YOXUWA 20

₁Yehovha a byela Yoxuwa a ku: ₂“Byela vana va Israele u ku eka vona: ‘Tivekeleni miti ya vuchavelo leyi ndzi mi byeleke yona hi nomu wa Muxe, ₃leswaku mudlayi la dlayeke munhu hi ku hoxa, ku nga ri ha vomu, a ta tiva ku balekela kona: swi ta va swichavelo swa n'wina hikwalaho ka murihiseri wa ngati. ₄Mudlayi u ta balekela eka wun'wana wa miti leyi, u ta yima enyangweni ya muti, kutani u ta vula timhaka ta yena etindleveni ta vakulukumba va muti lowu. Kavaloko va ta n'wi amukela ekarikwavo emutini, va ta n'wi komba yindlu, kutani u ta tshama na vona. ₅Kutaku va nga ka va nga nyiketi mudlayi emavokweni ya yena, hikuva u dlayile warikwavo ku nga ri ha vomu, a nga n'wi venganga ni tolo ni tolweni. ₆U ta tshama emutini lowu a ko a yima eku avanyisiweni, emahlweni ka nhlengeletano, ni ku fika erifuni ra muprista lonkulu wa nkarhi wolowo. Kavaloko mudlayi u ta timukela, a tlhelela emutini wa yena ni le ndlwini ya yena, emutini lowu a sukeke eka wona.’ ”

₇Kavaloko va hlawula Kedexe wa Galeliya, entshaveni ya Neftali, na Xikeme entshaveni ya Efrayimi, na Kiriyata-Araba; wu nga Hebroni, entshaveni ya Yuda. ₈Ehase ka Yordani, evuxeni bya Yeriko, va hlawula Beseri, emananga, erivaleni wu ri muti wa nyimba ya Rhuveni, na Ramoto wa Giliyadi, muti wa nyimba ya Gadi, na Golani wa Baxani, wu ri muti wa nyimba ya Manase. ₉Hi yona miti leyi vekeriweke vana va Israele hinkwavo, ni muluveri la luvelaka exikarhi ka vona, leswaku un'wana ni un'wana la dlayeke munhu, ku nga ri ha vomu, a tiva ku balekela kona. A nga tshuki a dlawa hi voko ra murihiseri wa ngati, a nga si humelela emahlweni ka nhlengeletano.