MATEWU 14

₁Enkarhini wolowo, Heroda Mutetrarka, kuteloko a yingisile mpfumawulo wa Yesu, ₂a ku eka malandza ya yena: “Yeloyi i Yohane Mukhuvuri, u pfukile eku feni; hikwalaho matimba ya mahlori ma tirha hi yena.” ₃Hikuva Heroda a a khomile Yohane a n'wi boha, a n'wi hoxa ekhotsweni hikwalaho ka Herodiya, nsati wa Filipi, ndzisana ya yena; ₄hikuva Yohane a a ku eka yena: “A swi ku lulamelanga leswaku u n'wi teka.” ₅Kutani a a rhandza ku n'wi dlaya, kambe a chava vanhu hikuva a va ku, i muprofeta. ₆Kambe enkhubyeni wa siku ra ku tswariwa ka Heroda, n'wana Herodiya wa wanhwana a cina emahlweni ka vanhu a tsakisa Heroda; ₇kutani kwalaho a n'wi hlambanyela hi ku tiyisa a ku eka yena: “Ndzi ta ku nyika leswi u nga ta swi kombela, hambi yi va yini na yini.” ₈Kutani lo wanhwana, loko a susumetiwa hi mana wa yena, a ku: “Ndzi nyike sweswi enkambaneni nhloko ya Yohane Mukhuvuri.” ₉Kutani hosi yi khomiwa hi tingana; kambe leswi a hlambanyeke, ni hikwalaho ka lava tshameke eswakudyeni na yena, a lerisa leswaku a nyikiwa yona, ₁₀a rhuma vanhu va ya tsema nhloko ya Yohane ekhotsweni. ₁₁Kutani nhloko ya yena yi nehiwa enkambaneni, va nyika wanhwana; yena a yi yisa eka mana wa yena. ₁₂Kutani vadyondzisiwa va Yohane va ta teka ntsumbu wa yena, va wu lahla; va ya byela Yesu.

₁₃Yesu loko a twile timhaka leti, a suka kwalaho hi byatso, a ya emananga, etlhelweni. Kuteloko ntshungu wu swi twile, wu n'wi landzela kona hi milenge, wu huma emitini. ₁₄Yesu, kakuloko a huma, a vona mitshungu leyikulu, a va twela vusiwana, a hanyisa lava vabyaka exikarhi ka vona.

₁₅Kute nimadyambu, vadyondzisiwa va yena va n'wi tshinelela, va ku: “Laha i mananga, ni dyambu ri perile, tlherisa mitshungu, va tiyela emitini va tixavela swakudya.” ₁₆Kambe Yesu a ku eka vona: “A va fanelanga ku suka, va fihluteni mi ri n'wina.” ₁₇Va ku eka yena: “A hi na nchumu la, loko swi nga ri swinkwa swa ntlhanu ntsena, ni tinhlampfi timbirhi.” ₁₈A ku: “Ndzi tiseleni swona la.” ₁₉Kuteloko a va lerisile ku tshamisisa vunyingi ehansi, ebyanyini, a teka swinkwa leswa ntlhanu, ni tinhlampfi timbirhi, a langutisa henhla, a khensa. Kutani a phema swinkwa a nyika vadyondzisiwa va yena, kutani vadyondzisiwa va avela ntshungu. ₂₀Kutani va dya hinkwavo, va xurha; kambe ku tekiwa mahlanhla lama nga sala, ma tata swirhundzu swa khume na swimbirhi. ₂₁Kambe lava dyeke a va ri vanhu lava lavaka ku va ntlhanu wa makume ya madzana, vavasati ni vana va nga hlayiwi.

₂₂Kutani Yesu a sindzisa vadyondzisiwa va yena leswaku va nghena ebyatsweni, va n'wi rhangela, va pelela entsungeni wa hase, loko yena a ri karhi a tlherisa mitshungu. ₂₃Kuteloko a tlherisile mitshungu, a tlhandlukela entshaveni ku ya khongela hitlhelo; kutani a peleriwa hi dyambu a ha ri kwalaho a le swakwe. ₂₄Byatso, byona, a byi ri exikarhi ka lwandle, byi tsekatsekisiwa hi magandlati ya lwandle, hikuva moya a wu va alela. ₂₅Kambe hi nkarhi wa vumune wa vusiku, Yesu a ta eka vona, a famba ehenhla ka mati. ₂₆Kakuloko vadyondzisiwa va n'wi vona a famba ehenhla ka mati, va tshuka, va ku: “I xipuku,” kutani va huwelela hi ku chava. ₂₇Kambe Yesu a hatlisa a vulavula na vona, a ku: “Tiyisani timbilu, hi mina, mi nga chaveni.” ₂₈Kutani Petro a n'wi hlamula, a ku: “Hosi, loko u ri wena, vula leswaku ndzi ta kwalaho ka wena ehenhla ka mati.” ₂₉Yesu a ku eka yena: “Tana.” Kutani Petro a huma ebyatsweni, a famba ehenhla ka mati, a ta eka Yesu. ₃₀Kambe loko a vona mheho yi kurile, a tshuka, kakuloko a sungula ku nwela, a ba huwa, a ku: “Hosi, ndzi ponise.” ₃₁Yesu a hatlisa a tshambuluta voko, a n'wi khoma, a ku eka yena: “Munhu wa ku pfumela lokutsongo, u kanakanisile ha yini?” ₃₂Kuteloko va nghene ebyatsweni, mheho yi miyela. ₃₃Kutani lava ngi va ri ebyatsweni va n'wi tshinelela, va n'wi khinsamela, va ku: “Kunene u N'wana wa Xikwembu.”

₃₄Kuteloko va pelerile entsungeni, va nghena etikweni ra Genesareta. ₃₅Vanhu va kona loko va tiva leswaku hi yena, va rhumela ematlhelweni hinkwawo ya kona leswaku va n'wi tisela hinkwavo lava vabyaka. ₃₆Kutani va n'wi khongela leswaku a va pfumelela, hambi ku ri ku khumba mahlangula ya nguvu ya yena ntsena; kutani hinkwavo lava nga ma khumba va hanyisiwa.