1“Fambani hi switarata swa Yerusalema, mi languta, mi vutisa mi lava emitsendzeleni ya kona loko mi nga kuma munhu, hambi a ri un'we, la phikelelaka ku famba hi ku lulama, la lavaka leswo saseka, leswaku ndzi ta tsetselela muti. 2Ni loko va ku: ‘Yehovha wa hanya!’ Va hlambanya hi vunwa.” 3Oho Yehovha! Xana mahlo ya wena a ma tivi ku lulama-ke? Wa va ba, kambe a va twi ku vavisa; wa va herisa, kambe va ala ku amukela ku layiwa; va tinonon'hwisile mimombo ya vona ku tlurisa ribye, kutani va ala ku hundzuka.
4Kambe mina ndzi ri: “Valavo hi lavatsongo ntsena; va hungukile hikuva a va tivi ndlela ya Yehovha ni nawu wa Xikwembu xa vona. 5Ndzi ta ya eka vakulukumba, ndzi vulavula na vona, hikuva vona va tiva ndlela ya Yehovha, ni nawu wa Xikwembu xa vona. Kambe, na vona hinkwavo, va tshovile joko, va tshunxile mapindza. 6Hikwalaho nghala ya swihlahla yi ta va dlaya; mhisi ya mananga yi ta va heta, ni yingwe yi ta rindza miti ya vona; un'wana ni un'wana la humaka eka yona u ta handzuriwa; hikuva ku dyoha ka vona ku tele, kutani va andzisile ku tiarisa ka vona.
7“Ndzi nga ku tsetselelerisa ku yini? Kasi vana va wena va ndzi tshikile, kutani va hlambanya hi lexi nga riki Xikwembu, ndzi amukerile ku hlambanya ka vona, kambe va ha ri karhi va oswana; va hlengeletana va ri lavanyingi endlwini ya muoswi. 8I timangwa leti xurheke, leti tsutsumelaka hinkwako, un'wana ni un'wana u rilela nsati wa nakulobye. 9Xana, ndzi nga tshika ku tshinya swilo sweswo, ku vula Yehovha, kumbe ndzi nga tshika ku tirihisela eka tiko lero tano xana?
10“Khandziyani emarhangwini ya yena, mi mbundzuxa, kambe ku nga vi ku ya herisela emakumu; tsuvulani vhinya ya yena; hikuva a hi vhinya ya Yehovha. 11Hikuva yindlu ya Israele, na yona yindlu ya Yuda ti ndzi kanganyisile ngopfu,” ku vula Yehovha. 12Va landzule Yehovha, va ku: “A nga kona; khombo ri nga ka ri nga hi humeleri, kambe hi nga ka hi nga voni fumu, hambi yi ri ndlala. 13Loko va ri vaprofeta, i moya ntsena, kutani a ku na loyi a vulavuleke ha vona; a ku endlisiwe sweswo eka vona!”
14Hikwalaho, Yehovha, Xikwembu xa tinyimpi, u vula sweswo, a ku: “Leswi mi vuleke mhaka yoleyo, maswivo, rito ra mina ndzi ta ri endla ndzilo enon'wini wa wena, kutani tiko leri ri va rikunyi, kutani ndzilo lowu wu ta va heta.
15“Langutani, n'wina, yindlu ya Israele, ndzi mi tisela tiko leri nga ekule,” ku vula Yehovha, “tiko ra matimba, tiko ra khale, leri u nga twiki ririmi ra rona, u nga twi leswi ri swi vulaka. 16Nkotloto wa rona wu kotisa sirha leri ahlameke; hinkwavo i tinhenha. 17Ri ta dya mavele ya wena ni vuswa bya wena; ri ta dya vana va wena va xinuna ni va xisati; ri dya tinyimpfu ta wena ni tihomu ta wena; ri dya vhinya ya wena ni mikuwa ya wena, ri ta heta hi fumu miti ya wena ya makhokholo leyi u yi tshembeke. 18Hambiswiritano, hi siku rero, ku vula Yehovha, ndzi nga ka ndzi nga mi heriseri makumu. 19Kambe loko mi nga vula, mi ku: ‘Xana Yehovha, Xikwembu xa hina, a hi endla swilo sweswo hinkwaswo hikwalaho ka yini?’ U va hlamula, u ku: ‘Hilaha mi ndzi tshikeke, mi va mi tirhela swikwembu swimbe etikweni ra n'wina, mi ta tirhela sweswo matiko etikweni leri nga riki ra n'wina.’
20“Tivisani yindlu ya Yakobo mhaka leyi, mi yi byela Yuda, mi ku: 21‘Yingisani, n'wina tiko leri hungukeke, leri nga riki na ku anakanya, leri nga ni mahlo, kambe a ri voni, leri nga ni tindleve, kambe a ri twi.’ 22Mi nga ka mi nga ndzi chavi xana,” ku vula Yehovha? “Xana mi nga ka mi nga rhurhumeri emahlweni ka mina xana? Mina ndzi nga endla hi sava nkova wa lwandle, wu nga ndzilakana lowu nga heriki, lowu ri nga taka ri nga wu tluri? Magandlati ya rona ma tsekatsekisiwa, kambe a ma na matimba; ma pfuma, kambe a ma wu tluri. 23Kambe tiko rero ri ni mbilu leyi kanetaka, leyi tiarisaka; va hundzukile, kutani va fambile. 24Kambe a va tilayi etimbilwini ta vona, va ku: ‘Hi fanele ku chava Yehovha, Xikwembu xa hina, la hi nyikaka, mpfula yo rhanga ni ya hlovo enkarhini wa yona, la hi hlayiselaka mavhiki lama vekiweke ya ku tshovela.’ 25Swidyoho swa n'wina swi hambukisile swilo leswo hinkwaswo; mi tsoniwa ku kateka kuloku hikwalaho ka swidyoho swa n'wina. 26Hikuva lavo biha va kona eka tiko ra mina; va nyanimela kukotisa loko ku khunkhusela vaphasi va swinyanyana; va rhiya xirimbana, kutani va phasa vanhu. 27Tindlu ta vona ti tele vukhamba kukotisa xisaka lexi taleke hi tinyanyana; va tikurisa kutani va fuwa hi mukhuva wolowo. 28Va nonile va torile, na swona, va tlurisa hi ku biha loku nga vuriwiki; eku tengisiweni ka vaavanyisi, a va avanyiseri xisiwana, kambe va kateka; kutani a va hitekeri ku mangala ka xisiwana eku avanyiseni. 29Xana ndzi nga tshika ku tshinya swilo leswo tano xana?” ku vula Yehovha; “kumbe ndzi nga tshika ku tirihisela eka tiko lero tano xana?
30“Va endla leswi chavisaka ni manyala etikweni leri: 31Vaprofeta va profeta vunwa, kutani vaprista va fuma, va ri karhi va lerisiwa hi vona, kutani tiko ra mina ri tsakisela swona. Mi ta endla yini eku heteleleni xana?
