MARKA 15

₁Nimpundzu, vaprista lavakulu va endla makungu ni vakulukumba, ni vatsari, ni va huvo hinkwayo. Kuteloko va bohile Yesu, va famba na yena, va ya n'wi nyiketa Pilato.

₂Yena Pilato a n'wi vutisa, a ku: “Xana u hosi ya Vayuda xana?” A hlamula, a ku eka yena: “U vula swona.” ₃Kavaloko vaprista lavakulu va n'wi hehla hi timhaka leto tala. ₄Pilato a engeta a n'wi vutisa, a ku: “Xana a ku hlamuri nchumu-ke? Vona, va ku hehla hi timhaka leto tala!” ₅Kambe Yesu a nga hlamulanga nchumu, Pilato a ko a hlamala.

₆Hi siku ra nkhuvo, a a tolovele ku va tshunxela mubohiwa un'wana, loyi va n'wi kombelaka. ₇Kambe a ku ri ni un'wana la vuriwaka Barabasi la bohiweke ni van'wana lava pfuxeke dzolonga, va dlele munhu edzolongeni. ₈Vunyingi byi huwelela, byi sungula ku kombela leswaku a endla kukota leswi a va endlelaka hi masiku. ₉Kutani Pilato a va hlamula, a ku: “Xana mi rhandza leswaku ndzi mi tshunxela hosi ya Vayuda xana?” ₁₀Hikuva a tiva leswaku vaprista va n'wi nyiketile yena hi mona. ₁₁Kambe vaprista lavakulu va hlohlotela vunyingi leswaku a va tshunxela Barabasi. ₁₂Pilato a engeta a vulavula, a ku eka vona: “Loko swi ri tano mi rhandza leswaku ndzi endla yini hi loyi mi n'wi vulaka hosi ya Vayuda-ke?” ₁₃Kambe va engeta va huwelela, va ku: “N'wi vambe!” ₁₄Pilato a ku eka vona: “Xana u dyohe yini-ke?” Vona va huwelela hi ku tlurisa, va ku: “N'wi vambe!” ₁₅Kambe leswi Pilato a a rhandza ku tsakisa vunyingi, a va tshunxela Barabasi; loko a ri Yesu kuteloko a n'wi bile, a va nyiketa yena leswaku a vambiwa.

₁₆Kutani masocha ma n'wi yisa exivaveni, hileswaku ehubyeni leyikulu, kutani va hlengeleta ntlawa hinkwawo. ₁₇Kuteloko va n'wi funengetile hi nguvu ya xivunguvungu, va luka harhi ya mitwa, va n'wi rhwexa enhlokweni. ₁₈Kutani va sungula ku n'wi xeweta, va ku: “Xewani, hosi ya Vayuda!” ₁₉Kutani va n'wi ba nhloko hi rihlanga, va n'wi tshwutela hi marhi, kutani va wa hi matsolo, va n'wi khinsamela. ₂₀Kuteloko va n'wi tseketserile, va n'wi funungula nguvu ya xivunguvungu, va n'wi ambexa tinguvu ta yena, kutani va famba na yena ku ya n'wi vamba.

₂₁Kutani va sindzisa un'wana la hundzaka a huma emasin'wini, va ku a rhwala xihambano xa Yesu, a a ri Simoni wa Kirene, tata wa Aleksandro na Rhufasi; ₂₂kutani va n'wi yisa entsungeni wa Gologota; loko ku hundzuriwa hileswaku ntsunga wa ripala. ₂₃Va n'wi nyika vhinyo leyi nga hlanganisiwa ni mirha, leswaku a nwa; kambe a nga yi nwanga. ₂₄Kuteloko va n'wi vambile va avelana tinguvu ta yena, va ti hlahluva hi vuhlolotwana, ku tiva leyi un'wana ni un'wana a nga ta yi kuma. ₂₅Kambe a wu ri nkarhi wa vunharhu loko va n'wi vamba. ₂₆Ku tsariwile papila ra nandzu wa yena leri nge: “Hosi ya Vayuda.”

