YOBO 5

₁“Huwelela sweswi!

Xana un'wana u kona la nga ta ku hlamulela?

Kutani hi wihi wa vakwetsimi la nga ta hundzukela eka wena xana?

₂Kasi vukari byi dlaya wa rihuhu,

Ni xihunguki xi dlayiwa hi mona.

₃Ndzi vonile xihunguki xi mirile rimitsu,

Kutani hi nomu lowu, ndzi vona yindlu ya xona yi rhuketeriwa;

₄Vana va xona a va na ku titsakela,

Va kandziyeriwa etihubyeni, va nga lamuleriwi.

₅La nga ni ndlala a ya dya ku tshovela ka xona,

A ya vutla ni le xikarhi ka mitwa;

₆Kambe makhamba ma mita rifuwo ra xona.

Ntsena khombo a ri humi entshurini,

Na wona nhlomulo a wu hluki emisaveni;

₇Kambe munhu u tswaleriwe gome,

Kukotisa tinhlahle ku haha.

₈“Loko ndzi ri mina, a ndzi ta tshinela eka Xikwembu,

Ndzi veka eka Xikwembu timhaka ta mina.

₉Xi nga xona lexi endlaka swilo leswikulu swonghasi, leswi nga kambekiki,

Ni mahlori lama nga hlayekiki?

₁₀U chulula mpfula emisaveni,

U chelela mati emasin'wini.

₁₁U tshamisisa vanhu lava tsongahaleke endhawini leyi tlakukeke,

Lava rilaka va pfuka va hlayisekile.

₁₂U hangalasa makungu ya vanhu va mano,

Leswaku mavoko ya vona ma nga ka ma nga endli nchumu.

₁₃U phasa tinthari hi mano ya tona,

Makungu ya valunya wa ma hangalasa;

₁₄Nimixo, va banana ni munyama,

Ninhlekanhi, va hulumeta kukotisa loko byi ri vusiku.

₁₅Lowa khombo, u n'wi tshunxisa sweswo eka fumu ra nomu wa vona,

Ni le vokweni ra lowa matimba;

₁₆Ku tshemba ku ta tlhelela eka loyi a tsaneke,

Kasi ku homboloka ku siviwa milomu.

₁₇“Vonani, ku katekile munhu loyi Xikwembu xi n'wi layaka!

U nga soli nkhavi wa la nga ni matimba hinkwawo,

₁₈Hikuva wa tlhava, kambe a tlhela a bohelela timbanga,

Wa tshova, kutani mavoko ya yena ma horisa.

₁₉Emakhombyeni ya ntlhanu na rin'we u ta ku kutsula,

Ni ka laya ntlhanu na mambirhi, a ku na swo biha leswi nga ku khumbaka.

₂₀Etindlaleni u ta ku hlayisa, u nga tshuki u fa,

Etinyimpini u ta ku hlayisa, u nga tlhaviwi hi fumu.

₂₁U ta sirheliwa eku biweni ka ririmi,

U nga ka u nga chavi ku onhaka loko ku fikile.

₂₂U ta hleka ku onhaka ni ndlala,

U nga chavi swivandzana swa nhova,

₂₃Hikuva u ta endla xinakulobye ni maribye ya nhova,

Kambe swivandzana swa nhova swi ta rhula na wena.

₂₄U ta kuma ku rhula entsongeni wa wena,

U ta kamba matshanga ya wena kutani u nga pfumali nchumu.

₂₅U ta kuma leswaku nyimba ya wena ya engeteleka,

Ni leswaku vatukulu va wena va ta tala ku fana ni byanyi bya nhova.

₂₆U ta rhelela esirheni ra wena eku dyuhaleni lokunene,

Kukota nyandza ya koro loko yi susiwa hi nkarhi wa yona.

₂₇Vona, hi teto hi ti laviseke, ti tshamisise sweswo,

U ti yingisisa, u ti veka exifuveni.”