Ta mbita ya muvumbi; ta ku tiarisa ka tiko.
1Hi rona rito leri teke eka Yeremiya ri huma eka Yehovha, ri ku: 2“Suka u ngirimela endlwini ya muvumbi, ndzi ta ku tivisa kona marito ya mina.” 3Kutani ndzi ngirimela endlwini ya muvumbi, kambe ndzi n'wi kuma a tirha hi masondzo. 4Kambe mbita leyi ingi a endla yona yi onhaka hilaha swi humelelaka hakona eka vumba emavokweni ya muvumbi: kambe a engeta a endla mbita leyintshwa hilaha muvumbi a swi rhandzeke ku endla hakona. 5Kutani rito ra Yehovha ri ta eka mina, ri ku: 6“A ndzi ku, na mina ndzi nga endla ha n'wina, yindlu ya Israele, hilaha muvumbi yeloyi a endleke hakona, ku vula Yehovha? Vonani, kukotisa loko vumba byi ri emavokweni ya muvumbi, na n'wina, yindlu ya Israele, mi tano evokweni ra mina. 7Kakuloko ndzi byela tiko, kumbe ku fuma, leswaku ndzi ta ri yimbula, ndzi ri kandziyela, ndzi ri heta; 8loko tiko leri ndzi ri tshinyeke ri hundzuka eku biheni ka rona, na mina ndzi tlhela eku kariheni kuloku ingi ndzi anakanyile ku va endlela hakona. 9Kambe kungakuloko ndzi byele tiko kumbe vuhosi, leswaku ndzi ta va akisa, ndzi va ndzi va simeka. 10Loko va endla leswo biha emahlweni ka mina, va ala ku yingisa rito ra mina, na mina, ndzi ta tlhela etintswalweni leti ngi ndzi va byerile leswaku ndzi ta va endlela tona.
11“Kutani sweswi, byela vavanuna va Yuda ni vaaki va Yerusalema, u ku: ‘Yehovha u ri: “Vonani, ndzi mi lunghiserile khombo, kambe ndzi mi endlele makungu layo biha; hundzukani un'wana ni un'wana emikhuveni ya yena leyo biha, kutani mi sasekisa ku famba ka n'wina ni ku endla ka n'wina.” ’ 12Kambe va ku: ‘A swi pfuni! Hi ta famba hi ku tirhandzela ka hina, leswaku un'wana ni un'wana a endla hi ku nonon'hwa ka mbilu ya yena leyo biha.’
13“Loko swi ri tano, Yehovha u ri: ‘Vutisisani sweswi matiko, mi ku: “Xana un'wana a nga va kona la tshamaka a yingisa lexo tano-ke? Kambe nhwanyana wa Israele u endlile mhaka leyi chavisaka ngopfu. 14Xana gamboko ra Lebanoni ri nga tshika ribye ra nhova xana? Xana mati lama khulukaka lama sasekeke, lama humaka ekule, ma nga phya xana? 15Kambe tiko ra mina ri ndzi rivele va fambile va ya hisela swilo swahava magandzelo va hambukisiwile etindleleni ta vona ta khale va fambisiwa emitileni ya tindlela leti nga vandziwangiki; 16kutani va endla tiko ra vona xihlamariso ni xisandzu hilaha ku nga heriki; hileswaku un'wana ni un'wana la nga ta hundza eka rona a hlamala, kutani a nikinisa nhloko ya yena. 17Kukotisa moya wa vuxa, ndzi ta va hangalasa emahlweni ka valala; ndzi va languta hi xikosi, ku nga ri hi mombo, hi siku ra ku onhaka ka vona.” ’ ”
18Va ri karhi va ku: “Tanani, hi endla makungu ku lovisa Yeremiya; hikuva nawu wu nga ka wu nga heri eka muprista, ni ku tsundzuxa ku nga ka ku nga heri eka la tlhariheke, ni loko ri ri rito eka muprofeta. Tanani, a hi n'wi tlhaveni hi ririmi, kutani hi nga anakanyi ku vulavula ka yena, ni kun'we.”
19Yehovha, ndzi hlayise, u yingisela rito ra lava ndzi tengisaka. 20Xana ku nga fuma ku biha ematshan'weni ya ku lulama, hilaha va nga celela vutomi bya mina rindzi xana? Tsundzuka leswaku a ndzi ri karhi ndzi yima emahlweni ka wena ku va vulavulela, leswaku ndzi hambukisa vukari bya wena eka vona! 21Hikwalaho, nyiketa ndlala vana va vona, u va tshiketela fumu; vasati va vona a va feriwe hi vana va ve tinoni, kutani vanuna va vona a va dlawe hi rifu, ni majaha ya rikwavo a ma tlhaviwe hi fumu enyimpini! 22Mukhosi a wu twakale etindlwini ta vona siku u tisaka mavandla hi xipuku ku ta lwa na vona; hikuva va cerile rindzi ra ku ndzi weta, kutani va ndzi rhiyile milenge hi ntlhamu. 23Kambe, wena Yehovha, u tiva leswaku makungu hinkwawo ya vona ehenhla ka mina ku ndzi dlaya; u nga tshuki u funengeta nandzu wa vona, kutani u nga susi xidyoho xa vona emahlweni ka wena; a va susumetiwe emahlweni ka wena! Hi siku ra vukari bya wena u endlisa sweswo na vona.
