1“A ndzi endla xinakulobye ni mahlo ya mina,
Leswaku ndzi nga tshuki ndzi languta wanhwana.
2Kambe a ndzi ta vona ku averiwa loku yini eka Xikwembu ehenhla xana?
A ndzi ta vona ndzhaka leyo yini ehenhla, eka Lowa matimba hinkwawo?
3Ku onhaka, a hi ka mudyohi xana?
Ni makhombo a hi ya vatirhi va leswo homboloka xana?
4Xikwembu a xi vonanga tindlela ta mina-ke?
Xana a xi hlayanga vukandziyo bya mina hinkwabyo?
5“Loko ndzi tshama ndzi famba hi vunwa,
Ni loko nenge wa mina wu hatlisile ku kanganyisa,
6Xikwembu a xi ndzi veke exikalweni lexo lulama,
Xi ta kuma leswaku ndzi hava nandzu!
7Loko nkondzo wa mina wu hambukile ndlela,
Kumbe mbilu ya mina yi landzelele mahlo ya mina,
Ni loko xivati xi namarhele emavokweni ya mina,
8Loko swi ri tano, ndza ha rima, un'wana u ta dya,
Vusimekelo bya mina a byi tsuvuriwe!
9“Loko mbilu ya mina yi kanganyisiwe hi wansati,
Kumbe ndzi tshama enyangweni ya loyi ndzi akeke na yena ku n'wi etlela,
10Loko swi ri tano,
nsati wa mina a a silele van'wana,
A a nyiketiwe nuna un'wana!
11Hikuva lexo, i ku dyoha lokukulu,
I ku biha loku fanelaka hi ku biwa hi vaavanyisi;
12Kunene i ndzilo lowu hisaka ku fika etiheleni,
A wu faneli ku heta rifuwo ra mina hinkwaro.
13“Loko ndzi arile ku yingisa nandza wa mina wa xinuna kumbe wa xisati,
Siku va kanetanaka na mina,
14Ndzi to yini loko Xikwembu xi lo ndzi pfukela xana?
Ni loko xi vutisisa timhaka, ndzi to yini ka xona-ke?
15La ndzi vumbeke ekhwirini, na vona u va vumbile,
Xana a hi xona lexi hi humeseke ekhwirini ra wansati-ke?
16“Loko ndzi arile xikhongelo xa xisiwana,
Ndzi va ndzi languta wansati wa noni a kondza a karhala mahlo,
17Loko ndzi dyile vuswa bya mina ndzi ri swanga,
Ndzi nga phemelangi xisiwana?
18Kasi loko ndza ha ri lo ntshwa,
swi kurile ka mina,
Ndzi va ka swona kukotisa tatana.
Ndzi fambisile nsati wa noni mpfhuka ndzi huma ekhwirini ra manana.
19Loko ndzi vona un'wana a lova hi ku pfumala tinguvu,
Kumbe xisiwana xi pfumala xifunengelo,
20Loko swifungha swa vona swi nga ndzi katekisanga,
Va nga kufumelanga hi voya bya tinyimpfu ta mina,
21Loko voko ra mina ri tshama ri phakata xisiwana,
Hikuva ingi ndzi kume ku yimeriwa ehubyeni;
22Loko swi ri tano,
khatla ra mina a ri huma emahlanganweni ya rona,
Voko ra mina a ri we, ri tshoveka!
23Hikuva ku rihisa ka Xikwembu ka ndzi chavisa,
Ndzi tsandzeka ku yima emahlweni ka ku tlakuka ka xona.
24“Loko ndzi endlile nsuku ku tshemba ka mina,
Ndzi ku eka nsuku lowunene:
Ku dzuna ka mina ku le ka wena.
25Loko ndzi tsakele vukulu bya rifuwo ra mina.
Ni leswo tala leswi ndzi hlengeleteke hi voko ra mina,
26Loko ndzi langutile dyambu loko ri kwetsima,
Kumbe n'weti loko wu famba eku vonakaleni ka wona.
27Loko mbilu yanga yi hluriwa exihundleni,
Ni loko ndzi yisile voko enon'wini wa mina ku khensa;
28Na kona i ku dyoha loku fanelaka ku biwa hi muavanyisi.
Hikuva ingi ndzi landzurile Xikwembu xa le henhla.
29“Loko ndzi tsakele ku onhaka ka nala wa mina,
Ndzi khanerile siku khombo ri n'wi weleke ehenhla;
30Kasi a ndzi pfumelanga malaka ya mina ku hleva,
Ni ku kombela vutomi bya yena eku rhukaneni.
31Vanhu va ntsonga wa mina a va vulanga, va ku:
‘U kwihi la nga ka a nga xurhi
hi tinyama ta swifuwo swa yena?’
32Muendzi a nga tshamanga nivusiku ehandle,
A ndzi tshama ndzi pfulela mufambi nyangwa ya mina.
33Loko ndzi funengetile ku homboloka ka mina kukota Adamu,
Ndzi va ndzi fihla milandzu ya mina exifuveni xa mina,
34Hi ku chava vunyingi bya vanhu,
Hikuva xisandzu xa tinxaka a xi ndzi chavisa,
Ndzi tshama exihundleni ndzi nga humi enyangweni ya mina.
35Loko ngi a ri kona la ndzi yingisaka!
Vonani, ku tiyisiwa ka mina hi kuloku:
‘Lowa matimba a a ndzi hlamule!
Loko a ndzi ri ni mhaka ya ku kanela ingi yi tsariwe hi la ndzi lwisaka!’
36A ndzi ta yi rhwala ekhatleni ra mina,
Kumbe ndzi yi boha emombyeni kukota musingasoro;
37A ndzi ta n'wi hlayela mikondzo ya mina hinkwayo,
Ndzi n'wi tshinelela kukotisa loko ngi a ri hosi.
38“Loko ngi nsimu ya mina ya ndzi hehla,
Ni loko tindzima ta yona ti humesa mihloti;
39Loko ndzi dyile mavele ya yona ndzi nga yi xavanga,
Ndzi vavisa timbilu ta vini va yona va khale;
40A ku mile mitwa ematshan'weni ya koro,
Ni rihunga, ematshan'weni ya barley!”
Ku hela ka marito ya Yobo.
