Ta Aroni ni vana va yena loko va sungula ntirho wa vuprista.
1Siku ra ntlhanu na manharhu, Muxe a vitana Aroni ni vana va yena, ni vakulukumba va Israele, 2a ku eka Aroni: “Teka xinkuzana xa gandzelo ra nandzu, ni khuna ra holokosta, swi nga ri na xivati, u swi tlhavela Yehovha. 3Kutani u byela vana va Israele, u ku: ‘Tekani xiphongo xa gandzelo ra nandzu, ni rhole, ni xinyimpfana swa lembe rin'we, swi nga ri na xivati, swi va swa holokosta; 4ni nkunzi, ni khuna ra gandzelo ra ku khensa ku swi tlhavela Yehovha, ni nhlengo lowu nga pfuviwa hi mafurha; hikuva namuntlha Yehovha u ta tikombisa eka n'wina.’ ”
5Kavaloko va tisa emahlweni ka tabernakela ya nhlengeletano leswi lerisiweke hi Muxe; kutani nhlengeletano hinkwayo yi tshinela, yi yima emahlweni ka Yehovha. 6Muxe a ku: “Hi xona lexi Yehovha a mi leriseke xona; xi endleni, kutani ku kwetsima ka Yehovha ku ta mi humelela.” 7Muxe a ku eka Aroni: “Tshinela ekusuhi ni alitari, u humesa gandzelo ra nandzu, ni holokosta, u tiphahlela mhamba ya wena ni ya tiko; u ta humesa ni nhlengo wa tiko, u va phahlela mhamba hilaha Yehovha a leriseke hakona.”
8Aroni a tshinela ealitarini, a tlhava rhole ra gandzelo ra nandzu leri humeseriweke yena. 9Vana va Aroni va n'wi tisela ngati, a peta ritiho ra yena engatini a yi tota etimhondzweni ta alitari kutani a chela ngati ehansi ka alitari. 10A hisa mafurha ni tinswo, ni mpambana wa xivindzi, ehenhla ka alitari, swi ri swa gandzelo ra nandzu, hilaha Yehovha a leriseke Muxe hakona. 11Loko yi ri nyama ni dzovo, a swi hisa ehandle ka mixaxa.
12Kutani a tlhava xifuwo xa holokosta. Vana va Aroni va n'wi tisela ngati, a yi xuva ealitarini, ematlhelweni hinkwawo. 13Va n'wi tisela holokosta hi swirho swa yona, ni nhloko kutani a swi hisa ealitarini. 14A hlantswa marhumbu ni masondzo, a swi hisa ehenhla ka holokosta, ealitarini.
15Kavaloko a tisa nhlengo wa tiko. A teka xiphongo xa gandzelo ra nandzu lexi humeseriweke tiko a xi tlhava, a endla gandzelo ra nandzu ha xona, kukotisa mhamba yo sungula. 16Kutani a humesa holokosta, a yi humesa hi nawu wa yona. 17A humesa ni nhlengo; a nusa hi xandla xin'we, a swi hisa ealitarini ku engetela holokosta ya mixo.
18A tlhava ni nkunzi ni khuna, swi endleriwa tiko gandzelo ra ku khensa. Vana va Aroni va n'wi tisela ngati, a xuva alitari ha yona ematlhelweni hinkwawo. 19Va n'wi tisela ni mafurha ya nkunzi ni ya khuna, ni ncila ni mpambana, ni tinswo, ni mpambana wa xivindzi; 20va veka mafurha ehenhla ka swifuva, kutani a hisa mafurha ealitarini. 21Loko swi ri swifuva ni voko ra xinene, Aroni a swi ndziwita emahlweni ka Yehovha yi va nyiko leyi ndziwitiweke, hilaha Muxe a leriseke hakona.
22Kutani Aroni a tlakusa mavoko tlhelo ra tiko a ri katekisa; kuteloko a hetile gandzelo ra nandzu, ni holokosta, ni gandzelo ra ku khensa a xika ealitarini. 23Kutani Muxe na Aroni va nghena etabernakeleni ya nhlengeletano, kutani va huma, va katekisa tiko; ku kwetsima ka Yehovha ku vonakala eka tiko hinkwaro. 24Ndzilo wu huma emahlweni ka Yehovha, wu hisa holokosta, ni mafurha ealitarini; tiko hinkwaro ri wu vona, kutani va huwelela hi ku tsaka, va tiwisa ehansi hi mimombo ya vona.
