YOBO 29

₂“Loko ndzi nga vona kambe tin'hweti ta khale,

Ni masiku lawa Xikwembu xi nga ndzi hlayisa exikarhi ka wona,

₃Enkarhini wolowo rivoningo ra xona ri voningeke nhloko ya mina,

Eku vonakaleni ka xona, a ndzi tiva ku famba exikarhi ka munyama.

₄Ingi loko ndzi ri kukotisa emasikwini ya ku tiya ka mina,

Loko Xikwembu xa ha tshamile entsongeni wa mina kukota nakulorhi.

₅Loko Lowa matimba a a ri na mina,

Ni loko vana va mina va ndzi rhendzele;

₆Loko mikondzo ya mina yi hlantsweka entswambeni,

Ni loko ribye ri ndzi humesela swinambyana swa mafurha!

₇Loko ndzi ri karhi ndzi huma ku ya ehubyeni ya muti,

A ndzi veka xitshamo xa mina erivaleni,

₈Lavantshwa, loko va ndzi vona, va ndzi kendlukela,

Lava kuleke a va suka va yima.

₉Tihosana a ti tshika ku vulavula,

Ti khoma milomu ya tona hi mavoko.

₁₀Rito ra valerisi a ri miyela,

Kutani ririmi ra vona ri namarhela emalakeni ya vona.

₁₁Ndleve leyi ngi yi ndzi twa a yi ku ndzi katekile,

Na rona tihlo leri ngi ri ndzi vona ri ndzi dzunisa.

₁₂Hikuva a ndzi lwela lava xanisekaka loko va kombela ku pfuniwa,

Ni xisiwana lexi pfumalaka mupfuni;

₁₃A ndzi katekisiwa hi loyi a lavaka ku fa,

Ndzi nghenisa ku tsaka embilwini ya wansati wa noni.

₁₄A ndzi funengela ku lulama,

kutani ku lulama ku tifunengeta ha mina;

Ku tenga ka mina a yi ri nguvu ya mina ni xihuku xa nuna.

₁₅A ndzi ri mahlo ya lavo fa mahlo,

Ni milenge ya lava khwitaka.

₁₆A ndzi ri tata wa swisiwana,

Kambe a ndzi vutisisa mhaka ya la nga tiviwiki;

₁₇A ndzi faya meno ya mbabva,

A ndzi tlatlambuta emenweni ya yena lexi a xi vutleke.

₁₈A ndzi ku: ‘Ndzi ta fa exisakeni xa mina,

Ndzi ta andzisa masiku ya mina kukotisa sava;

₁₉Rimitsu ra mina ri ta nava ematini,

Kutani mberha yi ta wa nivusiku emarhavini ya mina.

₂₀Ku vonakala ka mina ku ta hluka hi masiku,

Vurha bya mina byi ta tiyisiwa evokweni ra mina.’

₂₁“A va rhiya tindleve va langutisisa,

Kuteloko ndzi vulavurile va miyela.

₂₂A ku nga ri na loyi a hlamulaka loko ndzi vulavurile,

Timhaka ta mina a yi ri mberha ehenhla ka vona.

₂₃Va ndzi langutela kukotisa mpfula,

Va ahlamisa milomu ya vona kukotisa loko va amukela mpfula ya munakan'we.

₂₄A ndzi va hleka loko va kanakana,

A va tivanga ku susa ku tsaka enghoheni ya mina,

₂₅Loko ndzi hlawula ku ya eka vona, a ndzi tshama emahlweni ka vona,

Ndzi kotisa hosi exikarhi ka vunyingi,

Ni la chavelelaka lava rilaka.”