VAHEVERU 7

₁Hikuva Melkisedeke yeloyi, hosi ya Salema, muprista wa Xikwembu lexi nge henhlahenhla, yeloyi a nga ya hlangana na Abrahama siku a vuyaka eku hluleni ka tihosi, a va a n'wi katekisa, ₂loyi kutani Abrahama a nga n'wi pambulela vukhume bya xuma hinkwaxo, yeloyi loko va hlamusela vito ra yena, va nge Hosi ya ku lulama, va engeta va ku Hosi ya Salema, hileswaku Hosi ya ku rhula, ₃la nga riki na tatana, hambi a ri manana, hambi ri ri rixaka, a nga riki na ku sungula ka masiku, hambi ma ri makumu ya ku hanya ka yena kambe a ri la fanaka ni N'wana wa Xikwembu, a tshama a ri muprista hilaha ku nga heriki.

₄Xiyani hikwalaho vukulukumba lebyi tlurisaka bya loyi mupatriarka Abrahama a nga n'wi pambulela vukhume bya swirhangana. ₅Hikuva lava nga vana va Levhi, lava nyikiweke vuprista, va lerisiwile hi nawu ku teka swa vukhume eka vanhu lava nga vamakwavo, hambi va humile na vona enkaveni wa Abrahama; ₆kambe la nga hlayiwiki erixakeni ra vona u tekile swa vukhume eka xuma xa Abrahama, a va a katekisa loyi a nga ni ku tshembisa. ₇Kasi a ku na ku ariwa loko va ku: Hi lontsongo, loyi a katekisiwaka hi lonkulu. ₈Kutani kwalaho, lava tekaka swa vukhume i vanhu lava faka; kasi kwale, hi la vuriwaka leswaku wa hanya. ₉Kutani, na swona, hi nga ku leswaku, na yena Levhi la tekaka swa vukhume, u swi humesile, na yena, eka Abrahama; ₁₀hikuva a a ha ri enkaveni wa kokwa wa yena, Abrahama, siku Melkisedeke a hlanganaka na yena.

₁₁Loko ngi ku hetiseka a ku ri kona evupristeni bya Levhi (vuprista byolebyo tiko ri tiyisiweke ha byona), xana swi fanela ha yini leswaku ka ha pfukelela muprista un'wana loyi a vuriwaka hi mukhuva wa Melkisedeke, ku nga ri hi mukhuva wa a Aroni xana? ₁₂Hikuva loko ku hundzuka vuprista, nawu, na wona, wu fanele ku hundzuka. ₁₃Hikuva loyi timhaka teto ti vuriwaka ehenhla ka yena, i wa rixaka rimbe leri nga riki na munhu loyi a nga ekusuhi ni alitari. ₁₄Hikuva ku tiviwa leswaku Hosi ya hina yi hume erixakeni ra Yuda, ri nga leri Muxe a nga ri lerisangiki nchumu ehenhla ka magandzelo.

₁₅Kambe swa vonaka ku tlurisisa loko ku tumbuluka muprista un'wana la ringanaka na Melkisedeke, ₁₆loyi a nga vekiwangiki hi nawu lowu lerisiweke hi nyama, kambe hi matimba ya vutomi lebyi nga heriki. ₁₇Hikuva ku endliwile vumbhoni leswaku: “U muprista hilaha ku nga heriki, hi mukhuva wa Melkisedeke.” ₁₈Hikuva nawu wa khale wu herisiwile, hikuva a wu nga ri na matimba, a wu nga pfuni nchumu, ₁₉hikuva nawu a wu hetisangi nchumu; kasi ku nghenile ku tshemba loku wu tlurisaka, loku hi tshinelelaka Xikwembu hakona.

₂₀Kutani, na swona, a ku pfumalekanga ku hlambanya, ₂₁hikuva loko van'wana va vekiwile vaprista ku hlambanya ku nga ri kona, yena u vekiwile hi ku hlambanya, hi la u nga te eka yena: “Hosi yi hlambanyile kutani yi nga ka yi nga tlheri: U muprista hilaha ku nga heriki hi mukhuva wa Melkisedeke.” ₂₂Hi mukhuva lowo, Yesu u vekiwile mulamuri wa ntwanano lowu tlulaka wa khale kwalaho. ₂₃Kutani na swona van'wana va vekiwile vaprista va ri karhi va tele, hikuva a va tsandzeka hi rifu ku tshama; ₂₄kambe yena, leswi a tshamaka hilaha ku nga heriki, u va ni vuprista lebyi nga hundziki. ₂₅Hikwalaho, naswona, a swi kota ku ponisa, hi ku hetisisa lava tshinelelaka Xikwembu ha yena, hikuva u karhi wa hanya hi masiku ku va khongelela.

₂₆Hikuva a hi faneriwa hi muprista lonkulu lowo tano, la hlawuriweke, la nga riki na leswo biha, ni loko xi ri xivati, la tihlawuleke eka vadyohi, a nga ehenhla ka matilo, ₂₇la nga faneriki hi masiku hinkwawo kukotisa vaprista lavakulu, ku rhanga a humesa magandzelo hikwalaho ka vudyoho bya yena, a tlhela a humesa ni ya vudyoho bya tiko, hikuva leswi, u swi endlile kan'we, a ri yena mhamba. ₂₈Hikuva nawu wu veka vaprista vanhu lava nga ni ku tsana, kambe rito ra ku hlambanya leri tlhandlamaka nawu, ri vekile N'wana la hetisekeke hilaha ku nga heriki.