1Kutani Sofara wa Naama a hlamula, a ku:
2“Meehleketo ya mina yi ndzi hlohlotela ku hlamula,
Na kona ndzi hluleka ku tikhoma eku anakanyeni ka mina.
3Ndzi twile ku tshinya loku ndzi teriseke tingana;
Kambe moya wa mina wu ndzi hlamurisa hi ku twisisa ku mina.
4Xana a ku tivi leswaku khalekhale,
Ka ha ri mpfhuka munhu a vekiwa emisaveni,
5Xichavo xa timbabva xi hatle ku hela,
Ni ku tsaka ka lowo biha i ka nkarhinyana ntsena?
6Hambi a nga kula, a ya fika etilweni,
Ni loko nhloko ya yena yi fika emapapeni,
7U ta hela kukota vulongo bya yena hilaha ku nga heriki.
Lava n'wi voneke va ta ku: ‘U kwihi?’
8U ta hela kukota norho, a nga ka a nga kumiwi,
U ta tlhaka kukota mahlori ya vusiku.
9Mahlo lama tshamaka ma n'wi vona, a ma nga ha tlheli ma n'wi vona,
Ni vutshamo bya yena a byi nga ha tlheli byi n'wi tiva.
10Vana va yena va ta lava ku tsetseleriwa hi swisiwana,
Mavoko ya yena ma ta vuyisela rifuwo leri a ri tekeke.
11Marhambu ya yena a ma tele matimba ya vuntshwa,
Kasi sweswi, ma ta etlela na yena entshurini.
12“Vumbabva a byi nandziha enon'wini wa yena,
A byi fihliwile ehansi ka ririmi ra yena;
13U byi hlayisile, a ri na byona,
U byi hlayisile emalakeni ya yena.
14Swakudya swa yena swi ta hundzuka emarhumbyini ya yena,
Byi va vuhlungu bya mhiri endzeni ka yena.
15U mitile ku nona, u fanele ku tlhela a hlanta,
Xikwembu xi ta swi humesa ekhwirini ra yena.
16U an'wile vuhlungu bya mamba,
Ririmi ra mhiri ri ta n'wi dlaya.
17Mahlo ya yena a ma nga ha tsakeli swinambyana,
Hambi yi ri milambu, hambi yi ri milambyana ya vulombe ni ntswamba.
18U ta tlherisa bindzu ra yena, a nga ka a nga ha fuwi nchumu,
U ta tlherisa leswi a swi tekeke, a nga ha swi tsakeli.
19Hikuva u karhatile swisiwana, u va cukumetile,
Kambe u onhile tindlu, a nga ti pfuxi.
20“Hikuva a nga tivanga ku kolwa embilwini ya yena,
U ta hluleka ku tiponisa hi leswi a swi rhandzisisaka.
21A ku na nchumu wa leswi chupukeke eka yena,
Hikwalaho ku tsaka ka yena ku nga ka ku nga tiyi.
22U ta pfumala, hambi rifuwo ra yena ri n'wi andzele ngopfu,
Mavoko ya lava xanisiweke ma ta n'wi wela ehenhla.
23Hi nkarhi lowu a xurhisaka khwiri ra yena,
Xikwembu xi ta n'wi ba hi ku hisa ka ku kariha ka xona,
Xi ta n'wi nisela emarhumbyini ya yena ematshan'weni ya vuswa.
24Hambi a nga balekela matlhari ya nhumbu,
Vurha bya koporo byi ta n'wi tlhava,
25U ta hlomula nseve emirini wa yena,
Nhumbu leyo hatima yi huma exivindzini xa yena;
U khomiwile hi ku chavisa ka rifu.
26Makhombo hinkwawo ma vekeriwile evuhlayiselweni bya yena,
Ndzilo lowu nga pfurhetiwiki hi munhu wu ta n'wi hisa,
Wu ta hisa ni leswi nga ta sala entsongeni wa yena.
27Tilo ri ta nyanyula ku homboloka ka yena,
Misava yi ta pfuka yi n'wi kaneta.
28Rifuwo ra yindlu ya yena ri ta lova,
Ri hela hi dyambu ra vukari bya Xikwembu.
29Hi kona ku averiwa ka mbabva loku humaka eka Xikwembu,
Ni ndzhaka leyi yi vekeriweke yona hi Xikwembu.”
