ESAYA 44

₁“Yingisa sweswi, wena Yakobo, nandza wa mina, na wena Israele loyi ndzi ku hlawuleke, ₂ku vula Yehovha la ku endleke, la ku vumbeke ekhwirini ra mana wa wena, mupfuni wa wena: U nga chavi nchumu, nandza wa mina, Yakobo, Yexuruni wa mina, loyi ndzi n'wi hlawuleke. ₃Hikuva ndzi ta chela mati emisaveni leyi nga ni torha, ni swinambyana emisaveni leyi omeke: ndzi ta chela moya wa mina erixakeni ra wena, ni ku kateka ka mina ehenhla ka hluke ra wena. ₄Ri ta mila eswinambyaneni tanihi nsekeseke ematini lama khulukaka. ₅Loyi u ta ku: ‘Mina ndzi wa Yehovha!’ Un'wana u ta tithya hi vito ra Yakobo un'wanyana kambe u ta fungha evokweni ra yena hi mfungho wa Yehovha, kutani u ta tlangela vito ra Israele.

₆“Ku vula sweswo Yehovha, Hosi ya Israele, ni mukutsuri wa yena, Yehovha wa tinyimpi: Hi mina lowo rhanga ni lowa makumu, ehandle ka mina a ku na xikwembu. ₇I mani la vuleke tanihi mina, mpfhuka ndzi sunguleke tiko leri nga heriki, a a vule a ndzi kombisa; a va ringete switsanana ku bvumbha leswi nga ta humelela. ₈Mi nga chaveni, mi nga rhurhumeli! Xana a ndzi ku byelanga, a ndzi ku tivisanga ni khale? A hi n'wina timbhoni ta mina xana? Xana ku ni xikwembu ehandle ka mina? A ku na rin'wana ribye lerikulukumba, a ndzi ri tivi.”

₉Vaendli va swifaniso i va hava hinkwavo, ni mitirho ya vona leyo saseka ku tlurisa a yi pfuni nchumu. Kutani swifaniso swi vurisa swi ri swona a swi voni, a swi anakanyi, hileswaku vaendli va swona va va ni tingana. ₁₀La vumbeke xikwembu, la n'okiseke xifaniso leswaku xi nga pfuni nchumu, i mani?

₁₁Maswivo, lava swi tirhaka va ta va ni tingana, ni vatirhi va vona i vanhu ntsena. A va hlengeletane hinkwavo, a va humelele! Hinkwavo va ta chava swin'we va khomiwa hi tingana.

₁₂Mufuri u tirha nhumbu hi ntupo, a yi nghenisa endzilweni, a yi bela hi nyundzu, kutani a yi tirha hi matimba hinkwawo ya voko ra yena; hambiswiritano, u twa ndlala, ni ku tsana; loko a nga nwi mati, wa karhala. ₁₃Muvatli u pima hi mpimo, u tsala xifaniso hi pitloti, a xi vatla hi nsendzo, a xi pima hi kompasi; kutani a endla xifaniso lexi fanaka ni munhu, munhu lowo saseka, ku xi rhurhela endlwini.

₁₄Munhu u ya tsema tikedari; u teka mihlampfuta ni mikwenga, u hlawula exikarhi ka mirhi ya swihlahla; u simeka mirhi yo saseka, kutani mpfula yi yi mirisa. ₁₅Kutani munhu u endla tihunyi hi mirhi yeleyo; a ti teka, kutani a orha ndzilo wa tona. Wa tshivela ndzilo wa ku sweka vuswa bya yena; ha yona u endla ni xikwembu lexi a xi gandzelaka; ha yona u endla xifaniso, lexi a xi khinsamelaka. ₁₆Wa pambula tihunyi ta yena hi le xikarhi, a ti tshivela, kutani a sweka nyama hi tona; u kantinga nyama a xurha; na swona u orha, a ku: “Ha, kunene, ndza orha, ndzi vone ndzilo!” ₁₇Kutani hi lexi nga sala, u tivatlela xifaniso xa xikwembu xa yena, a korhama emahlweni ka xona, a xi gandzela, a xi khongela, a ku: “Ndzi ponise! Hikuva u xikwembu xa mina!”

₁₈A va tivi nchumu, a va na ku twa, hikuva mahlo ya vona ma siveriwe hileswaku va nga voni nchumu, ni timbilu, leswaku ti nga twi nchumu. ₁₉A ku na la tianakanyaka, a ku na la nga ni ku tiva, ni vutlhari, a tivula, a ku: “Ndzi pamburile ndzi tshivela hafu ya tona, ndzi oxa ha tona xinkwa emakaleni, ndzi kantinga nyama, ndzi va ndzi yi dya kutani hi leti seleke ndzi ta endla xilo lexi yilaka, ndzi ta khinsamela nsinya wa murhi!” ₂₀A tixurhisa hi nkuma, mbilu ya yena leyi xisiweke yi n'wi kanganyisa. A nga ka a nga tshunxi moya wa yena, a ku: “Lexi ndzi xi khomeke evokweni ra mina, a hi vunwa xana?”

₂₁“Anakanya timhaka leti, wena Yakobo, na wena Israele! Hikuva u nandza wa mina, ndzi ku vumbile, u nandza wa mina, wena Israele, a ndzi nga ku rivali. ₂₂Ndzi hlangurile milandzu ya wena tanihi papa, ni swidyoho swa wena tanihi hunguva; vuyela eka mina, hikuva ndzi ku kutsurile!” ₂₃N'wina matiko, huwelelani hi ku tsaka hikuva Yehovha u tirhile! Swivandla swa misava leswi enteke, huwelelani! N'wina tintshava ni swihlahla, swin'we ni mirhi hinkwayo ya n'wina, banani mikulungwana, hikuva Yehovha u kutsurile Yakobo, wa tidzunisa eka Israele!

₂₄U vula sweswo Yehovha, Mukutsuri wa wena, la ku vumbeke ekhwirini ra mana wa wena: “Hi mina Yehovha la endleke swilo hinkwaswo, la andlaleke matilo ni misava, ndzi ri ndzexe. ₂₅Ndzi endle ku bvumbha ka vangoma xilo xa hava, ndzi hlanyisa va bvumbhi, ndzi tlherisele ndzhaku tintlhari, ndzi hundzula vutlhari bya tona vuphukuphuku. ₂₆Kambe ndzi tiyisa rito ra nandza wa mina, ndzi hetisa makungu ya tintsumi ta mina; ndzi vula ehenhla ka Yerusalema, ndzi ku: ‘Vanhu va ta hanya kona,’ ni le henhla ka miti ya Yuda: ‘Yi ta akiwa kambe kutani ndzi ta pfuxa marhumbi ya yona.’ ₂₇Ndzi ku eka xiwa: ‘U ta phya, ndzi ta phyisa milambu ya wena.’ ₂₈Ndzi byela ta Korexe, ndzi ku: ‘I murisi wa mina, u ta endla ku rhandza ka mina hinkwako; u ta ku eka Yerusalema: “U ta tlhela u akiwa!” Eka tempele, u ta ku: “A ku akeriwe masungulo!” ’ ”