1Kutani Bilidada wa Xuwaka, a hlamula, a ku:
2“Mi ta heta rini ku vulavula koloko xana?
Mi va ni ku twisisa, kutani hi ta vulavula.
3Hi endliwile ha yini tihomu?
Hi hungukise ha yini emahlweni ka n'wina?
4Wena la tihandzulaka hi vukari bya wena,
Xana misava yi ta hundzuka swahava hikwalaho ka wena-ke?
Ni maribye ma tshinetiwa evutshan'weni bya wona xana?
5“Ku vonakala ka lowo biha ku ta timeka,
Kutani malangavi ya ndzilo wa yena ma nga ka ma nga pfurhi.
6Ku vonakala ku ta hundzuka munyama entsongeni wa yena,
Rivoningo ra yena ra le henhla ka yona ri ta timiwa.
7Mikondzo ya yena leyi tiyeke yi ta larisiwa,
U ta wisiwa hi makungu ya yena.
8Hikuva u ta kandziya kukuto hi milenge ya yena;
U ta famba ehenhla ka marindzi,
9Ntlhamu wu ta n'wi phasa xirhendze,
Kukuto wu ta n'wi boha;
10Ntlhamu wu fihliwile emisaveni emahlweni ka yena,
Xirimbana xi n'wi langutele endleleni.
11Michavo yi n'wi tshukisa
matlhelo hinkwawo.
Yi n'wi tshunxa, yi n'wi tsutsumela.
12Ndlala yi n'wi heta matimba;
Ku onhaka ku n'wi khoma hi matsheve.
13Nhlonge ya miri wa yena
yi dyiwa hinkwayo,
Swilo swa yena swi dyiwa hi mativula ya rifu.
14U ta susiwa entsongeni wa yena
lowu a wu tshembeke,
U kokiwa ka hosi ya ku chaviseka.
15A ku na ombe wa varikwavo la akaka entsongeni wa yena,
Xivavula xi halatiwa henhla ka vuako bya yena.
16Ehansi, timitsu ta yena ta oma,
Ehenhla, marhavi ya yena ma tsemiwa.
17Xitsundzuxo xa yena xi herile emisaveni;
U pfumala vito erivaleni ra le masin'wini.
18U ta hlongoriwa eku vonakaleni, a ya emunyameni,
A susiwa emisaveni leyi akiweke.
19A nga siyi n'wana, hambi a ri ntukulu exikarhi ka tiko ra yena,
Evuakweni bya yena ku pfumaleka masiyela lama humaka eka yena.
20Tinxaka leti nga ta ta ti ta hlamala eku onhakeni ka yena,
Rixaka ra sweswi ri khomiwa hi ku rhurhumela.
21Vuako bya mbabva byi tano,
Ni vutshamo bya la nga tiviki Xikwembu byi tano.”