₂₇Va vamba swidyohi swimbirhi kun'we na yena; xin'wana evokweni ra yena ra xinene, xin'wana eka lera ximatsi. ₂₈Hi sweswo ku hetiseka tsalwa leri nge: U hlayiwile ni swidyohi.

₂₉Lava hundzaka va n'wi rhuketela, va nikinika tinhloko ta vona, va ku: “Ha! Wena la hlanhlaka tempele, u ku u ta yi pfuxa hi masiku manharhu; ₃₀tihanyise, u xika exihambanweni!” ₃₁Hi mukhuva wolowo, na vona vaprista lavakulu swin'we ni vatsari, va n'wi tseketsela, va ku: “U hanyisile van'wana, kambe yena u tsandzeka ku tihanyisa! ₃₂Kriste, hosi ya Israele, a a xike sweswi exihambanweni, hi ta n'wi vona, hi va hi pfumela.” Ni lava nga vambiwa na yena, a va n'wi rhuketela.

₃₃Kuteloko ku fikile nkarhi wa ntlhanu na wun'we, munyama wu va kona emisaveni hinkwayo, ku fikela nkarhi wa ntlhanu na mune. ₃₄Kutani hi nkarhi wa ntlhanu na mune, Yesu a huwelela hi rito lerikulu, a ku: “Eloyi, Eloyi, lama sabaktani?” hi leswaku: “Xikwembu xanga, Xikwembu xanga, u ndzi tshikele yini?” ₃₅Van'wana lava ngi va ri kwalaho, loko va swi twa, va ku: “Yingisani, u vitana Eliya.” ₃₆Un'wana a tsutsuma, kuteloko a tatile xikhuvi hi ntsuvi, a xi tlhoma erihlangeni, a n'wi nwisa, a ku: “Tshikani, hi ta vona loko kunene Eliya a ta ta n'wi hawula.”

₃₇Kambe Yesu a huwelela hi rito lerikulu, a nyiketa moya.

₃₈Kutani nguvu ya tempele yi handzuka hi le xikarhi, ku sungula ehenhla ku fika ehansi.

₃₉Ndhuna ya dzana leyi yimeke kwalaho emahlweni ka yena, kuteloko yi vonile hilaha a nga nyiketa moya loko a huwelela, yi ku: “Kunene, munhu loyi, a a ri N'wana wa Xikwembu.”

₄₀Kambe vavasati a va ri kona, va languta va ri ekule, exikarhi ka vona a ku ri na Mariya wa Magadala, na Mariya, mana wa Yakobo lontsongo na Yose, na Salome. ₄₁Hi lava, loko a ha ri eGaleliya, va nga n'wi landza, va n'wi tirhela, va ri ni van'wana lavo tala, lava tlhandlukeleke na yena eYerusalema.

₄₂Loko dyambu ri perile, hikuva a ri ri siku ra ku lunghisa, hileswaku leri tlhandlamiwaka hi Savata, ₄₃ku ta Yosefa wa Arimatiya, wanuna wa huvo, la tlhariheke, loyi a languteleke ku fuma ka Xikwembu na yena; a kanya mbilu, a nghena eka Pilato, a kombela ntsumbu wa Yesu.

₄₄Kutani Pilato a hlamala hi leswi a nga hatlisa ku fa; kavaloko a vitana ndhuna ya dzana, a yi vutisa leswaku i khale xana a file. ₄₅Kuteloko a swi twile eka ndhuna ya dzana, a nyika Yosefa ntsumbu. ₄₆Yena a ya xava nguvu ya sirha, a ya hawula ntsumbu wa Yesu, a wu phutsela engubyeni, a wu veka esirheni leri vatliweke eribyeni, kutani a vumbuluxa ribye enyangweni ya sirha.

₄₇Kambe Mariya wa Magadala, na Mariya, mana wa Yose, a va languta laha wu vekiwaka kona.