YOXUWA 21

₁Tindhuna ta tindlu ta Valevhi ti tshinelela muprista Eliyazara, na Yoxuwa, n'wana Nuni, ni tindhuna ta tindlu ta tinyimba ta vana va Israele, ₂kutani ti vulavula na vona eXilo, etikweni ra Kanana, ti ku: “Yehovha u lerisile hi Muxe leswaku hi nyikiwa miti ya ku aka kona, ni matikwana va yona ya swifuwo swa hina.” ₃Kavaloko vana va Israele va nyika Valevhi hi ku lerisa ka Yehovha, miti leyi ni matikwana ya yona, va ma pambula endzhakeni ya vona.

₄Ku huma tindlu ta va Kohata hi vuhlolotwana; kutani vana va muprista Aroni va Valevhi, va kuma hi vuhlolotwana miti ya 13, Yi ri ya nyimba ya Yuda, ni ya nyimba ya Simiyoni, ni ya rixaka ya Benjamini. ₅Vana van'wana va Kohata va kuma hi vuhlolotwana miti ya 10, yi nga ya tindlu ta nyimba ya Efrayimi, ni ta nyimba ya Dani, ni ta hafu ya nyimba ya Manase. ₆Vana va Gerixoni va kuma hi vuhlolotwana miti ya 13, yi ri ya tindlu ta nyimba ya Isakara, ni ta nyimba ya Asere, ni ta nyimba ya Neftali, ni ta hafu ya nyimba ya Manase, eBaxani. ₇Vana va Merari va kuma hi tinyimba ta vona miti ya 12 ya nyimba ya Rhuveni, ni ya nyimba ya Gadi, ni ya nyimba ya Zebuloni. ₈Sweswo vana va Israele va nyika Valevhi hi vuhlolotwana, miti leyi, ni matikwana ya yona, hilaha Yehovha a va leriseke hakona hi Muxe.

₉Hi mukhuva wolowo, va nyika miti leyi yi huma enyimbeni ya vana va Yuda, ni le nyimbeni ya vana va Simiyoni; va vula erivaleni mavito ya yona. ₁₀Eka vana va Aroni, exikarhi ka tindlu ta va Kohata, exikarhi ka vana va Levhi (hikuva ku averiwa loko sungula a ku ri ka vona), ₁₁va va nyika muti wa Araba, tata wa Anaka (i Hebroni) entshaveni ya Yuda, ni tikwanyana ra wona, ematlhelweni hinkwawo; ₁₂loko ma ri masimu ya muti ni swimitana swa wona, va swi nyika Kalebe, n'wana Yefune, swi va swa yena. ₁₃Va nyika vana va Aroni, muprista, muti wa xichavelo xa mudlayi, Hebroni, ni tikwanyana ra wona, ₁₄na Libina ni tikwanyana ra wona, na Yatiri ni tikwanyana ra wona, na Exitemoka ni tikwanyana ra wona, ₁₅na Holoni ni tikwanyana ra wona, na Debiri ni tikwanyana ra wona, na Ayini ni tikwanyana ra wona, ₁₆na Yuta ni tikwanyana ra wona, na Beta-Xemexe ni tikwanyana ra wona: miti ya 9 tinyimba timbirhi leti; ₁₇ni ya nyimba ya Benjamini Gibiyoni ni tikwanyana ra wona, na Geba ni tikwanyana ra wona, ₁₈na Anatoto ni tikwanyana ra wona, na Alimoni ni tikwanyana ra wona: miti ya mune. ₁₉Miti hinkwayo ya vana va Aroni, a yi ri miti ya 13.

