Ta ku nghena emutini wa Yeriko.
1Yeriko a wu biyiwile kambe wu pfariwile hikuva a va chava vana va Israele; a ku vanga na munhu la humaka ni la nghenaka.
2Yehovha a ku eka Yoxuwa: “Languta, ndzi nyiketile emavokweni ya wena, Yeriko ni hosi ya kona, ni tinhenha ta kona. 3Fambani, mi rhendzelekela muti, n'wina vavanuna hinkwenu lami hlomeke, mi rhendzelekela muti kan'we hi ku famba ematlhelweni hinkwawo: u ta endlisa sweswo hi masiku ya 6. 4Vaprista va 7 va ta rhwala tinanga ta 7 leti pfumaka emahlweni ka areka; siku ra 7 mi ta rhendzelekela muti kantlhanu na kambirhi; kutani vaprista va ta yimba tinanga. 5Kutakuloko va yimba mhalamhala leyi pfumaka, ni loko mi twa mpfumawulo wa nanga, tiko hinkwaro ri ta ba huwa leyikulu, hikwalaho rirhangu ra muti ri ta wa, ri mbundzumuka, kutani tiko ri ta khandziya, un'wana ni un'wana a kongoma emahlweni ka yena.”
6Kutani Yoxuwa, n'wana Nuni, a vitana vaprista, a ku eka vona: “Tlakulani areka ya ntwanano, kambe vaprista va 7 a va tamele tinanga ta 7 leti pfumaka emahlweni ka areka ya Yehovha.” 7Kutani va ku eka tiko: “Fambani, mi rhendzelekela muti kutani vanhu lava hlomaka a va hundze emahlweni ka areka ya Yehovha.”
8Kuteloko Yoxuwa a byerile tiko, vaprista va 7 lava rhwalaka tinanga leti pfumaka ta 7 emahlweni ka Yehovha, va hundza, va yimba tinanga, kutani areka ya ntwanano wa Yehovha yi famba endzhaku ka vona. 9Vavanuna lava hlomaka a va famba emahlweni ka vaprista lava yimbaka tinanga, kutani ntlawa wa le ndzhaku a wu landza areka; loko va ri karhi va famba, a va yimba tinanga. 10Yoxuwa a a lerisile tiko a ku: “Mi nga huweleli; marito ya n'wina ma nga twakali, ku nga humi ni rito rin'we emilon'wini ya n'wina, ku ko ku fika siku leri ndzi nga ta ku eka n'wina: ‘Huwelelani!’ hi kona mi nga ta huwelela.” 11Kavaloko areka ya Yehovha yi famba yi rhendzelekela muti kan'we kutani va ya nghena emixaxeni va etlela kona emixaxeni.
12Kute nimixo, Yoxuwa a hatlisa a pfuka, kutani vaprista va ya rhwala areka ya Yehovha. 13Vaprista va 7 lava tameleke tinanga ta 7 leti pfumaka emahlweni ka areka ya Yehovha, va ri karhi va famba va yimba tinanga, ni vanhu lava hlomaka a va famba emahlweni ka vona, kutani ntlawa wa le ndzhaku a wu landza areka ya Yehovha; loko a va ri karhi va famba, a va yimba tinanga. 14Hi siku ra vumbirhi va rhendzelekela muti kan'we, kutani va tlhelela emixaxeni, va endlisa sweswo hi masiku ya ntlhanu na rin'we.
15Hi siku ra 7, va vindzuka, loko vurhonga byi tsuvuka, kutani va rhendzelekela muti eka ntlhanu na kambirhi hi mukhuva wolowo. 16Kakuloko va ha famba eka ntlhanu na kambirhi, ni loko vaprista va yimba tinanga, Yoxuwa a ku eka tiko: “Huwelelani! Hikuva Yehovha u mi nyiketile muti. 17Muti ni hinkwaswo leswi nga eka wona swi ta yila eka Yehovha; ku ta hanya Rahava nghwavava ntsena, ni hinkwavo lava nga na yena endlwini ya yena, hikuva u fihlile tintsumi leti hi ti rhumeke. 18Ntsena, loko mi ri n'wina, chavani leswo yila leswaku mi nga tshuki mi tiyirisa hi ku teka swo yila, mi nga yirisi mixaxa ya Israele, ni ku yi pfilunganya. 19Silivhere hinkwayo, ni nsuku hinkwawo, ni swibya hinkwaswo swa koporo ni swa nhumbu, swi ta hlawuleriwa Yehovha; swi ta nghena exumeni xa Yehovha.”
20Kavaloko tiko ri ba huwa, ni vaprista va yimba tinanga. Kuteloko tiko ri twile mpfumawulo wa nanga, ri ba huwa leyikulu, kutani rirhangu ri mbundzumuka ri wa ehansi, kutani tiko ri khandziya emutini, un'wana ni un'wana a kongoma emahlweni ka yena, kutani va teka muti. 21Va yirisa hinkwaswo leswi nga emutini, vavanuna ni vavasati ni lavantshwa, ni va khale, ni tihomu, ni tinyimpfu ni timbhongolo, va swi dlaya hi matlhari.
22Yoxuwa a ku eka vanhu lavambirhi lava kambeke tiko: “Yanani endlwini ya nghwavava, mi humesa kona nsati loyi ni vanhu hinkwavo va yena, hilaha mi n'wi hlambanyeleke hakona.” 23Kavaloko majaha, lawa ingi ma ri tinhlori, ma nghena, ma ya humesa Rahava ni tata wa yena, ni mana wa yena, ni vamakwavo, ni hinkwaswo leswi ngi swi ri swa yena: va humesa va yindlu ya yena hinkwavo kutani va va yisa ehandle ka mixaxa ya Israele. 24Kutani va hisa muti ni hinkwaswo leswi nga eka wona; ntsena va veka exumeni xa yindlu ya Yehovha silivhere, ni nsuku, ni swibya swa koporo ni swa nhumbu. 25Yoxuwa a hanyisa Rahava wa nghwavava, ni yindlu ya tata wa yena, ni hinkwaswo leswi ngi swi ri swa yena; kutani u akile exikarhi ka Israele ku fika namuntlha, hikuva u fihlile tintsumi leti Yoxuwa a nga ti rhuma ku kamba Yeriko.
26Enkarhini wolowo Yoxuwa a hlambanya, a ku: “Ku ta rhukaniwa emahlweni ka Yehovha, munhu la nga ta pfuxa muti lowu wa Yeriko; u ta aka masungulo ya wona ehenhla ka mativula ya yena, ni tinyangwa ta wona ehenhla ka xigumandzeni xa yena.” 27Yehovha a a ri na Yoxuwa, kutani ku twala ka yena a ku hangalaka etikweni hinkwaro.
