MATEWU 27

₁Kuteloko byi xile, vaprista hinkwavo ni vakulukumba va tiko va kanela ku dlaya Yesu. ₂Kuteloko va n'wi bohile va famba na yena, va ya n'wi nyiketa hosi Pontiyo Pilato. ₃Kutani Yudasi la nga n'wi xenga loko a vona leswaku Yesu u avanyisiwile, a va ni tingana, kutani a tlherisa mali ya makume manharhu eka vaprista lavakulu, ₄a ku eka vona: “Ndzi dyohile hi ku xenga ngati leyi nga riki na nandzu.” Va ku: “Swi na yini ka hina? Tilangutele u ri wena kwalaho.” ₅Kavaloko a cukumeta mali etempeleni, a suka a ya tisunga. ₆Kutani vaprista lavakulu va teka mali leyi, va ku: “A swi fanelanga leswaku yi nghenisiwa enhlengweni wa tempele, hikuva i nxavo wa ngati.” ₇Kuteloko va kanerile va xava ha yona nsimu ya muvumbi ku lahlela kona vamatiko. ₈Hikwalaho nsimu leyi yi vuriwaka Nsimu ya Ngati, ni namuntlha. ₉Hilaha ku hetisekeke leswi vuriweke hi muprofeta Yeremiya, loko a te: “Va tekile mali ya makume manharhu, wu ri nxavo wa la ringanisiweke, ni loyi vana va Israele va n'wi ringaniseke, ₁₀va yi humesile ku xava nsimu ya muvumbi, hilaha Hosi yi nga ndzi lerisa hakona.”

₁₁Yesu a yima emahlweni ka hosi; kutani hosi yi n'wi vutisa, yi ku: “Xana u hosi ya Vayuda xana?” Yesu a ku eka yena: “U vula swona.” ₁₂Kutani, hambi a hehliwa hi vaprista lavakulu ni vakulukumba, a nga hlamulanga nchumu. ₁₃Kutani Pilato a ku eka yena: “Xana a wu twi loko va ku hehla swonghasi xana?” ₁₄Kambe a nga hlamulanga rito ni rin'we; hosi yi va yi hlamala ngopfu.

₁₅A wu ri mukhuva wa hosi hi nkhuvo ku tshunxela tiko mubohiwa un'wana loyi va n'wi rhandzaka. ₁₆Enkarhini wolowo a ku ri ni mubohiwa un'wana la twaleke, la vuriwaka Barabasi. Kuteloko va hlengeletene. ₁₇Pilato a ku eka vona: “Mi rhandza loko ndzi mi tshunxela wihi, hambi Barabasi, kumbe Yesu, la vuriwaka Kriste?” ₁₈Hikuva a a swi tiva leswaku va n'wi nyikete yena hi mona.

₁₉Kuteloko a tshamile exitshan'weni xa ku avanyisa, nsati wa yena a rhumela eka yena, a ku: “U nga tshuki u va ni mhaka, hambi yi ri yin'we, ni munhu loyi wo lulama, hikuva ndzi twile ku vaviseka lokukulu enorhweni hikwalaho ka yena.”

₂₀Kambe vaprista lavakulu ni vakulukumba va hlohlotela vunyingi leswaku va kombela Barabasi, Yesu, yena a dlawa. ₂₁Hosi yi tlhela yi vulavula, yi ku eka vona: “Mi rhandza leswaku ndzi mi tshunxela wihi eka lavambirhi lava?” Va ku: “Barabasi.” ₂₂Pilato a engeta a ku eka vona: “Kambe Yesu, la vuriwaka Kriste, ndzi ta endla yini ha yena-ke?” Hinkwavo va ku: “A a vambiwe.” ₂₃Kutani hosi yi ku: “Xana u onhile yini-ke?” Kambe va huwelela hi matimba ku tlurisa, va ku: “A a vambiwe.”

₂₄Pilato, loko a vona leswaku a nga ha pfuni nchumu, hikuva dzolonga a ri engeteleka, a teka mati, a hlamba mandla emahlweni ka ntshungu, a ku: “A ndzi na nandzu engatini ya munhu loyi la lulameke, tilanguteleni mi ri n'wina.” ₂₅Kutani tiko hinkwaro ri hlamula, ri ku: “Ngati ya yena a yi ve ehenhla ka hina ni le henhla ka vana va hina.” ₂₆Kutani a va tshunxela Barabasi; loko a ri Yesu, kuteloko va n'wi xupurile, a n'wi nyiketa leswaku a vambiwa.

₂₇Kutani masocha ya hosi ma yisa Yesu endlwini ya vuhosi, ma n'wi hlengeletela ntlawa hinkwawo wa wona; ₂₈kutani va n'wi susa tinguvu, va n'wi ambexa nguvu ya xivunguvungu. ₂₉Kutani va luka harhi ya mitwa, va n'wi tlhandleka enhlokweni, va n'wi khomisa rihlanga evokweni ra xinene; kutani va khinsama hi matsolo emahlweni ka yena, va n'wi tseketsela, va ku: “Xewani, hosi ya Vayuda.” ₃₀Va n'wi tshwutela hi marhi, va teka rihlanga, va n'wi ba nhloko ha rona. ₃₁Kuteloko va n'wi tseketserile va n'wi funungula nguvu, va n'wi ambexa tinguvu ta yena, va n'wi yisa ku ya n'wi vamba.

₃₂Kuteloko va humile, va kuma wanuna wa Kirene, la vuriwaka Simoni, va n'wi byisa leswaku a rhwala xihambano xa Yesu. ₃₃Kuteloko va fikile exivandleni lexi vuriwaka Gologota, hileswaku xitsunga xa ripala, ₃₄va n'wi nyika ntsuvi lowu hlanganisiweke ni nyongwa leswaku a nwa kambe loko a nantswile, a ala ku nwa.

