GENESA 26

₁Ndlala yi va kona etikweni lero; yi nga ri ndlala leyi ngi yi ri kona enkarhini wa Abrahama. Kutani Isaka a ya eka Abimeleke, hosi ya Vafilista, eGerara. ₂Kutani Yehovha a tikombisa eka yena, a ku: “U nga rheleli Egipta; tshama etikweni leri ndzi nga ta ku byela rona. ₃Sala etikweni roleri, kutani ndzi ta va na wena, ndzi ku katekisa, hikuva matiko lawa, ndzi ta ma nyika wena ni vatukulu va wena, ndzi va ndzi tiyisa ku hlambanya loku ndzi nga hlambanyela Abrahama, tata wa wena. ₄Ndzi ta andzisa vatukulu va wena, va ta kota tinyeleti ta tilo; ndzi ta nyika vatukulu va wena matiko lawa hinkwawo; matiko hinkwawo ya misava ma ta titsakela erixakeni ra wena, ₅hikuva Abrahama u yingisile rito ra mina, u hlayisile leswi ndzi n'wi vekeleke swona, ni milawu ya mina, ni ku lerisa ka mina, ni tindlela ta mina.”

₆Kutani Isaka a tshama eGerara. ₇Vanhu va muti lowo, va n'wi vutisisa swa nsati wa yena, kutani a ku: “I makwerhu”; hikuva a a chava ku vula, a ku: “I nsati wa mina, a ku vanhu va muti va nga ti ndzi dlaya hikwalaho ka Rhaveka, hikuva i wansati wa mbhuri.” ₈Kuteloko a tshamile kona khale, Abimeleke, hosi ya Vafilista, a languta hi fasitere a vona Isaka a ri karhi a hleka na Rhaveka, nkatakwe. ₉Kavaloko Abimeleke a vitana Isaka, a ku eka yena: “Hakunene i nsati wa wena; kasi u vurise ku yini u ku: i makwenu?”

Isaka a ku eka yena: “A ndzi vula ndzi ku: ndzi nga ta fa hikwalaho ka yena.”

₁₀Abimeleke a ku: “U hi endlile yini? Kungakuloko ngi un'wana a teke nsati wa wena, i ngi u hi kokele enandzwini.” ₁₁Kavaloko a lerisa tiko hinkwaro, a ku: “Loyi a nga ta khumba wanuna loyi, hambi a ri nsati wa yena, u ta dlawa.”

₁₂Isaka a byala timbewu etikweni leri, kutani hi lembe rolero a tshovela ka dzana; hikuva Yehovha a a n'wi katekisile. ₁₃Munhu yeloyi a kula a fuwa ngopfungopfu, a ko a va munhu wa matimba lamakulu. ₁₄A a fuwe mitlhambi ya swifuwo leswitsongo ni leswikulu, ni malandza lamanyingi; kutani Vafilista va n'wi vondzoka. ₁₅Swihlovo hinkwaswo leswi malandza ya tata wa yena ngi ma swi cerile enkarhini wa Abrahama, tata wa yena, Vafilista a va swi sivile, va swi tata hi misava.

₁₆Kavaloko Abimeleke a byela Isaka, a ku: “Suka eka hina, hikuva u kurile, wa hi tlula ngopfungopfu.” ₁₇Kutani Isaka a suka kona, a ya dzima mitsonga yakwe erivaleni ra Gerara, a tshama kona. ₁₈Kutani Isaka a tlhela a cela swihlovo swa mati leswi ngi swi ceriwile emikarhini ya Abrahama, tata wa yena, swi va swi siviwa loko Abrahama a file, a swi thya hi mavito walawo tata wakwe a nga swi thya wona.

₁₉Malandza ya Isaka ma engeta ma cela erivaleni, ma kuma kona xihlovo xa mati lama pfelelaka. ₂₀Varisi va Gerara va tengisana ni varisi va Isaka, va ku: “Mati, i ya hina!” A thya xihlovo lexi, vito ra Eseke, hikuva a va tengisene na yena.

₂₁Va ko va cela xihlovo xin'wana lexi va engeteke va tengisana hikwalaho ka xona; kutani a xi thya vito ra Sitina. ₂₂Kutani a suka kona a ya cela xihlovo xin'wana, kambe a va tengisananga hikwalaho ka xona, kutani a xi thya vito ra Rehoboto, a ku: “Hikuva Yehovha u hi tshamisisile khwatsi, kutani hi ta tala etikweni.”

₂₃Endzhaku a suka kona, a tlhandlukela eBerexeba. ₂₄Yehovha a tikombisa eka yena hi vusiku byebyo, a ku eka yena: “Hi mina Xikwembu xa Abrahama, tata wa wena, u nga chavi nchumu, hikuva ndzi na wena, ndzi ta ku katekisa, ndzi andzisa vatukulu va wena hikwalaho ka Abrahama, nandza wa mina.” ₂₅Isaka a aka kona gandzelo, a khongela vito ra Yehovha, a dzima kona ntsonga wa yena, kutani malandza ya Isaka ma cela kona xihlovo xa mati.

₂₆Kavaloko Abimeleke a huma eGerara, a ta eka yena a ri na Ahuzata, nakulobye, na Pikolo, ndhuna ya nyimpi ya yena. ₂₇Isaka a ku eka vona: “Mi tele yini eka mina, leswi mi ndzi vengaka, mi va mi ndzi hlongola exikarhi ka n'wina?”

₂₈Va hlamula, va ku: “Hi swi vonisise swinene leswaku Yehovha u na wena, kutani hi ku: ‘A ku ve ku hlambanya exikarhi ka hina, na wena’, hi va hi tiyisa xinakulobye na wena. ₂₉U hlambanya u ku u nga hi endleli swo biha, kukotisa loko hi nga ku khumbanga, hi ku endlele swinene ntsena, hi va hi ku tshika u famba hi ku rhula, kutani sweswi, u katekisiwile hi Yehovha.” ₃₀Isaka a va fihluta, va dya, va nwa. ₃₁Kuteloko ri xa, va hlambanyelana, kutani Isaka a va tshiketa, va tifambela hi ku rhula.

₃₂Hi siku rolero, malandza ya Isaka ma ta n'wi tivisa ta xihlovo leswi va nga ri karhi va xi cela, va ku eka yena: “Hi kume mati.” ₃₃Kutani a xi thya vito ra Xiba. Hikwalaho-ke muti wu vuriwaka Berexeba ku fikela namuntlha.

₃₄Esawu, kuteloko a ri ni malembe ya mune wa makume, a teka vavasati: a a ri Yuditi, n'wana Beri, wa Muhiti, na Basemati, n'wana Elone, wa Muhiti; ₃₅va tshama, va dyisa Isaka na Rhaveka mbitsi.