1Elihu a yisa timhaka emahlweni, a ku:
2“Wa nga ndzi rhulela mbilu switsongo, ndzi ta ku tsundzuxa,
Hikuva ndza ha ri ni lexi ndzi nga xi vulelaka Xikwembu.
3Ndzi ta landza ku tiva ka mina ekule,
Ndzi ta veka La lulameke emuvumbi wa mina.
4Hikuva kunene marito ya mina a hi ya ku hemba;
Emahlweni ka wena, ku yima la hetisekeke eku tiveni.
5“Vona, Xikwembu xi ni matimba,
kambe a xi tengisi munhu;
Xikulu hi matimba ya ku twisisa ka xona.
6A xi hlayisi vutomi bya mbabva,
Xi avanyisela lava xanisiwaka,
7A xi fularheli lavo lulama,
Kambe xi va veka ni tihosi exiluvelweni,
Xi va tshamisisa kona hi masiku leswaku va kurisiwa.
8Kungakuloko va bohiwile hi timpecana,
Loko va bohiwa hi tinghole ta makhombo,
9Xi va hlavutela ku endla ka vona,
Ni ku dyoha ka vona, hikuva va tikukumuxile;
10Xi pfula tindleve ta vona leswaku ti yingisa ku laya,
Xi va byela ku tshika ku homboloka.
11Loko va yingisa, kutani va xi tirhela,
Va ta hetisela masiku ya vona eku katekeni,
Ni malembe ya vona eku tsakeni.
12Kambe loko va nga yingisi, va ta tlhaviwa hi tlhari,
Va lova hi ku kala ku twisisa.
13“Va timbilu to biha va tihlengeletela vukari,
A va khongeri Xikwembu loko xi va bohile;
14Va fa va ha ri lavantshwa,
Vutomi bya vona byi lova kukota bya vaoswi.
15Kambe xi ponisa xisiwana emakhombyeni ya xona,
Xi pfula tindleve ta swona ha wona mahlomulo.
16Xi ta ku ponisa na kona emin'waleni ya masangu,
Xi ku veka endhawini laha u nga kamanyetiwiki,
Swakudya leswi xawulaka swi ta vekiwa etafuleni ra wena.
17“Kambe loko u tele miehleketo ya timbabva,
Ku biwa ku ta landzelana ni ku avanyisa.
18Vukari byi nga tshuki byi ku yisa exisolweni,
Ni vukulu bya ndziho byi nga ti ku hambuxa.
19Ku huwelela ka wena ku nga ku humesa ekhombyeni xana?
Hambi ma ri matimba hinkwawo ya wena ma nga ku pfuna xana?
20U nga tshuki u navela vusiku,
Lebyi susaka vanhu endhawini ya vona.
21Tilangutele, u chava ku tinyiketa leswo biha,
Hikuva u swi hlawurile ku tlula mahlomulo.
22Vona, Xikwembu xi tlakukile hi matimba ya xona, I mani la dyondzisaka kukotisa xona?
23I mani la nga xi dyondzisaka ndlela ya xona?
I mani la nga ku eka xona: ‘U endlile swo biha’?
24“U nga tshuki u rivala ku twakarisa mitirho ya xona.
Leyi dzunisiwaka hi tinsimu ta vanhu.
25Yi langutiwa hi vanhu hinkwavo,
Hambi munhu wa ku fa a yi languta a ri kule.
26Xikwembu i xikulu, kambe hi nga ka hi nga tivisisi vukulu bya xona;
Ntsengo wa malembe ya xona a wu hlayiwi.
27Xi tlhandlukisa mathonsi ya mati,
Kutani mpfula yi na, yi huma emapapeni lama vumbiweke hi xona;
28Mapapa ma halata timpfula,
Ma ti nisela ehenhla ka vunyingi bya vanhu.
29I mani la tivisisaka ku handzuka ka mapapa,
Ni mpfumawulo wa ntsonga wa xona?
30Vona, xi haxa ku vonakala emahlweni ka xona,
Kutani xi tifunengeta hi swidziva swa malwandle.
31Xi avanyisa vamatiko ha swona;
Kambe xi va nyika ha swona swakudya leswo tala.
32Xi tatela mavoko ya xona hi rihati,
Xi hlasela ha rona valala va xona.
33Mpfumawulo wa rona wu xi vikela,
Swi tsandza ni swifuwo, swi tiva loko xi tshinela.
