MATEWU 26

₁Kuteloko Yesu a hetile ku vulavula timhaka leto hinkwato, a ku eka vadyondzisiwa va yena: ₂“Ma swi tiva leswaku loko ku hundzile masiku mambirhi, Paseka yi ta va kona, kutani N'wana wa Munhu u ta nyiketiwa ku vambiwa.”

₃Enkarhini wolowo, vaprista lavakulu ni vatsari, ni vakulukumba va tiko, va hlengeletana ehubyeni ya muprista lonkulu la vuriwaka Kayafasi, ₄va kanela makungu ya ku khoma Yesu hi vutlhari, va ta n'wi dlaya. ₅Kambe va ku: “Swi nga vi hi siku ra nkhuvo, dzolonga ri nga ti humelela exikarhi ka tiko.”

₆Kuteloko a ri eBetaniya, endlwini ya Simoni lowa nhlokonho, ₇ku ta eka Yesu wansati la tamelaka ximbitana xa alabastera, xi tele mafurha ya nxavo lowukulu, a ma chela enhlokweni ya yena loko a tshame eswakudyeni. ₈Vadyondzisiwa va yena, loko va swi vona, va hlunama, va ku: ₉“Mafurha lawa ma lahleriwa yini? A ma ta xava mali leyo tala, yi nyikiwa swisiwana.” ₁₀Kambe Yesu a swi tiva, kutani a ku eka vona: “Mi vavisela yini wansati loyi kasi u ndzi tirherile ntirho lowunene; ₁₁hikuva loko swi ri swisiwana, mi ta va na swona hi masiku, kambe mina, mi nga ka mi nga vi na mina hi masiku hinkwawo. ₁₂Hikuva loko a cherile mafurha lawa emirini wa mina, u swi endlele ku lahliwa ka mina. ₁₃Ndzi vurisile ndzi ri eka n'wina: Hinkwako la emisaveni laha Evhangeli leyi yi nga ta vuriwa kona, lexi a xi endleke xi ta vuriwa, na xona, leswaku a anakanyiwa ha xona.”

₁₄Kutani un'wana wa lava khume na vambirhi, la vuriwaka Yudasi Iskariyota, a tiyela eka vaprista lavakulu, ₁₅a ku: “Mi ta ndzi nyika yini, na mina ndzi ta mi nyiketa yena?” Kutani va n'wi hlayela mali ya makume manharhu. ₁₆Kava kona a sungulaka ku lava nkarhi wa ku va nyiketa yena.

₁₇Hi siku leri sungulaka nkhuvo wa swinkwa leswo kala comela, vadyondzisiwa va ta eka Yesu, va ku: “Hi kwihi laha u rhandzaka leswaku hi ya ku lunghisela Paseka, laha u nga yi dyelaka kona.” ₁₈A ku: “Yanani emutini, eka manyana, mi ku eka yena: Mufundhisi u ri: ‘Nkarhi wa mina wu kusuhi; ndzi ta endla Paseka eka wena kun'we ni vadyondzisiwa va mina.’ ”

₁₉Kutani vadyondzisiwa va endla hilaha Yesu a va leriseke hakona, va lunghisa Paseka.

₂₀Hi nkarhi wa madyambu, a tshama eswakudyeni ni lava khume na vambirhi. ₂₁Kakuloko va ha dya, a ku eka vona: “Kunene, ndzi ri eka n'wina: Un'wana wa n'wina u ta ndzi xenga.” ₂₂Kwalaho va khomiwa hi tingana ngopfu; kutani un'wana ni un'wana a sungula ku n'wi vutisa, a ku: “Hosi, hi mina xana?” ₂₃A hlamula, a ku: “La ngheniseke voko na mina enkambaneni, hi yena la nga ta ndzi xenga. ₂₄Loko a ri N'wana wa Munhu, u tifambela hilaha ku tsariweke ehenhla ka yena hakona, kambe u ni khombo munhu yeloyi N'wana wa Munhu a xengiwaka hi yena; ingi swi sasekile loko munhu loyi a nga velekiwanga.”

₂₅Kutani Yudasi la n'wi xengaka a hlamula, a ku: “Xana hi mina, Rabi?” Yesu a ku eka yena: “U vula swona.”

₂₆Va ko va ha dya, Yesu a teka xinkwa, kuteloko a khensile, a xi phema, a nyika vadyondzisiwa va yena, a ku: “Tekani mi dya, leswi i miri wa mina.” ₂₇A teka ni xinwelo, kutani a khensa, a va nyika xona, a ku: “Nwelani eka xona hinkwenu; ₂₈hikuva lexi, i ngati ya mina ya ntwanano lowuntshwa, leyi halateriwaka lavo tala eku rivaleriweni ka swidyoho. ₂₉Kambe ndzi ri eka n'wina: Ku sungula sweswi, a ndzi nga ha nwi lexi velekiwaka hi vhinya, ku ko ku fika siku leri ndzi nga ta xi nwa na n'wina xi ri xintshwa, eku fumeni ka Tatana.”

