LUKA 6

₁Hi siku ra Savata leri vuriwaka lera vumbirhi eka lera ku sungula, Yesu a hundza exikarhi ka mavele kutani vadyondzisiwa va yena va tshova min'oko, va swoswa hi mandla, va dya. ₂Vafarisi van'wana va ku eka vona: “Mi endlela yini leswi nga faneriki ku endliwa hi Savata?” ₃Yesu a va hlamula, a ku: “Xana a mi hlayanga leswi nga endliwa hi Davhida siku a twaka ndlala ni lava ngi a ri na vona? ₄Hilaha a ngheneke endlwini ya Xikwembu, a teka swinkwa swa mhamba, a dya, a nyika ni lava ngi a ri na vona, hambi swi nga faneriki ku dyiwa hi vanhu, loko va nga ri vaprista ntsena.” ₅Kutani a ku eka vona: “N'wana wa Munhu u fuma na rona Savata.”

₆Hi siku rin'wana ra Savata, Yesu a nghena esinagogeni a dyondzisa; kutani munhu a a ri kona, loyi voko ra yena ra swinene ri khwanyaleke. ₇Vatsari ni Vafarisi va n'wi siya, va languta xana u ta n'wi hanyisa hi Savata, leswaku va kuma lexi va nga n'wi hehlaka ha xona. ₈Kambe a a tiva miehleketo ya vona, kutani a ku eka munhu wa voko ro khwanyala: “Pfuka, u yima exikarhi.” ₉A pfuka a yima. Yesu a ku eka vona: “Ndzi ta mi vutisa mhaka: Xana hi siku ra Savata ku lulame xihi, ku endla swinene, kumbe ku endla swo biha; ku hanyisa munhu, kumbe ku n'wi dlaya?” ₁₀Kavaloko a va rhalarhala hinkwavo a ku eka munhu loyi: “Tshambuluta voko ra wena”; a endlisa sweswo, kutani voko ra yena ri ololoka, ri va rinene tanihi lerin'wana. ₁₁Kwalaho va tala vukari, va kanela swin'we leswi va nga ta swi endla eka Yesu.

₁₂Emasikwini lawa Yesu a ya entshaveni ku ya khongela; kutani a tshama a khongela Xikwembu vusiku hinkwabyo. ₁₃Loko ri xile, a vitana vadyondzisiwa va yena, kutani a hlawula xikarhi ka vona lava khume na vambirhi; valavo a va thya vaapostola (varhumiwa). ₁₄I Simoni, loyi a n'wi thyaka Petro, na Andriya makwavo, na Yakobo, na Yohane, na Filipi, na Bartolomi, ₁₅na Matewu, na Tomasi, na Yakobo, n'wana Alfiya, na Simoni la nga thyiwa Muhiseki; ₁₆na Yuda makwa Yakobo, na Yudasi Iskariyota, la nga hundzuka muxengi.

₁₇Kuteloko a rhelele na vona entshaveni, a yima erivaleni, kutani vunyingi bya vadyondzisiwa va yena, ni vunyingi lebyikulu bya vanhu lava pfaka etikweni hinkwaro ra Yudiya, na Yerusalema, ni matlhelo ya Tiri na Sidoni, a va tile ku n'wi yingisa ni ku horisiwa emavabyini ya vona; ₁₈ni lava karhatiweke hi mimoya leyo biha, na vona a va horisiwa. ₁₉Vunyingi hinkwabyo a byi rhandza ku n'wi khumba, hikuva matimba a ma tshama ma huma eka yena, ma va horisa hinkwavo.

₂₀Kutani Yesu a tlakusa mahlo, a languta vadyondzisiwa va yena, a ku: “Mi katekile n'wina swisiwana, hikuva ku fuma ka Xikwembu ku le ka n'wina. ₂₁Mi katekile n'wina mi nga ni ndlala sweswi, hikuva mi ta xurhisiwa. Mi katekile n'wina mi rilaka sweswi, hikuva mi ta tsaka. ₂₂Mi ta va ni ku kateka siku vanhu va mi vengaka, va mi humesaka exikarhi ka vona, va mi rhuketelaka, ni loko va sandza vito ra n'wina tanihi loko ingi ri bihile, hikwalaho ka N'wana wa Munhu. ₂₃Emikarhini yoleyo, tsakani mi tsakisisa, hikuva hakelo ya n'wana yi ta va leyikulu etilweni naswona vatata wa vona va endlisile sweswo eka vaprofeta.

₂₄“Kambe mi ni khombo n'wina vafuwi, hikuva mi vonile ku chaveleriwa ka n'wina. ₂₅Mi ni khombo n'wina mi xurheke, hikuva mi ta va ni ndlala; mi ni khombo n'wina mi hlekaka sweswi, hikuva mi ta rila, mi va mi kolola. ₂₆Mi ni khombo n'wina siku vanhu hinkwavo va mi dzunisaka, hikuva vatata wa vona va endlisile sweswo eka vaprofeta va mavunwa.

