ESAYA 26

₁Hi siku lero, risimu leri, ri ta yimbeleriwa etikweni ra Yuda!

₂Hi ni muti wa xichavelo! U ta nghenisa eka wona ku hlayiseka ri va rirhangu ra le ndzhaku ni ra le mahlweni. Pfulani tinyangwa; a ku nghene tiko lero lulama leri hlayisaka ku tshembeka! ₃Eka lowa mbilu leyi tiyeke wa n'wi nyika ku rhula, ku rhula hikuva u tshembile wena. ₄Tshembani Yehovha hi mikarhi ni mikarhi, hikuva Yehovha, Yehovha i ribye ra malembe ya madzana dzana. ₅Hikuva u tsongahatile lava akeke etindhawini leti nga ehenhla; u wu tsongahata ku fika ehansi, muti lowu tlakukeke, ₆u wu khumbisa ntshuri; wu kandziyeriwa hi milenge, hi milenge ya swisiwana ni mikondzo ya vapfumari!

₇Ndlela ya la lulameke yi latekile; u khula swinenenene ndlela ya lulameke. ₈Oho Yehovha! Hi ku languterile hakona endleleni ya ku avanyisa ka wena; hi navela vito ra wena, ni ku anakanya ka wena hi mimoya hinkwayo ya hina. ₉Moya wa mina wu ku naverile nivusiku, ni mbilu ya mina ya ku lava exikarhi ka mina, hikuva loko u ba misava hi ku yi avanyisa, vanhu va misava va dyondza ku lulama. ₁₀Loko mudyohi o rivaleriwa, a nga dyondzi swo lulama etikweni lero lulama, u ta endla swo biha, a nga ka a nga hlayi vukulukumba bya Yehovha.

₁₁Yehovha, voko ra wena ri ni matimba, kambe a va ri voni. Va ta vona ku hiseka ka wena loku u hisekelaka tiko ra wena hakona, kutani va ta va ni tingana. Ndzilo wu ta hisa lava nga valala eka wena. ₁₂Yehovha, hi wena la hi haka ku rhula, hikuva hi wena la tirhaka mitirho ya hina hinkwayo. ₁₃Yehovha, Hosi ya hina, tihosi tin'wanyana ti hi fumile ematshan'weni ya wena; ha wena ntsena hi ta twakarisa vito ra wena. ₁₄Ti file, a ti nga ha hanyi; i mindzhuti ntsena, a ti nga ha pfuki. Hikuva u va endzerile, u va lovisile, u herisile ni ku anakanyiwa ka vona.

₁₅Oho Yehovha! U kurisile tiko; u ri andzisile; u tidzunisile, u tshinetile ekule mindzilekana hinkwayo ya tiko. ₁₆Yehovha, va langutile eka wena emaxangwini ya vona. Loko u va ba, a va rilela eka wena. ₁₇Tanihi wansati la tikeke loko a ri eku velekeni, a solovanya, a ba huwa eku vavisekeni ka yena, na hina a hi rhurhumerisa sweswo emahlweni ka wena, oho Yehovha! ₁₈A hi tikile, kutani hi lumiwa; kambe mbeleko wa hina wu moya ntsena. Ku hlayiseka ka tiko a ku humi eka hina, kutani ku nga ka ku nga tswariwi vaaki va misava. ₁₉Vafi va wena a va tlhele va hanya! Mitsumbu ya mina a yi pfuke! Pfukani n'wina, tsakisisani, n'wina lava etleleke entshurini! Hikuva mberha ya wena i mberha ya vurhonga, kutani misava yi ta tlhela yi veleka lava feke!

₂₀Yana, tiko ra mina, u nghena emakamareni ya wena, u pfala nyangwa endzhaku ka wena; tumbela nkarhinyana, vukari bya yena byi ko byi hundza. ₂₁Hikuva vonani, Yehovha u huma evuakweni bya yena ku ta endzela ku dyoha ka vaaki va misava, kutani misava yi ta yimbula ngati leyi yi fundziweke hi yona, a yi nga ha fihli vadlayiwa va yona.