₃₀Kuteloko va yimbelerile tinsimu, va ya eNtshaveni ya Mitlhwari. ₃₁Kutani Yesu a ku eka vona: “Mi ta khunguvanyeka hinkwenu eka mina vusiku lebyi, hikuva ku tsariwile leswaku: ‘Ndzi ta ba murisi, kutani tinyimpfu ta ntlhambi ti ta hangalaka.’ ₃₂Kambe kutakuloko ndzi pfukile, ndzi ta mi rhangela emahlweni ku ya eGaleliya.” ₃₃Kutani Petro a hlamula, a ku eka yena: “Hambi hinkwavo va nga khunguvanyeka eka wena, mina ndzi nga ka ndzi nga khunguvanyeki ni switsongo.” ₃₄Yesu a ku eka yena: “Kunene, ndzi ri eka wena: Ha byona vusiku lebyi, nkuku wu nga si ringa, u ta va u ndzi landzurile kanharhu.” ₃₅Petro a ku eka yena: “Hambiloko ndzi fanele ku fa na wena, ndzi nga ka ndzi nga ku landzuri.” Vadyondzisiwa hinkwavo va vurisa sweswo, na vona.

₃₆Kutani Yesu a ya na vona exivandleni lexi vuriwaka Getsemane, a ku eka vadyondzisiwa va yena: “Tshamisani kwala, ndza ha ya lahaya ndzi ya khongela.” ₃₇A teka na yena Petro ni vana lavambirhi va Zebediya, kutani a sungula ku khomiwa hi gome ni ku kanakana lokukulu. ₃₈A ku eka vona: “Moya wa mina wu khomiwa hi gome ra ku fa; salani kwala, mi hiteka na mina.” ₃₉Kutani a ya kulenyana, a wela ehansi hi mombo, a khongela, a ku: “Tatana loko ingi swi nga endleka leswaku xinwelo lexi xi hundza ekule na mina! Kambe ku nga tshuki ku endliwa ku rhandza ka mina, a ku endliwe ku rhandza ka wena.”

₄₀A vuya eka vadyondzisiwa va yena, a va kuma va khudzehela a ku eka Petro: “Mi tsandzekile ha yini ku hiteka na mina nkarhi wu ri wun'we xana? ₄₁Hitekani, mi khongela mi nga ti nghena eku ringiweni, hikuva moya wu ni mapfundzu, kambe nyama yi tsanile.”

₄₂Kutani a tlhela a ya ra vumbirhi, a khongela, a ku: “Tatana, loko swi nga ka swi nga endleki leswaku xinwelo lexi xi hundza ekule na mina, ndzi nga nweri eka xona, a ku endliwe ku rhandza ka wena!” ₄₃Kuteloko a tlhelele eka vona, a va kuma va etlele kambe, hikuva mahlo ya vona a ma tika.

₄₄Kutani a va siya, a vuyela a ya khongela ra vunharhu, a vulavula kukotisa eku sunguleni. ₄₅Kutani a tlhela a ya eka vadyondzisiwa va yena, a ku eka vona: “Etlelani sweswi, mi wisa! Vonani, nkarhi wu fikile, N'wana wa Munhu u ta nyiketiwa emavokweni ya vadyohi. ₄₆Pfukani, a hi yeni, vonani, la ndzi xengaka u kusuhi.”

₄₇A ku a ha vulavula, hi nomu lowu, Yudasi, un'wana wa lava khume na vambirhi a humelela a ri ni ntlawa lowukulu, wu ri ni timpanga ni tinhonga, wu rhumiwile hi vaprista lavakulu ni vakulukumba va tiko. ₄₈Muxengi a a va nyikile xikombiso, a ku: “Yeloyi ndzi nga ta n'wi ntswontswa, hi yena, n'wi khomeni.” ₄₉Kutani hi nomu lowu, a tshinela eka Yesu, a ku: “Xewani Rabi,” kutani a n'wi ntswontswa. ₅₀Yesu a ku eka yena: “U tele yini halenu, nakulorhi?” Kutani va n'wi tshinelela, va yisa mavoko eka Yesu, va n'wi khoma.

