Ta nawu lowu sivelaka ku dya ngati.
1Yehovha a byela Muxe, a ku: 2“Byela Aroni, ni vana va yena, ni vana hinkwavo va Israele, u ku eka vona: ‘Hi lexi Yehovha a ndzi leriseke xona: 3Munhu un'wana ni un'wana wa yindlu ya Israele, kungakuloko a tlhava homu, kumbe xinyimpfana kumbe mbuti emixaxeni, hambi ku ri ehandle ka mixaxa, 4kutani a nga xi tisi enyangweni ya tabernakela ya nhlengeletano, ku xi humesela Yehovha emahlweni ka vukwetsimelo bya Yehovha, u ta vekeriwa nandzu wa ngati leyi: u halatile ngati, munhu loyi u ta susiwa exikarhi ka tiko ra yena. 5Hi leswaku vana va Israele va tisa timhamba leti va ti tlhavaka emananga eka muprista, emahlweni ka Yehovha, enyangweni ya tabernakela ya nhlengeletano, kutani va ti humesela Yehovha, ma ri magandzelo ya ku khensa. 6Muprista u ta chela ngati ealitarini ya Yehovha, enyangweni ya tabernakela ya nhlengeletano, kutani u ta hisa mafurha ri va risuna eka Yehovha. 7Va nga ha humesi magandzelo ya vona eka swikwembu leswi va oswanaka na swona. Wu va eka vona nawu lowu nga heriki etinxakeni ta tinxaka.’
8“U ta va byela, u ku: ‘Munhu un'wana ni un'wana wa yindlu ya Israele, hambi a ri wa valuveri lava akeke exikarhi ka vona, la humesaka holokosta, kumbe gandzelo, 9kutani a nga yi tisi enyangweni ya tabernakela ya nhlengeletano ku yi humesela Yehovha, munhu loyi u ta susiwa exikarhi ka varikwavo.
10“ ‘Munhu un'wana ni un'wana wa yindlu ya Israele, hambi a ri wa valuveri lava akeke exikarhi ka vona, kungakuloko a dyile ngati, hambi yi ri yihi ni yihi, ndzi ta n'wi languta hi vukari, ndzi va ndzi n'wi susa etikweni ra yena, 11hikuva moya wa nyama wu le ngatini. Ndzi mi nyikile yona ealitarini ku phahlela mimoya ya n'wina mhamba; hikuva hi yona ngati leyi phahlelaka moya mhamba. 12Hikwalaho ndzi byerile vana va Israele, ndzi ku: “Ku nga tshuki ku va ni munhu la dyaka ngati, na yena muluveri la tshamaka exikarhi ka n'wina, a nga tshuki a dya ngati.” 13Munhu un'wana ni un'wana wa vana va Israele, hambi wa valuveri lava tshamaka exikarhi ka vona, kungakuloko a khomile xiharhi eku hloteni hambi yi ri nyanyana leyi dyiwaka, u ta halata ngati ya yona, a yi seletela hi misava; 14hikuva moya wa nyama yin'wana ni yin'wana wu le ngatini ya yona. Hikwalaho ndzi byeleke vana va Israele, ndzi ku: “Mi nga tshuki mi dya ngati ya nyama, hambi yi ri yihi ni yihi, hikuva moya wa nyama yin'wana ni yin'wana, i ngati ya yona; mani na mani la dyaka yona u ta susiwa.”
15“ ‘Munhu un'wana ni un'wana la velekiweke etikweni, hambi a ri wa matiko, la dyeke xiharhi lexi feke kumbe leswi handzuriweke, u ta hlantswa tinguvu ta yena, a hlamba ematini; u ta va la yilaka ku fika nimadyambu, kutani u ta tenga. 16Kungakuloko a nga hlantswi tinguvu ta yena, a nga hlambi miri, u ta rhwala nandzu wa yena.’ ”
