Marito ya Elihu.
1Kutani vavanuna lavanharhu va tshika ku vulavula na Yobo, hikuva a ha tivula la lulameke.
2Kavaloko ku pfurha vukari bya Elihu, n'wana Barakele wa Buzi, wa yindlu ya Rhamu. Vukari bya yena byi pfurhela Yobo hikuva a a tivekile la lulameke emahlweni ka Xikwembu. 3Vukari bya yena byi pfurhela ni vanakulobye lavanharhu hikuva a va pfumarile swo hlamula, hambiswiritano, a va kaneta Yobo. 4Kambe Elihu a a hlwerile ku hlamula Yobo, hikuva a va n'wi tlula hi malembe. 5Kakuloko Elihu a vona leswaku a nga hlamuriwanga hi milomu ya vavanuna lavanharhu, a kariha ngopfu!
6Kutani Elihu n'wana Barakele wa Buzi, a hlamula, a ku:
“Ndzi xihlangi hi malembe, kambe n'wina mi vakulu;
Hikwalaho ndzi tlherile, ndzi chava
Ku vula miehleketo ya mina emahlweni ka n'wina.
7A ndzi ku:
‘Masiku ma ta vulavula,
Malembe ya ku tala ma ta hi byela vutlhari.’
8Kambe i moya lowu nga ka munhu,
Ni ku huhutela ka Lowa matimba hinkwawo leswi nyikaka ku twisisa;
9A hi malembe layo tala lama tlharihisaka,
Lavakulu a va twisisi leswo lulama hi masiku.
10Hikwalaho ndzi nge: ‘Yingisa:
Na mina, ndzi rhandza ku vula ku anakanya ka mina.’
11A ndzi langutela ku hela ka marito ya n'wina,
A ndzi yingisela ku hlamula ka n'wina hi ndleve,
Mi ko mi heta ku hlamula;
12Ndzi yingisile, ndzi mi xiya swinene,
Kambe a ku na un'we la hlamuleke Yobo,
A ku na un'we wa n'wina la kaneteke marito ya yena.
13Hambiswiritano, mi nga tshuki mi ku:
‘Hi kumile vutlhari;
Xikwembu ntsena xi nga n'wi hlula,
a nga ri munhu.’
14Kambe a nga tisangi marito eka mina,
Hikwalaho ndzi ta n'wi hlamula hi marito lama nga faniki ni ya n'wina.
15“Va chava, a va ha hlamuli!
Va lahlekele hi marito.
16Ndzi langutele ku miyela ka vona,
Loko va yimile va nga ha hlamuli.
17Ndzi ta hlamula, na mina, enkarhini wa mina,
Ndzi ta humesa, na mina, leswi ndzi swi tivaka.
18Hikuva ndzi xurhile timhaka,
Moya wu kona eka mina lowu ndzi kucetelaka.
19Mapfalo ya mina ma kotisa vhinyo leyi nga pfuriwangiki,
Kukota swikutsu leswintshwa leswi handzukaka.
20Ndzi rhandza ku vulavula, ndzi ta tiva ku hefemula,
Ndzi ta ahlamisa nomu wa mina, ndzi hlamula,
21Kambe a ndzi nga languti nghohe ya munhu,
A ndzi nga heti munhu,
22Hikuva a ndzi tivi ku lwisa,
Muvumbi wa mina a nga hatlisa ku ndzi susa.
