MATEWU 16

₁Kutani Vafarisi ni Vasaduki va ta eka yena ku n'wi ringa, va kombela leswaku a va kombisa masingita lama humaka etilweni. ₂Kambe yena a va hlamula, a ku: “Loko ri perile, mi ri: ‘Ri ta xa, hikuva tilo ri tshwukile,’ ₃kutani nimixo mi ri: ‘Ri ta pfuma hikuva tilo ri tshwukile, ri endle ntima.’ Vakanganyisi, mi tiva swinene ku hundzuka ka nghohe ya tilo, kasi mi tsandzeka ha yini ku tsundzuka swikombiso swa mikarhi leyi xana? ₄Rixaka leri ra lunya, ni ra vuoswi, ri kombela masingita; kambe ri nga ka ri nga nyikiwi wona, loko xi nga ri xikombiso xa muprofeta Yonasi.” Kutani a va siya, a tifambela.

₅Vadyondzisiwa loko va pelela entsungeni, a va rivarile ku teka swinkwa. ₆Yesu a ku eka vona: “Tivoneleni, mi chava comela xa Vafarisi ni xa Vasaduki.” ₇Kutani va kanela va ku, kumbe hi leswi hi nga tekangiki swinkwa. ₈Yesu, kuteloko a swi tivile, a ku eka vona: “Vanhu va ku pfumela lokutsongo, xana mi kanetana ha yini exikarhi ka n'wina hi leswi mi nga tekangiki swinkwa xana? ₉Xana a mi si va ni ku twisisa a mi tsundzuki ha yini swinkwa swa ntlhanu, swa vanhu va madzana ya ntlhanu wa makume, ni vungani bya swirhundzu leswi mi nga swi teka xana? ₁₀Ni swinkwa swa ntlhanu na swimbirhi swa vanhu va madzana ya ntlhanu wa makume, ni vungani bya swirhundzu leswi mi nga swi tata xana? ₁₁A mi twisisi ha yini leswaku a ndzi vulanga xinkwa, loko ndzi ku: ‘Tivoneleni ka comela xa Vafarisi ni xa Vasaduki!’ ” ₁₂Hilaha va twisisaka leswaku comela lexi a nga te: “Xi chaveni”; a hi lexa xinkwa, kambe a xi ri xa tidyondzo ta Vafarisi ni ta Vasaduki.

₁₃Kuteloko Yesu a fikile etikweni ra Khezariya wa Filipi, a vutisa vadyondzisiwa va yena, a ku: “Vona vanhu va ri N'wana wa Munhu, i mani-ke?” ₁₄Va ku eka yena: “Van'wana va ri: u Yohane Mukhuvuri; van'wana va ri: u Eliya; van'wana va ri: u Yeremiya kumbe un'wana wa vaprofeta.” ₁₅A ku eka vona: “N'wina-ke, mi ri ndzi mani?” ₁₆Kutani Simoni Petro a angula, a ku: “U Kriste, N'wana wa Xikwembu lexi hanyaka.” ₁₇Yesu a hlamula, a ku eka yena: “U katekile, Simoni n'wana Yona, hikuva a hi nyama ni ngati leswi ku pfuleteleke sweswo, kambe i Tatana wa le tilweni. ₁₈Kambe ndzi ri eka wena: U Petro (hileswaku ribye), ehenhla ka ribye rero, ndzi ta aka kereke ya mina, kutani tinyangwa ta xivandla xa vafi ti nga ka ti nga yi hluli. ₁₉Ndzi ta ku nyika swilotlelo swa ku fuma ka matilo, kutani hinkwaswo leswi u nga ta swi boha la emisaveni, swi ta bohiwa ni le tilweni, ni leswi u nga ta swi tshunxa la emisaveni, swi ta tshunxiwa ni le tilweni.” ₂₀Kutani a laya vadyondzisiwa va yena, leswaku va nga tshuki va byela munhu leswaku yena Yesu i Kriste.

₂₁Kavaloko Yesu a sungula ku hlamusela vadyondzisiwa va yena leswaku a fanele ku ya Yerusalema, a ya twisiwa ku vaviseka lokukulu hi vakulukumba, ni vaprista lavakulu, ni vatsari, a dlawa, a tlhela a pfuka hi siku ra vunharhu. ₂₂Kambe Petro a n'wi tekela hitlhelo, a sungula ku n'wi vulavula, a ku eka yena: “Hosi, Xikwembu a xi ku twele vusiwana, leswaku swi nga ka swi nga ku humeleli.” ₂₃Yesu a rhendzelekela eka yena, a ku eka Petro: “Suka eka mina Satana, wa ndzi khunguvanyisa, hikuva a ku yingisi swa Xikwembu, u twa swa vanhu ntsena.”

₂₄Yesu a engeta a ku eka vadyondzisiwa va yena: “Kungakuloko munhu a rhandza ku ndzi landza, a a titshike, a tirhwalela xihambano xa yena, a ndzi landza hi le ndzhaku. ₂₅Hikuva un'wana ni un'wana la rhandzaka ku tiponisa vutomi bya yena, u ta lahlekeriwa hi byona; kambe un'wana ni un'wana la lahlekelaka hi vutomi bya yena hikwalaho ka mina, u ta byi kuma. ₂₆Hikuva hambi munhu a nga fuwa misava hinkwayo, loko a lahlekeriwa hi moya wa yena, swi ta va swi n'wi pfune yini-ke? Kumbe munhu u ta humesa yini ku xava moya wa yena-ke? ₂₇Hikuva N'wana wa Munhu u ta ta hi ku kwetsima ka Tata wa yena, ni tintsumi ta yena, kutani, enkarhini wolowo, u ta nyika un'wana ni un'wana hi mitirho ya yena. ₂₈Ndzi vurisile ndzi ri eka n'wina: Van'wana va kona eka lava nga kwala, lava nga ta ka va nga nantswi rifu, va nga si vona N'wana wa Munhu a ta eku fumeni ka yena.”