ESAYA 10

₁Khombo eka lava vekaka milawu leyi nga lulamangiki, lava tsalaka mapapila yo homboloka; ₂va alela swisiwana mfanelo ya swona, va dya vapfumari va tiko ra mina, va endla tinoni ku tshumba ka vona, va dya swisiwana. ₃Mi ta endla yini hi siku ra ku kambiwa ni loko ku lova loku humaka ekule ku ta mi wela ehenhla? Mi ta tsutsumela eka mani ku pfuniwa? Mi ta veka kwihi xuma xa n'wina xana? ₄A ku salanga nchumu loko ku nga ri ku tsongahatiwa exikarhi ka lava bohiweke, kumbe ku wa exikarhi ka lava dlayiweke. Hambiswiritano, vukari bya yena a byi tlhelanga, ni voko ra yena ra ha tshambulutiwile.

₅Khombo eka Asiriya, nkhavi wa vukari bya mina! Nkhavi lowu ndzi wu vekaka evokweni ra yena, wu ta ndzi rihisela. ₆Ndza n'wi rhuma ku ya lwa ni tiko lero homboloka, ndzi n'wi lerisa ku ya lwa ni tiko leri ndzi ri kariheleke, a ta tshumba swilo swa rona, a phanga xuma, a ri kandziyela tanihi ndzhope wa mitsendzele. ₇Kambe yena a nga xiyi, mbilu ya yena a yi tsundzuki leswaku swi tano, hikuva a ehleketa ntsena ku onha ni ku lovisa matiko layo tala. ₈Hikuva a ku: “Tindhuna ta mina a hi tihosi hinkwato xana?” ₉A ndzi ku: “Kalino a nga onhiwanga tanihi Karkemixi, na Hamata tanihi Aripadi, na Samariya tanihi Damaska xana? ₁₀Hilaha voko ra mina ri fikeke eku fumeni ka swikwembu, kasi swifaniso swa kona a swi tlula swa Yerusalema, ni swa Samariya, ₁₁xana ndzi nga ka ndzi nga endli Yerusalema, ni swifaniso swa yena, hilaha ndzi endleke Samariya ni swikwembu swa yena xana?”

₁₂Kambe kutakuloko Hosi yi hetile ntirho wa yona hinkwawo entshaveni ya Siyoni na Yerusalema, ndzi ta ba hosi ya Asiriya hikwalaho ka mihandzu ya ku tikurisa ka mbilu ya yona, ni ku tiarisa ka mahlo ya yona lama tlakukeke; ₁₃hikuva u te: “Ndzi endlile sweswo hi matimba ya voko ra mina ni vutlhari bya mina, hikuva ndzi tlharihile! Ndzi tshinetile mindzilekana ya matiko, ndzi titshumbele xuma xa wona; tanihi nhenha, ndzi wisile lava tshameke eswiluvelweni! ₁₄Voko ra mina ri tshumbile xuma xa matiko kukotisa leswi nga exisakeni xa tinyanyana, tanihi leswi ku oleriwaka mandza lama tshikiweke ndzi tihlengeletele misava hinkwayo hi sweswo. A ku na la bubumeleke hi timpiko, ni la ahlamiseke nomu, ni la rileke.” ₁₅Xana xihloka xi nga tidzunisa eka la tsemaka ha xona, ni saha yi nga tikurisa eka la sahaka ha yona xana? Kukotisa leswo nge nkhavi wu nga tsekatsekisa voko ra loyi a wu yimiseke, ni loko nhonga yi nga tlakusa loyi a nga riki murhi!

₁₆Hikwalaho Hosi ya tinyimpi yi ta ondzisa swihontlovila swa Asiriya, kutani ehansi ka ku vangama ka yena ku ta pfukeka ku pfurha kukotisa ku pfurha ka ndzilo. ₁₇Ku vonakala ka Israele ku ta hundzuka ndzilo, ni Mukwetsimi wa yena ri ta va langavi leri hisaka, ri va ri heta mitwa ni swigatlu swa yena hi siku rin'we. ₁₈U ta herisa sweswo ku vangama ka xihlahla xa yena ni xa masimu ya yena ku hela moya ni miri, swi va tanihi munhu loko a vabya hi mfambo. ₁₉Mirhi ya xihlahla xa yena leyi nga ta sala yi ta va leyi nga hlayiwaka, n'wana u ta tiva ku tsala ntsengo wa yona.

₂₀Enkarhini wolowo, masalela ya Israele ni lava poneke va yindlu ya Yakobo va nga ka va nga ha tshami va tshemba mubi wa vona, kambe va ta tshemba kunene Yehovha, Mukwetsimi wa Israele. ₂₁Masalela ya Yakobo ma ta hundzukela eka Xikwembu xa matimba. ₂₂Hikuva, hambi tiko ra wena, oho Israele, ri nga ringana ni sava ra lwandle, ma ta va masalela ya rona ntsena lama nga ta vuya; ku lovisa ku kaneriwile, ku ta andzisa ku lulama. ₂₃Hikuva Hosi, Yehovha wa tinyimpi, u ta hetisa etikweni hinkwaro ku onha loku a ku kaneleke. ₂₄Hikwalaho, Hosi, Yehovha wa tinyimpi, u te: “Wena tiko ranga la akeke eSiyoni, u nga chavi Asiriya, hambi a ku ba hi nkhavi, ni loko a tlakusa nhonga ehenhla ka wena, tanihi leswi ku endliweke khale hi Vaegipta. ₂₅Hikuva ku nga ha ri kungani, ku kariha ka mina ku ta hundza, ni vukari bya mina byi ta hambuka eka vona, byi va lovisa. ₂₆Yehovha wa tinyimpi u ta tlakusa nkharisa ehenhla ka Asiriya, tanihi leswi a nga endla Midiyani, eribyeni ra Orebe; u ta tlakusa nhonga ehenhla ka lwandle tanihi leswi a swi endleke eEgipta khale!

₂₇“Enguveni yoleyo ndzhwalo wa Asiriya wu ta susiwa ekhatleni ra wena, ni joko ra yena enhan'wini ya wena, kutani joko ri ta tshoveka hi ku nyuhela ka wena.” ₂₈U tile eAyata, a hundzela eMigirono, a siya xuma xa yena eMikamaxa. ₂₉Tinyimpi ta yena ti hundzile exiphandzeni, nivusiku va gova eGeba; Rhama wa tshuka Gibeya wa Sawulo wa baleka. ₃₀Kolola, wena, n'wana wa Galimi! Tivone, wena Layixi! Anatoto u ni khombo! ₃₁Madimena wa hangalaka, lava akeke eGebimi va nyenga. ₃₂Hi siku rin'we u ta fika eNobo, u ta tlakusa voko ra yena eka ntshava ya n'wana wa Siyoni, ni ka xitsunga xa Yerusalema!

₃₃Langutani, Hosi, Yehovha wa tinyimpi, u ta tshova hi matimba lamakulu swicapila swa mirhi; leyi leheke yi ta tsemiwa, kutani leyi tlakukeke ku tlurisa yi ta wisiwa ehansi. ₃₄Wa tsema hi nsimbhi swihlahla leswi tlhumeke, Lebanoni u ta wisiwa hi Lowa matimba!