ESAYA 15

₁Hi vusiku lebyi Ara-Mowabu a weriweke hi byona, swi herile! Hi vusiku lebyi Kiri-Mowabu a weriweke hi byona u herile! ₂Va tlhandlukela etempeleni, ni le Diboni, ni le switsungeni leswi tlakukeke va ya rila kona. Mowabu wa rila ehenhla ka Nebo na Medeba: nhloko yin'wana ni yin'wana yi byewuriwile, ni malebvu hinkwawo ma byewuriwile. ₃Emintsendzeleni va tifunengeta hi maxaka; ehenhla ka tindlu ni le tihubyeni, hinkwavo va vovola, va rila hi xivitwana. ₄Hexiboni na Eleyale va ba pongo; marito ya vona ma twakala ku yisa eYahasi; hikwalaho tinhenha ta Mowabu ta rila, mimoya ya tona yi ni mahika. ₅Mbilu ya mina yi rilela Mowabu; vabaleki va yena va fika eSowara ni le Egilata-Xelixiya; hikuva va tlhandlukela va ri karhi va rila entsungeni wa Luhiti; endleleni ya Horonayimi va ba mikosi. ₆Hikuva mati ya Nimri ma phyile, hikuva nhova yi tshwile, byanyi bya rilambyana a bya ha ri kona, a ka ha ri na rihunga. ₇Hikwalaho leswi seleke, ni timbuva ta vona, va swi yisa entsungeni wa nambu wa nsekeseke. ₈Hikuva nkosi wa vona wu rhendzele tiko ra Mowabu, ku vovola ka vona ku twakala ku fika eEgilayimi, tihuwa ta vona ti fika eBere-Elimi. ₉Hikuva mati ya Dimoni ma tele ngati; kutani ndzi ta ba Dimoni hi khombo leri tlurisaka: ingi nghala ku herisa vaponi va Mowabu, ni lava seleke etikweni.