YOBO 27

₂“I Xikwembu lexi hanyaka, lexi ndzi tekeleke ku lulama ka mina!

Ni Lowa matimba hinkwawo la vavisaka moya wa mina!

₃Loko ndza ha hefemula,

Ni loko ku hefemula ka Xikwembu ka ha nghena etinhompfini ta mina,

₄Milomu ya mina yi nga ka yi nga vuli vunwa,

Ni ririmi ra mina ri nga ka ri nga dyeleri.

₅A ku ve kule na mina ku mi vula lava lulameke!

Ndzi ta tiya ndzi tivula la pfumalaka nandzu ndzi kondza ndzi fa;

₆Ndzi tikhomelela hi ku lulama ka mina, ndzi nga ka ndzi nga ku tshiki,

Mbilu ya mina a yi avanyisi ni siku ni rin'we ra ku hanya ka mina.

₇“Loyi a nga nala wa mina a a ve kukota mbabva,

Ni loyi a lwaka na mina a a kotise lowo homboloka!

₈Hikuva ntshembo wa mbabva hi wihi,

Loko Xikwembu xi n'wi tsema,

Ni loko xi n'wi tekela vutomi bya yena?

₉Xana Xikwembu xi ta twa ku huwelela ka yena,

Siku a dyiwaka hi mapfalo xana?

₁₀Kumbe xana u lave ku titsakela hi Lowa matimba hinkwawo-ke?

Xana a nga khongela Xikwembu hi masiku hinkwawo xana?

₁₁Ndzi ta mi dyondzisa maendlelo ya Xikwembu;

Ndzi nga ka ndzi nga fihli makungu ya Lowa matimba hinkwawo.

₁₂Vonani, hinkwenu mi tsundzuka swinene, ma twanana;

Loko swi ri tano, mi humesa ha yini marito ya hava?

₁₃“Xona hi ku akeriwa ka mbabva loku humaka eka Xikwembu,

Ni ndzhaka leyi va ku homboloka

va yi tekaka eka Lowa matimba hinkwawo.

₁₄Loko vana va yena va tele, swi ta va swakudya swa matlhari,

Vatukulu va yena va nga ka va nga xurhi vuswa.

₁₅Lava seleke va yena va ta yimberiwa hi ntungu,

Vasati va tinoni va yena va nga ka va nga rili.

₁₆Hambi a nga hlengeleta mali, yi fana ni ntshuri.

Ni tinguvu to saseka, ti fana ni ndzhope,

₁₇Hi yena la hlengeletaka, kambe hi lowo lulama

la nga ta tifunengeta ha swona,

Mali ya yena, lava nga riki na nandzu va ta avelana yona.

₁₈U akile yindlu kukota leyi akiweke hi nsumba,

Kukota xitsumba xa la rindzaka nsimu;

₁₉U tietlelela a fuwile, kutani a fa a nga lahliwi;

Loko a hanyanya, hinkwaswo swi fambile.

₂₀Mapfalo ma ta eka yena kukota ndhambi ya mati;

Nivusiku u susiwa hi xidzedze.

₂₁Moya wa le vuxeni wa n'wi susa, a famba;

Wa n'wi vutla hi matimba endhawini ya yena.

₂₂Hikuva Xikwembu xi n'wi copa hi miseve xi nga n'wi tsetseleli,

A rhandza ku phonyomuka evokweni ra xona.

₂₃Vanhu va ba mandla ha yena,

Va n'wi yimbelela miloti loko

a suka evutshan'weni bya yena.