₅₁Kutani un'wana wa lava ngi va ri na Yesu, a tshambuluta voko, a hlomula ripanga ra yena, a tsema nandza wa muprista lonkulu, a n'wi pulukanya ndleve. ₅₂Kutani Yesu a ku eka yena: “Tlherisa ripanga ra wena enkotlotweni wa rona, hikuva hinkwavo lava khomaka tlhari va ta dlawa hi tlhari. ₅₃Xana u ehleketa leswaku ndzi nga tsandzeka ku khongela Tatana sweswi, a ta ndzi nyika mavandla ya tintsumi ya khume na mambirhi ni lama tlurisaka? ₅₄Kambe Matsalwa ma ta endlakarisa ku yini, lama vulaka leswaku swi fanekele ku humelela sweswo.”

₅₅Enkarhini wolowo. Yesu a ku eka vunyingi: “Mi humile ku ta ndzi khoma, mi ri ni timpanga ni tinhonga, kukotisa loko ndzi ri khamba, a ndzi ri karhi ndzi tshama na n'wina hi masiku, ndzi dyondzisa etempeleni, a mi ndzi khomanga. ₅₆Kambe leswo hinkwaswo swi humelele leswaku Matsalwa ya vaprofeta ma hetiseka.” Kwalaho vadyondzisiwa hinkwavo va n'wi siya, va tsutsuma, va chava.

₅₇Lava nga khoma Yesu va n'wi yisa eka Kayafasi, muprista lonkulu, laha vatsari ni vakulukumba a va hlengeletanile kona. ₅₈Petro a n'wi landzela a ri kule, a fika ehubyeni ya muprista lonkulu; kuteloko a nghene kona, a tshamisa ni malandza a ta vona ku hela ka swona. ₅₉Kutani vaprista lavakulu, ni huvo hinkwayo ya Sanedri va lava vumbhoni bya mavunwa ehenhla ka Yesu leswaku va ta n'wi dlaya; ₆₀kambe a va byi kumanga; hambi ku humelele timbhoni ta mavunwa leto tala, a va kumanga mhaka leyi nga yona. Kambe eku heteleleni, ku humelela timbhoni timbirhi leto hemba, ti ku: ₆₁“Loyi u vurile a ku: ‘Ndzi ni matimba ya ku hlanhla tempele ya Xikwembu ndzi va ndzi yi pfuxa hi masiku manharhu.’ ” ₆₂Kutani muprista lonkulu a yima a ku eka yena: “A ku hlamuri nchumu xana? Hi yihi mhaka leyi va ku hehlaka ha yona xana?” Kambe Yesu a miyela.

₆₃Kambe muprista lonkulu a engeta a vulavula, a ku eka yena: “Ndzi ku hlambanyisa hi Xikwembu lexi hanyaka, leswaku u hi byela swinene xana u Kriste, N'wana wa Xikwembu-ke?”

₆₄Yesu a ku eka yena: “U vula swona; kambe ndzi ri eka n'wina: Ku sungula sweswi, mi ta vona N'wana wa Munhu a tshamisile evokweni ra xinene ra matimba ya Xikwembu, a ta hi mapapa ya le tilweni.”

₆₅Kutani muprista lonkulu a handzula tinguvu ta yena, a ku: “U sandzile Xikwembu; ha ha tilavela yini timbhoni? Vonani, mi yingisile sweswi, ku sandza ka yena. N'wina mi ri yini?” ₆₆Va hlamula, va ku: “U fanele hi rifu.” ₆₇Kutani va n'wi tshwutela hi marhi emahlweni, va n'wi ba hi xibakela, van'wana va n'wi ba hi tinhonga, va ku: ₆₈“Kriste, hi bvumbhele la ku beke.”

₆₉Kambe Petro a a tshamile ehandle exivaveni; kutani nandza un'wana wa wansati a ta eka yena, a ku: “Na wena a wu ri na Yesu wa Galeliya.” ₇₀Kambe yena a landzula emahlweni ka hinkwavo, a ku: “A ndzi tivi lexi u xi vulaka.” ₇₁Kuteloko a ha ku suka, a ya enyangweni, un'wana a n'wi vona a ku eka lava ngi va ri kwalaho: “Na yena loyi, a a ri na Yesu wa Nazareta.” ₇₂A tlhela a kaneta hi ku hlambanya, a ku: “Munhu yeloyi, a ndzi n'wi tivi.” ₇₃Ku nga ri kungani, lava ngi va yime kwalaho va tshinela, va ku eka Petro: “Kunene, na wena, u wa vona, hikuva ku vulavula ka wena ka ku kombisa.” ₇₄Kutani a sungula ku hlambanya, a tiyisa, a ku: “Munhu yeloyi a ndzi n'wi tivi.” Hi nomu lowu, nkuku wu ringa. ₇₅Kwalaho Petro a anakanya rito ra Yesu hilaha a nga te eka yena: “Nkuku wu nga si ringa, u ta va u ndzi landzurile kanharhu.” Kutani a humela ehandle, a ya rila hi xiviti.