₁kuteloko Xeme a velekile Aripakixada, a hanya malembe ya 500, a veleka vana va xinuna ni va xisati.

₁₂Aripakixada, kuteloko a hanyile malembe ya 35, a veleka Xela; ₁₃kuteloko Aripakixada a velekile Xela, a hanya malembe ya 403, a veleka vana va xinuna ni va xisati.

₁₄Xela, loko a ri ni malembe ya makume manharhu, a veleka Ebere, ₁₅kuteloko Xela a velekile Ebere, a hanya malembe ya 403, a veleka vana va xinuna ni va xisati.

₁₆Ebere, loko a ri ni malembe ya 34, a veleka Pelege; ₁₇kuteloko Ebere a velekile Pelege, a hanya malembe ya 430, a veleka vana va xinuna ni va xisati.

₁₈Pelege, loko a ri ni makume manharhu ya malembe, a veleka Rhewu; ₁₉kuteloko Pelege a velekile Rhewu, a hanya malembe ya 209, a veleka vana va xinuna ni va xisati.

₂₀Rhewu, loko a ri ni malembe ya 32, a veleka Serugi; ₂₁kuteloko Rhewu a velekile Serugi, a hanya malembe ya 207, a veleka vana va xinuna ni va xisati.

₂₂Serugi, loko a ri ni malembe ya makume manharhu, a veleka Nahoro; ₂₃kuteloko Serugi a velekile Nahoro, a hanya malembe ya 200, a veleka vana va xinuna ni va xisati.

₂₄Nahoro, loko a ri ni malembe ya 29, a veleka Tera; ₂₅kuteloko Nahoro a velekile Tera, a hanya malembe ya 119, a veleka vana va xinuna ni va xisati.

₂₆Tera a hanya malembe ya 70, kutani a veleka Abrama, na Nahoro, na Harana.

₂₇Tinxaka ta Tera hi leti: Tera a veleka Abrama, na Nahoro, na Harana, kutani Harana a veleka Lota. ₂₈Kambe Harana a fa emahlweni ka Tera tata wa yena, etikweni leri a nga velekiwa eka rona, ku nga Uru wa Kalediya. ₂₉Kutani Abrama na Nahoro va teka vasati; vito ra nsati wa Abrama a a ri Sarayi, vito ra nsati wa Nahoro a a ri Milika, n'wana Harana, tata wa Milika ni wa Yisika. ₃₀Sarayi a a ri mhika, a a nga ri na vana.

₃₁Kutani Tera a teka Abrama, n'wana wa yena, na Lota, n'wana Harana, n'wana wa n'wana wa yena, na Sarayi n'wingi wa yena, nkata Abrama n'wana wakwe, kutani va huma swin'we Uru wa Kalediya, va kongoma tiko ra Kanana. Kuteloko va fike eHarana, va aka kona. ₃₂Masiku ya Tera a ma ri malembe ya 205, kutani Tera a fela kona eHarana.