₃₅Kuteloko va n'wi vambile va pambulelana tinguvu ta yena, va ti hlahluva hi vuhlolotwana, leswaku ku endlakala lexi nga vuriwa hi muprofeta la nga te: “Va avelane mikhancu ya mina, ni nguvu ya mina, va yi hlahluva hi vuhlolotwana.” ₃₆Kutani va tshamisa, va n'wi langutela kwalaho. ₃₇Va nameka ehenhla ka nhloko ya yena papila ra nandzu wa yena leri nge: LOYI I YESU, HOSI YA VAYUDA.

₃₈Swidyohi swimbirhi swi vambiwe na yena, xin'wana evokweni ra xinene, xin'wana eka lera ximatsi. ₃₉Lava hundzaka va n'wi tseketsela, va n'wi nikinika tinhloko, va ku: ₄₀“Wena la hlanhlaka tempele, u ku u ta yi pfuxa hi masiku manharhu, tihanyise-ke! Loko u ri N'wana wa Xikwembu xika la exihambanweni!” ₄₁Hi mukhuva wolowo, na vona vaprista lavakulu, va n'wi tseketsela, va ri ni vatsari ni vakulukumba, va ku: ₄₂“U hanyisile van'wana, kutani u hluleka ku tihanyisa! Loko a ri yena hosi ya Israele, a a xike sweswi exihambanweni, hi ta pfumela eka yena. ₄₃U tshembile Xikwembu; a xi n'wi lwele sweswi, loko xi n'wi tsakela, hikuva u te: ‘Ndzi N'wana wa Xikwembu.’ ” ₄₄Ni swidyohi leswi vambiweke na yena, swi n'wi tseketsela sweswo na swona.

₄₅Hi nkarhi wa ntlhanu na wun'we, munyama wu va kona emisaveni hinkwayo ku fikela nkarhi wa ntlhanu na mune. ₄₆Kuteloko ku lavile ku va nkarhi wa ntlhanu na mune Yesu a huwelela hi rito lerikulu, a ku: “Eli, Eli, lama sabaktani”; hileswaku: “Xikwembu xanga, Xikwembu xanga u ndzi tshikele yini?” ₄₇Van'wana lava ngi va ri kwalaho, loko va n'wi twa, va ku: “U vitana Eliya.” ₄₈Kutani un'wana wa vona a tsutsuma, a ya teka xikhuvi a xi tata hi ntsuvi a xi tlhoma erihlangeni, a n'wi nyika a nwa. ₄₉Kambe van'wana va ku: “Tshika, hi ta vona loko kumbe Eliya a ta ta n'wi ponisa.”

₅₀Kambe Yesu a tlhela a huwelela hi rito lerikulu, a nyiketa moya.

₅₁Kutani vonani, nguvu ya Tempele yi handzuka hi le xikarhi, ku sungula ehenhla, ku ya fika ehansi; misava yi tsekatseka, maribye ma pandzeka, ni masirha ma pfuleka; ₅₂kutani mitsumbu ya lavo tala ya vakwetsimi lava etleleke va pfuka; ₅₃kuteloko va hume emasirheni, endzhaku ka ku pfuka ka yena, va nghena emutini lowu hlawuriweke va voniwa hi lavo tala.

₅₄Kutani ndhuna ya dzana ni lava ngi va ri na yona, lava languteleke Yesu, loko va vona ku tsekatseka ka misava ni leswi humeleleke va tshuka ngopfu, va ku: “Loyi a a ri N'wana wa Xikwembu kunene.”

₅₅Vavasati lavo tala a va ri kwalaho va languta va ri ekule va ri lava nga n'wi landzela loko a huma eGaleliya, lava n'wi tirheleke; ₅₆exikarhi ka vona, a ku ri na Mariya wa Magadala, na Mariya, mana wa Yakobo na Yose, ni mana wa vana va Zebediya.

₅₇Kuteloko ri perile, ku ta munhu la fuweke wa Arimatiya, vito ra yena a a ri Yosefa, na yena a a ri mudyondzisiwa wa Yesu; ₅₈a ya eka Pilato a kombela ntsumbu wa Yesu; kutani Pilato a lerisa leswaku va n'wi nyika wona. ₅₉Kuteloko Yosefa a wu tekile, a wu phutsela hi nguvu leyo basa, ₆₀a wu veka esirheni ra yena lerintshwa, leri a nga ri vatla eribyeni, kuteloko a vumbuluxile ribye lerikulu enyangweni ya sirha, a tifambela. ₆₁Kutani Mariya wa Magadala a a ri kwalaho na Mariya lo un'wana, va tshamile va langutene ni sirha.

₆₂Loko ri xa, hi siku leri tlhandlamaka ra ku lunghisa, vaprista lavakulu ni Vafarisi va hlengeletana eka Pilato, va ku: ₆₃“Hosi, ha ha anakanya leswaku muxisi yeloyi, loko a ha hanya, u te: ‘Ndzi ta pfuka hi siku ra vunharhu.’ ₆₄Hikwalaho, u nga lerisa leswaku sirha ri languteriwa ku ko ku fika siku ra vunharhu, hikuva kumbe vadyondzisiwa va yena va nga n'wi yiva, va ta ku eka tiko: ‘U pfukile eku feni,’ kutani mavunwa walawo kunene ma ta tlurisa layo rhanga.” ₆₅Pilato a ku eka vona: “Mi ni valanguteri, yanani mi ya langutela hilaha mi swi vonaka hakona.” ₆₆Kutani va ya, va tiyisa ribye hi mfungho wa vona, va veka ni valanguteri enyangweni ya sirha.