YEREMIYA 20

₁Kutani Paxahuru, n'wana Imere, muprista ni mulanguteri lonkulu wa yindlu ya Yehovha, a twa Yeremiya loko a profeta timhaka teto; ₂kavaloko Paxahuru a ba muprofeta Yeremiya, kutani a n'wi nghenisa ekhotsweni ra le nyangweni leyi tlakukeke ya Benjamini, endlwini ya Yehovha. ₃Kambe nimixo Paxahuru a humesa Yeremiya ekhotsweni; kutani Yeremiya a ku eka yena: “Yehovha a nga ka a nga ha tshami a ku vita hi vito ra Paxahuru (ku rhula hinkwako); kambe u ta ku thya Magoro-Misabibi (ku chava hinkwako). ₄Hikuva Yehovha u te: ‘Waswivo, ndzi ta ku endla ku chava, ku ri ka wena, ni ka maxaka ya wena hinkwawo, va ta wa hi fumu ra lava nga valala va vona, kutani u ta vona sweswo hi mahlo; kambe ndzi ta nyiketa va Yuda hinkwavo emavokweni ya hosi ya Babilona, leswaku a va yisa evukhumbini eBabilona, kutani a va dlaya hi fumu. ₅Kambe ndzi ta nyiketa vukosi hinkwabyo bya muti lowu, ni mitirho hinkwayo ya wona, ni malondzoko hinkwawo lama tiyeke ya wona, ni vukosi hinkwabyo bya tihosi ta Yuda, ndzi byi nyiketa emavokweni ya valala va vona, va ta swi tlakula, va famba na swona, va swi yisa eBabilona. ₆Loko u ri wena Paxahuru, ni lava akeke endlwini ya wena hinkwavo, mi ta ya evukhumbini; u ta ya Babilona, u ya fela kona, u yimberiwa kona, ni maxaka ya wena hinkwawo lawa u nga karhi u ma profetelaka vunwa.’ ”

₇Oho Yehovha, u tshama u ndzi khorwisa, kutani ndzi khorwile; u tshama u ndzi sindzisa hi matimba, kutani u ndzi hlurile; ndzi endliwa xihlekiso siku rin'wana ni rin'wana, va ndzi hleka hinkwavo. ₈Hikuva hi masiku loko ndzi vulavula, ndzi tlakusa rito, ndzi huwelela eka vanhu ku nonon'hwa ni ku onha; hikwalaho rito ra Yehovha ri ndzi hundzukele ku holoveriwa ni xisandzu siku rin'wana ni rin'wana. ₉Kambe loko ndzi nga ku: “A ndzi nga ha tshami ndzi n'wi vula, ni loko ku ri ku vulavula hi vito ra yena,” eka mina swi fana ni ndzilo lowu hisaka embilwini ya mina, lowu nghenisiweke emarhambyini ya mina; kutani ndzi endla hi matimba ku wu hlayisa, kambe ndza tsandzeka. ₁₀Hikuva ndzi twile ku hleva ka lavo tala; ku chavisa ku ndzi rhendzele hi matlhelo hinkwawo: “N'wi hleveni, hi ta n'wi hehla.” Hinkwavo lava ngi ndzi twanana na vona, lava langutelaka ku khunguvanyeka ka mina, va ri: “Ingi a nga kanganyisiwa, kutani hi n'wi hlula leswaku hi tirihisela eka yena!” ₁₁Kambe Yehovha u le ka mina kukotisa nhenha leya matimba; hikwalaho, lava ndzi xanisaka va ta khunguvanyeka, kutani va nga ka va nga hluri nchumu; va ta khomisiwa tingana ngopfu hikuva a va tlharihanga; ti ta va tingana leti nga heriki, leti nga riki na ku rivariwa. ₁₂Yehovha wa tinyimpi u ringa la lulameke, u languta swisuti ni timbilu; ndzi ta vona ku tirihisela ka wena eka vona, hikuva ndzi ku tivisile timhaka ta mina. ₁₃Yimbelelani eka Yehovha, mi dzunisa Yehovha! Hikuva u lwele vutomi bya xisiwana emavokweni ya lavo biha.

₁₄A ku rhukaniwe siku leri ndzi velekiweke ha rona! Siku leri manana a ndzi velekeke ha rona ri nga tshuki ri katekisiwa! ₁₅A ku rhukaniwe munhu la nga tivisa tatana, a ku: “U velekeriwe n'wana wa wanuna,” a va a n'wi tsakisa ngopfu. ₁₆Munhu yeloyi a a kotise miti leyi Yehovha a yi mbundzuxeke, a nga yi tsetseleri; a a yingise mikosi ka hari mixo, ni mukhosi ninhlekanhi. ₁₇A va ndzi dlayanga ha yini, loko ndza ha ri ekhwirini, leswaku manana a ta va sirha ra mina, a va a tikile hilaha ku nga heriki xana? ₁₈A ndzi humela yini ekhwirini, leswaku ndzi ta vona ku karhala ni ku vaviseka, ni leswaku masiku ya mina ma hela hi tingana xana?