₂₀Miti ya ku averiwa ka tindlu ta vana va Kohata, va ri Valevhi lava seleke va vana va Kohata, yi hume enyimbeni ya Efrayimi. ₂₁Va va nyika Xikeme, muti wa xichavelo xa mudlayi ni tikwanyana ra wona, entshaveni ya Efrayimi, na Gezere ni tikwanyana ra wona, ₂₂na Kibisayimi ni tikwanyana ra wona, na Bet-Horoni ni tikwanyana ra wona: miti ya mune; ₂₃ni ya nyimba ya Dani, Eliteke ni tikwanyana ra wona, na Gibetoni ni tikwanyana ra wona, ₂₄na Ayaloni ni tikwanyana ra wona, na Gati-Rimoni ni tikwanyana ra wona: miti ya mune; ₂₅ni ya hafu ya nyimba ya Manase, Taanaka ni tikwanyana ra wona, na Gati-Rimoni ni tikwanyana ra wona: miti mimbirhi. ₂₆Miti hinkwayo ya vana lava seleke va Kohata, a yi ri ya khume, ni matikwana ya yona.

₂₇Va nyika vana va Gerixoni, va ri va tindlu ta Valevhi, Golani wa Baxani, muti wa xichavelo xa mudlayi, ni tikwanyana ra wona, na Bexetera ni tikwanyana ra wona, yi hume enyimbeni ya Manase; ₂₈ni ya nyimba ya Isakara, Kixiyoni ni tikwanyana ra wona, na Daberata ni tikwanyana ra wona, ₂₉na Yaramutu ni tikwanyana ra wona, na Eni-Ganimi, ni tikwanyana ra wona: miti ya mune; ₃₀ni ya nyimba ya Asere, Mixala ni tikwanyana ra wona, na Abidoni ni tikwanyana ra wona, ₃₁na Helikati ni tikwanyana ra wona, na Rehobo ni tikwanyana ra wona: miti ya mune; ₃₂ni ya nyimba ya Neftali, Kedexe wa Galeliya, muti wa xichavelo xa mudlayi, ni tikwanyana ra wona, na Hamoti-Dori ni tikwanyana ra wona, na Karitana ni tikwanyana ra wona: miti minharhu. ₃₃Miti hinkwayo ya va Gerixoni, hi tindlu ta vona, a yi ri ya 13, ni matikwana ya yona.

₃₄Va nyika tindlu ta vana va Merari, va ri Valevhi lava saleke, Yokineyama ni tikwanyana ra wona, na Karita ni tikwanyana ra wona, ₃₅na Dimina ni tikwanyana ra wona, na Nahalala ni tikwanyana ra wona: miti ya mune ya nyimba ya Zebuloni, ₃₆ni ya nyimba ya Rhuveni, Beseri ni tikwanyana ra wona, na Yahasi ni tikwanyana ra wona, ₃₇na Kedemoto ni tikwanyana ra wona, na Mefata ni tikwanyana ra wona; miti ya mune; ₃₈ni ya nyimba ya Gadi, Ramoto wa Giliyadi, muti wa xichavelo xa mudlayi, ni tikwanyana ra wona, na Mahanayimi ni tikwanyana ra wona, ₃₉na Hexiboni ni tikwanyana ra wona, na Yazere ni tikwanyana ra wona: miti hinkwayo yi ri mune. ₄₀Hi yona miti hinkwayo ya vana va Merari hi tindlu ta vona, va ri lava saleke va tindlu ta Valevhi; ku averiwa ka vona a yi ri miti ya 12. ₄₁Miti hinkwayo ya Valevhi, exikarhi ka ndzhaka ya vana va Israele, yi ri miti ya 48 ni matikwana ya yona. ₄₂Hi yona miti yoleyo; muti wun'wana ni wun'wana wu ri ni tikwanyana ra wona leri wu rhendzeleke; a swi ri sweswo eka miti leyi hinkwayo.

₄₃Yehovha a nyika Israele tiko hinkwaro leri a hlambanyeleke vatata wa vona ku va nyika rona, kutani va ri fuma, va aka eka rona. ₄₄Yehovha a va nyika ku wisa hi matlhelo hinkwawo, hilaha a hlambanyeleke vatata wa vona hakona; a ku vanga na un'we wa valala va vona la kotaka ku tiya emahlweni ka vona, Yehovha a va nyiketa hinkwavo emavokweni ya vona. ₄₅A ku wanga na rito rin'we ra marito hinkwawo yo saseka lawa Yehovha a ma byeleke yindlu ya Israele: hinkwaswo swi humelele.