1Kutani Bilidada wa Xuwaka a vulavula, a ku:
2“Timhaka letonghasi, u ta tivulavula ku yisa kwihi?
Ni marito ya nomu wa wena ma ta fana ni moya lowu hungelaka ku fika kwihi?
3Xana Xikwembu xi nga voyamisa leswo lulama-ke?
Lowa matimba a nga voyamisa ku lulama xana?
4Loko kumbe vana va wena va n'wi dyohele,
U va nyiketile hi ku dyoha ka vona.
5Kambe wena loko u lava Xikwembu,
Loko u tikhongelela tintswalo eka Lowa matimba hinkwawo,
6Loko u basile, u lulamile kunene u ta ku hlayisa,
U ta katekisa yindlu ya wena leyi lulameke.
7Masungulo ya wena a ma ri lamatsongo,
Kambe swa makumu swi ta tlurisisa ngopfu hi ku twakala.
8Vutisisa tinyimba ta khale,
U tsundzuka leswi vatatana wa vona va swi kumeke.
9Hikuva hina hi va tolo, a hi tivi nchumu,
Masiku ya hina la misaveni i mindzhuti ntsena.
10Vona, va nga ku dyondzisa, va vulavula na wena,
Va humesa exifuveni xa vona timhaka leti!
11“Xana mavungu ma nga mila laha ndzhope ku nga hava,
Kumbe tinhlanga ti nga tala laha mati ku nga hava xana?
12Ra ha ri khava, hambi ri nga tsemiwi,
Ri ta vuna, byanyi byin'wana bya ha tsakama.
13Tindlela ta lava rivalaka Xikwembu ti tano,
Ni ku langutela ka musandzi ka hela.
14Ku tshemba ka yena ku phonyokile,
Ku tshemba ka yena i xisaka xa pume.
15U tiseketele hi yindlu ya yena, kambe a yi yimi,
U tikhomelela ha yona, kambe a yi tiyi.
16I murhi lowu taleke hi matimba loko dyambu ri hisa,
Marhavi ya wona ma nava ensin'wini ya wona,
17Timitsu ta wona ti phaphama emaribyeni,
Ti nghena ni le xikarhi ka maribye ya yindlu.
18Kambe loko va wu susa endhawini ya wona,
Wu ta landzula, wu ku: ‘A ndzi ku vonanga ni siku ni rin'we.’
19Hi kona ku tsaka loku a ku kumaka endleleni ya wona;
Kambe yin'wana yi ta mila endzhaku ka wona.
20“Vona, Xikwembu a xi soli la pfumalaka nandzu,
Kambe xi nga ka xi nga sirheleli swidyohi.
21Wa ha ta tata nomu wa wena hi mahleko,
Ni milomu ya wena hi ku tsaka.
22Lava ku vengeke va ta tela hi tingana;
Kutani ntsonga wa lavo biha a wu nga ha vi kona.”
