YEREMIYA 27

₁Eku sunguleni ka ku fuma ka Yoyakimi, n'wana Yosiya hosi ya Yuda, rito leri humaka eka Yehovha ri ta eka Yeremiya, ri ku: “Yehovha a vula, a ku eka mina:

₂“ ‘Ti endlele tinghole ni majoko, u tivehela enhan'wini ya wena’; ₃u swi rhumela eka hosi ya Edomu, ni ka hosi ya Mowabu, ni ka hosi ya vana va Amoni, ni ka hosi ya Tiri, ni ka hosi ya Sidoni, hi tintsumi leti teke Yerusalema, eka Sedekiyasi, hosi ya Yuda. ₄U va lerisa eka tihosi ta vona, u ku: ‘Ku vula Yehovha wa mavandla, Xikwembu xa Israele, mi byela tihosi ta n'wina mi ku:

₅“ ‘Hi mina ndzi endleke misava, ni vanhu, ni swiharhi leswi nga ehenhla ka misava, hi matimba ya mina lamakulu, ni voko ra mina leri tshambulukeke, ndzi yi nyika loyi ndzi swi rhandzaka ku n'wi nyika yona. ₆Kutani sweswi, ndzi nyiketa matiko lawa hinkwawo emavokweni ya Nebukadnetsara, hosi ya Babilona, nandza wa mina; ndzi n'wi nyika na swona swiharhi swa nhova swi ta n'wi tirhela. ₇Matiko hinkwawo ma ta n'wi tirhela, yena, ni n'wana wa yena, ni vatukulu va yena, ku ko ku fika nkarhi lowu tiko ra yena ri nga ta tsongahatiwa hi matiko layo tala ni tihosi letikulu. ₈Tiko kumbe ku fuma loku nga tiki tirhela Nebukadnetsara, hosi ya Babilona, ni loko ku ri ku nyiketa tinhamu ta vona ejokweni ra hosi ya Babilona, ndzi ta holovela tiko rolero hi tlhari, ni ndlala, ni ntungu, ku vula Yehovha, ndzi kondza ndzi ri lovisa hi voko ra yena.

₉“ ‘Kutani n'wina, mi nga tshuki mi yingisa vaprofeta va n'wina, hambi va ri vabvumbi va n'wina, hambi va ri valorhi va n'wina, hambi ti ri tin'anga ta n'wina, hambi va ri vangoma va n'wina, lava mi byelaka, va ku: “Mi nga ka mi nga tirheli hosi ya Babilona. ₁₀Hikuva va mi profetela mavunwa leswaku ndzi ta mi susela kule ni tiko ra n'wina, ndzi mi lahla, ndzi mi lovisa. ₁₁Kambe tiko leri vekaka tinhamu ta rona ejokweni ra hosi ya Babilona ku n'wi tirhela, ndzi ta ri tshika etikweni ra rona, ku vula Yehovha leswaku va ri rima, va tiakela kona.” ’ ”

₁₂Ndzi byela na Sedekiyasi, hosi ya Yuda, marito walawo hinkwawo ndzi ku: “Vekani tinhamu ta n'wina ejokweni ra hosi ya Babilona, mi tirhela yena ni tiko ra yena, kutani mi ta hanya. ₁₃Mi rhandzela yini ku fa hi matlhari ni ndlala, ni ntungu, wena ni tiko ra wena hilaha ku vulaka Yehovha hikwalaho ka tiko leri ri nga tirheliki hosi ya Babilona? ₁₄Mi nga tshuki mi yingisela marito ya vaprofeta lava mi byelaka, va ku: ‘Mi nga ka mi nga tirheli hosi ya Babilona,’ hikuva va mi profetele mavunwa; ₁₅hikuva a ndzi va rhumanga, ku vula Yehovha; va karhi va profeta mavunwa hi vito ra mina, leswaku ndzi ta mi tshika, ndzi mi lovisa, n'wina ni vaprofeta lava mi profetelaka.”

₁₆Ndzi ya byela vaprista ni tiko leri hinkwaro, ndzi ku: “Ku vula Yehovha, a ku: Mi nga tshuki mi yingisela marito ya vaprofeta va n'wina lava mi profetelaka, va ku: ‘Vonani swibya swa yindlu ya Yehovha swi ta tlherisiwa swi suka eBabilona sweswi,’ kasi va mi profetele vunwa. ₁₇Mi nga tshuki mi va yingisela. Tirhelani hosi ya Babilona, kutani mi ta hanya. Mi rhandzela yini leswaku muti lowu wu endliwa rhumbi? ₁₈Kungakuloko va ri vaprofeta, ni loko rito ra Yehovha ri ri kona eka vona, a va khongele Yehovha wa mavandla, leswaku swibya leswa ha saleke endlwini ya Yehovha, ni le ndlwini ya hosi ya Yuda ni le Yerusalema, swi nga tekeriwi Babilona. ₁₉Hikuva, ku vula Yehovha wa mavandla, hikwalaho ka timhandze, ni ka lwandle, ni ka swikhato, ni ka swibya swin'wana leswa ha seleke emutini lowu, ₂₀eka leswi Nebukadnetsara, hosi ya Babilona, a nga swi tekangiki siku a khomeke Yekoniya, n'wana Yoyakimi, hosi ya Yuda, le Yerusalema, a n'wi yisa evukhumbini le Babilona, swin'we ni vakulukumba hinkwavo va Yuda ni va Yerusalema. ₂₁Ku vula Yehovha wa mavandla, Xikwembu xa Israele, hikwalaho ka swibya leswa ha seleke endlwini ya Yehovha, ni le ndlwini ya hosi ya Yuda, ni le Yerusalema: ₂₂Swi ta yisiwa eBabilona, swi tshama kona, ku fikela siku ndzi nga ta swi lava, ku vula Yehovha, ndzi swi tlherisela exivandleni lexi.”