1Hikuva maswivo, Hosi, Yehovha wa mavandla u ta tekela Yerusalema, na Yuda xiseketelo hinkwaxo ni rixongotelo hinkwaro, swi ri swakudya hinkwaswo ni swakunwa hinkwaxo, 2hambi yi ri nhenha ni mulwi wa nyimpi, muavanyisi ni muprofeta, 3mungoma ni nkulukumba, tihosi ni tindhuna, mutsundzuxi ni mutirhi wa malwandla, ni mubvumbi la tlhariheke. 4Ndzi ta va nyika majaha ti va tihosi ta vona, ni swihlangi swi ta va fuma. 5Kutani vanhu va ta welana ehenhla, un'wana ni un'wana u ta dya warikwavo; jaha ri ta pfukela matimba munhu la dyuhaleke ni la solekaka a pfukela la dzunisiwaka. 6Kutakuloko munhu a ta khoma makwavo endlwini ya tata wa yena, a ku eka yena: U ni nguvu, u va hosi ya hina; rhumbi leri ri ta hlayisiwa hi wena! 7Siku rero u ta hlamula, a ku: “A ndzi swi rhandzi ku va n'anga; a ndzi na vuswa endlwini ya mina, hambi yi ri nguvu; mi nga ka mi nga ndzi veki hosi ya tiko!”
8Hikuva Yerusalema wa tsekatseka, Yuda wa dedeleka, hikuva marito ya vona ni mitirho ya vona swi lwa na Yehovha, ku karihisa mahlo ya yena lama kwetsimaka. 9Nghohe ya mimombo ya vona ya va avanyisa, va twarisile swidyoho swa vona tanihi Sodoma, kutani a va vuyangi va fihla, ku ni khombo eka mimoya ya vona hikuva hi vona lava tilaveleke ku lova ka vona. 10Vulani leswaku lava lulameke va katekile, hikuva va ta dya mihandzu ya mitirho ya vona. 11U ni khombo mudyohi, u ni khombo, hikuva u ta nyikiwa hakelo ya mitirho ya mavoko ya yena.
12Tiko ra mina ri xanisiwa hi swihlangi, ni vavasati va ri fuma. Tiko ra mina, vafambisi va wena va ku hambukisa ndlela, va onha ndlela leyi u fambaka eka yona. 13Yehovha u pfukele ku tenga, u yimele ku avanyisa matiko. 14Yehovha wa sungula ku avanyisa vakulukumba va tiko ra yena ni tihosi ta rona, a ku: “Mi dyile nsimu ya vhinya, kasi leswi phangiweke eka swisiwana swi kona etindlwini ta n'wina! 15Mi xanisa tiko ra mina hi matimba wahi, ni ku phyandlasa lava nga ekhombyeni xana?” ku vula Hosi, Yehovha wa tinyimpi.
16Yehovha u vurile, a ku: “Leswi vanhwana va Siyoni va tikuriseke va famba hi tinhamu leto sihalala va tikurisa hi mahlo, va famba hi ku komisa mikondzo, va chakayila hi masindza ya milenge ya vona, 17Hosi yi ta byewula tinhloko ta vanhwana va Siyoni ti endla mpandhla, Yehovha u ta funungula tingana ta vona.” 18Hi siku lero, Hosi yi ta susa masindza lawa va tibombisaka ha wona, ni misirhelelo ya misisi, ni swibombiso swa nkolo; 19ni swingwavila swa tindleve, ni vusenga, ni swisirhelo swa mombo, 20ni masingasoro, ni swiketanyana swa masindza ya milenge, ni madeveci; 21ni swigadzana swa mirhi ya risuna, ni switshungulu, ni swingwavila swa tintiho ni swa tinhompfu; 22ni tinguvu ta mikhuvo ni mabaji, ni majasi ni swikhwama; 23ni swivonivoni, ni tinguvu leto vonikela, ni maduku, ni mixikitelo. 24Ematshan'weni ya leswo nun'hwela, ku ta va ku bola; ni le matshan'weni ya deveci, ku ta va pindza; ematshan'weni ya misisi leyi horhiweke, ku ta va mimpandhla; ematshan'weni ya tinguvu leto kokakoka, ku ta va saka lero khwaxa; ematshan'weni ya vumbhurhi, ku ta va xisandzu lexi funghiweke hi ndzilo. 25Vavanuna va wena va ta dlawa hi fumu, ni tinhenha ta wena ti ta helela enyimpini. 26Tinyangwa ta Siyoni ti ta konya ti vovola, kutani u ta tshamisa ehansi a rila.
