Ta ku avanyisiwa ka Babilona.
1Ku avanyisiwa ka Babele loku kombisiweke Esaya, n'wana Amotsi.
2Entshaveni ya ripala tlakusani mujeko, tlakusani rito, mi va koweta hi voko, va ta nghena hi tinyangwa ta tihosi ta tihanyi! 3Ndzi lerisile vahlawuriwa va mina, eku tirihiseleni ka mina ndzi vitanile tinhenha ta mina leti tsakelaka vukulukumba bya mina.
4Mpfumawulo wu twakala etintshaveni, wu nga wa tiko lerikulu; mpfumawulo ni pongo ra ku fuma ni matiko lama hlengeletaneke kun'we: i Yehovha wa tinyimpi la kambaka mavandla ya tinyimpi ta yena leti yaka eku lweni. 5Va huma ekule, emakun'wini ya matilo i Yehovha ni matlhari ya vukari bya yena la teke ku ta onha tiko hinkwaro. 6Vovolani, hikuva siku ra Yehovha ri kusuki: ri ta tanihi ku onha loku rhumiweke hi Lowa matimba hinkwawo. 7Hikwalaho mavoko hinkwawo ma we nkorha, ku herile timbilu hinkwato ta vavanuna. 8Va tlhakamile, gome ni mapfalo swi va khomile; va hlalavandzeka tanihi wansati la velekaka, va langutana va huwelela; mimombo ya vona yi tshwukile tanihi ndzilo.
9Vonani, siku ra Yehovha ra ta, ra nonon'hwa, ri tele ku kariha loku pfurhaka. Ri ta endla tiko emananga ri lovisa vabihi lava nga eka rona. 10Hikuva tinyeleti ta tilo, Gongomela na Mahlahle, a ti nga ha voningi; dyambu rona ri ta endla ntima loko ri tsuvuka, na wona n'weti wu nga ka wu nga voningi. 11Ndzi ta ba misava hikwalaho ka ku biha ka yona, ni swidyohi hikwalaho ka ku dyoha ka swona; ndzi ta herisa vukulu bya vatiarisi, ndzi tsongahata lava tikurisaka. 12Ndzi ta endla leswaku vavanuna va ta kala ku tlurisa nsuku lowo saseka, va pfumaleka ku tlurisa nsuku wa Ofiri.
13Hikwalaho ndzi ta tsekatsekisa matilo, kutani misava yi ta susumetiwa ematshan'weni ya yona hi ku kariha ka Yehovha wa tinyimpi, siku ra vukari bya yena lebyi pfurhaka. 14Va ta va tanihi mhala leyi hlongorisiwaka, tanihi nyimpfu leyi pfumalaka muhlayisi. Un'wana ni un'wana u ta kongoma ekarikwavo, a tsutsuma etikweni ra yena. 15Un'wana ni un'wana la kumiwaka u ta tlhaviwa hi tlhari, kambe un'wana ni un'wana la nga ta khomiwa u ta dlawa hi ripanga. 16Swihlangi swa vona swi ta phyandlasiwa emahlweni ka vona, tindlu ta vona ti ta phangiwa, vavasati va vona va ta sindzisiwa va onhiwa.
17Vonani, ndzi ta va kucetela Vameda, lava nga vuriki nchumu hi silivhere, lava nga rhandziki nsuku. 18Miseve ya vona yi ta tlhava majaha, va nga ka va nga tsetseleri swihlangi leswi nga endzeni, mahlo ya vona ma nga ka ma nga tweri vana va xinuna vusiwana. 19Kutani Babilona la nga ni vukosi lebyi dzunisiwaka bya matiko, muti lowu Vakalediya va tidzunisaka hi ku bombisiwa ka wona, wu ta va tanihi Sodoma na Gomora siku miti leyi yi onhiwaka hi Xikwembu. 20A nga ka a nga ha pfuxiwi ni siku ni rin'we, vanhu va nga ka va nga aki kona ku yisa etinxakeni ta tinxaka. Muarabu a nga ka a nga dzimi mitsonga ya yena kona, ni varisi va nga ka va nga aki matshanga kona. 21Kambe ku ta hundzuka matshanga ya swiharhi swa nhova. Tindlu ta kona ti ta tala makhuhunhu; tiyimbhu ti ta tshama kona, ni swiphongo swi ta tlulatlulela kona. 22Timhungubye ti ta rila etindlwini ta kona ta vuhosi, ni mahlolwa ma ta rila etindlwini ta kona ta mitsako. Nkarhi wa yena wu kusuhi, masiku ya yena ma nga ka ma nga andzisiwi.
