YAKOBO 2

₁Vamakwerhu, ku pfumela loku mi nga na kona eka Hosi ya hina Yesu Kriste, Hosi ya ku kwetsima, ku nga tshuki ku va ni ku hlawula vanhu hi nghohe ya vona; ₂hikuva kungakuloko ku nghena enhlengeletanweni ya n'wina wanuna la nga ni xingwavila xa nsuku, a ambele tinguvu to saseka; ku nghena ni xisiwana lexi ambaleke tinguvu to biha; ₃loko kutani mi languta eka la ambaleke tinguvu to saseka, mi ku eka yena: “Wena, tshama la eku sasekeni,” kutani mi ku eka xisiwana: “Wena, yima lahaya,” kumbe “tshama la ehansi, evunavelweni bya milenge ya mina,” ₄a mi hlawulanga etimbilwini ta n'wina xana, mi va vaavanyisi va ku anakanya loko biha?

₅Yingisani, vamakwerhu lava rhandziwaka: Xana Xikwembu a xi hlawulanga swisiwana swa misava leyi, leswaku va va vafuwi eku pfumeleni, ni vadyandzhaka va ku fuma loku Xikwembu xi ku tshembiseke lava xi rhandzaka xana? ₆Kasi n'wina mi sola xisiwana! Xana a hi vafuwi lava mi xanisaka; kutani a hi vona lava mi kokelaka etihubyeni xana? ₇Xana a hi vona lava sandzaka vito lero saseka, leri mi nyikiweke rona! ₈Hambiswiritano, loko mi heta nawu lowu nga hosi exikarhi ka milawu, hilaha ku tsariweke hakona leswaku: “Rhandza warikwenu kukota loko u tirhandza,” mi endla swinene; ₉kambe loko mi ya hi nghohe ya vanhu, ma dyoha, mi ri karhi mi tshinyiwa hi nawu hi leswi mi nga vatluri va wona.

₁₀Hikuva mani na mani la nga ta hlayisa milawu hinkwayo, kambe a khunguvanyeka eka wun'we, u ta va ni nandzu wa hinkwayo. ₁₁Hikuva la nga te: “U nga tshuki u oswa,” u vurile na swona, u te: “U nga tshuki u dlaya,” loko kutani u nga oswi, kambe u dlaya, u mutluri wa milawu. ₁₂Vulavulani, mi endla hi mukhuva lowu fanelaka lava nga ta avanyisiwa hi nawu wa ku tshunxeka. ₁₃Hikuva ku avanyisa ku nga ka ku nga vi na tintswalo eka loyi a nga endlangiki hi tintswalo; kambe tintswalo ti tidzunisa henhla ka ku avanyisa.

₁₄Vamakwerhu, swi pfuna yini loko munhu a ku: “Ndzi ni ku pfumela,” a nga ri na mitirho; xana ku pfumela ka yena ku nga n'wi hlayisa xana? ₁₅Loko makwenu wa wanuna, kumbe wa wansati va swerile va pfumala ni swakudya swa siku rin'wana ni rin'wana, kutani un'wana eka n'wina a ku eka vona: ₁₆“Fambani hi ku tsaka, mi kufumela, mi xurha,” kasi a mi va nyikanga leswi laviwaka hi miri wa vona, swi pfuna yini xana? ₁₇Hi mukhuva wolowo, na kona ku pfumela loku nga riki na mitirho ku tiferile.

₁₈Kambe un'wana a nga ku: “U ni ku pfumela, kasi mina ndzi ni mitirho”; ndzi kombe ku pfumela ka wena loku nga riki na mitirho, kutani mina ndzi ta ku komba ku pfumela ka mina hi mitirho ya mina. ₁₉U pfumela leswaku Xikwembu xi kona xi ri xin'we, u, endla swona; na wona mademona ma pfumela sweswo, kambe ma rhurhumela.

₂₀Munhu wa swahava, xana u rhandza ku tiva leswaku ku pfumela loku nga riki na mitirho, a ku pfuni nchumu xana? ₂₁Xana Abrahama, tata wa hina, a nga hlayiwanga la lulameke hi mitirho, siku a nyiketeke n'wana wa yena, Isaka, egandzelweni xana? ₂₂Wa swi vona leswaku ku pfumela ka yena a ku tirhisana ni mitirho ya yena, kutani ku pfumela ka yena ku hetisekile hi mitirho. ₂₃Kutani ku endlakele Tsalwa leri nge: “Abrahama u pfumerile eka Xikwembu, kutani ku pfumela ka yena ku n'wi hundzukele ku lulama,” ku va kona a thyiwaka nakulobye wa Xikwembu. ₂₄Ma swi vona-ke leswaku munhu u hlayiwa la lulameke hi mitirho ya yena, ku nga ri hi ku pfumela ntsena. ₂₅Hi mukhuva wolowo, na yena Rahava, nsati wa vuoswi, a nga vekiwanga la lulameke hi mitirho xana, enkarhini lowo a amukeleke vakamberi, kutani a va tlherisa hi ndlela yin'wana xana? ₂₆Hikuva kukota loko miri lowu nga riki na moya wu file, hi mukhuva wolowo, na kona ku pfumela loku nga riki na mitirho, ku file.