₂₇“Kambe ndzi ri eka n'wina lava ndzi yingisaka: Rhandzani valala va n'wina, mi endla swinene eka lava mi vengaka. ₂₈Mi katekisa lava mi rhukanaka, mi khongelela lava mi pfukelaka matimba. ₂₉La ku phakataka rhama, u n'wi kangatela ni rin'wana; la ku tekelaka nguvu, u nga n'wi aleli ni xingubyana. ₃₀Nyika un'wana ni un'wana la kombelaka eka wena; ni loko munhu a ku tekela swa wena, u nga tshuki u swi kombela eka yena. ₃₁Leswi mi rhandzaka leswaku vanhu va mi endlisa xiswona, va endliseni xiswoleswo na n'wina. ₃₂Hikuva loko mi rhandza lava mi rhandzaka ntsena, ku khensiwa ka n'wina ku ta va kwihi xana? Kasi vadyohi na vona, va rhandza lava va va rhandzaka. ₃₃Kutani loko mi endla swinene eka lava mi endlaka swinene, ku khensiwa ka n'wina ku ta va kwihi xana? Kasi vadyohi, na vona, va endlisa sweswo. ₃₄Ni loko mi lombana ni lava mi tshembaka leswaku mi ta engeta mi teka eka vona, ku khensiwa ka n'wina ku ta va kwihi xana? Kasi vadyohi, na vona, va lombana ni vadyohi, va ta engeta va kuma leswi ringanaka swa vona. ₃₅Kambe n'wina, rhandzani valala va n'wina, mi endla vanhu swinene, mi lomba mi nga tshembi ku ta tlheriseriwa, kutani ku hakeriwa ka n'wina ku ta va lokukulu; mi ta va vana va La nge henhlahenhla, hikuva yena u ni tintswalo eka lava nga khensiki ni ka lavo biha. ₃₆Kutani sweswi mi va ni nsovo kukotisa leswi, Tata wa n'wina, na yena a nga ni nsovo.

₃₇“Kambe mi nga avanyisi leswaku mi nga ti avanyisiwa; mi nga vekeli van'wana milandzu, leswaku na n'wina mi nga ti vekeriwa milandzu; tsetselelanani, kutani mi ta tsetseleriwa. ₃₈Hananani, mi ta hananiwa; va ta mi nyika exifuveni hi mpimo lowukulu, lowu congiweke, lowu hlunguhliweke, lowu halakaka; hikuva ku ringanisa loku mi ringanisaka van'wana hakona, mi ta ringanisiwa hakona na n'wina.”

₃₉A engeta a va byela xifaniso, a ku: “Xana lowo fa mahlo a nga swi kota ku fambisa un'wana la feke mahlo xana? Xana a va nga weli ekheleni havambirhi xana? ₄₀Mudyondzisiwa a nga tlurisi hi vukulu mufundhisi wa yena; kambe mudyondzisiwa un'wana ni un'wana la hetisekeke u ta va tanihi mufundhisi wa yena.

₄₁“U langutela yini xilavi lexi nga le tihlweni ra makwenu, kasi a ku tsundzuki ntsandze lowu nga kona etihlweni ra wena? ₄₂Kumbe u nga vurisa ku yini eka makwenu, u ku: ‘Tshika, ndzi pfuta xilavi etihlweni ra wena,’ kasi wena a ku voni ntsandze lowu nga le tihlweni ra wena? N'wamanyunyu, rhanga u pfuta ntsandze lowu nga le tihlweni ra wena, hilaha u nga ta vona ku pfuta xilavi lexi nga le tihlweni ra makwenu.

₄₃“A ku na murhi lowunene lowu vekaka mihandzu leyo biha, ni loko wu ri murhi lowo biha lowu vekaka mihandzu leyo nandziha. ₄₄Kunene, murhi wun'wana ni wun'wana wu tiviwa hi mihandzu ya wona. Hikuva makuwa ma nga ka ma nga khiwi emitweni, ni vana va vhinya, va nga ka va nga khiwi eswigatlwini. ₄₅Munhu lonene u humesa leswinene exumeni lexinene lexi nga embilwini ya yena; munhu lowo biha u humesa leswo biha exumeni lexo biha xa mbilu ya yena; hikuva nomu wu vulavula hi leswi mbilu yi teleke swona.

₄₆“Xana mi ndzi vulela yini: ‘Hosi, Hosi,’ kasi a mi endli leswi ndzi mi byelaka swona? ₄₇Un'wana ni un'wana la taka eka mina, kutani a yingisa marito ya mina, a va a ma endla, ndzi ta mi ringanisela la fanaka na yena. ₄₈U fana ni munhu la akaka yindlu; yindlu leyi, ku nga te loko a ake masungulo, a cele khele, a yi sungula etambeni; kutani, kakuloko xihuhuri xi ta, ni loko boboma ri ba yindlu leyi, a yi tsekatsekanga, hikuva yi akiwile swinene. ₄₉Kambe la yingisaka, kutani a nga endli, a fana ni munhu la akeke yindlu ya yena esaveni, yi nga ri na masungulo; kungakuloko boboma ri yi ba, yi hatlisa ku wa, kutani ku lova ka yindlu leyi ku va lokukulu.”