NAHUME 1

₁Hlavutelo ehenhla ka Ninivha. Buku ya vumbhoni bya Nahume, wa Elikoxo.

₂Yehovha i Xikwembu lexa rilondzo, xi rihisaka; Yehovha wa rihisela, u tele vukari; Yehovha u tirihisela eka lava n'wi lwisaka, vukari bya yena u byi hlayisela lava nga valala eka yena. ₃Yehovha u lehe mbilu, i nkulu ngopfu, loko a landzulela munhu nandzu wa yena. Yehovha! ... Ndlela ya yena yi le xikarhi ka xidzedze ni ndhambi, mapapa i ntshuri wa milenge ya yena. ₄U tshinya lwandle ri va ri phya; u phyisa milambu hinkwayo. Baxani wa vuna, na yena Karmele, na xona xiluva xa Lebanoni xa vuna. ₅Tintshava ti tsekatseka emahlweni ka yena, switsunga swa n'oka, misava ya kukumuka emahlweni ka yena, tiko ra vanhu, ni hinkwaswo leswi nga eka rona. ₆Vukari bya yena byi nga yimela hi mani, naswona i mani la nga tiyaka eku pfurheni ka vukari bya yena? Vukari bya yena byi halaka ku fana ni ndzilo, hi yena a wisaka tintshava ta maribye ehansi.

₇Yehovha u ni tintswalo, i xichavelo esikwini ra khombo, u tiva lava chavelaka eka yena. ₈U ta lovisa xivandla xa Ninivha hi ndhambi leyi kukutaka, kutani lava nga valala eka yena u ta va pfalela emunyameni.

₉Hi yihi miehleketo ya n'wina ehenhla ka Yehovha? U ta lovisa kunene; khombo ri nga ka ri nga ti kambirhi. ₁₀Hikuva hambi va phasetelanile kukotisa emitweni, va pyopyile hi swakunwa swa vona, va ta hisiwa hinkwavo ku fana ni mungu lowu omeke. ₁₁Eka wena ku hume la kanelaka leswo biha ehenhla ka Yehovha, la tsundzuxaka vumbabva.

₁₂Yehovha u te: “Hambi va hlayisekile va ri vanyingi, na swona va ta hweviwela ehansi va fa; kutani wena [Yuda], loyi ndzi ku tsongahateke, a ndzi nga ha ku tsongahati. ₁₃Kutani, ndzi ta tshova sweswi, joko ra yena leri nga ehenhla ka wena, ndzi tsema ni switsimbo swa wena.” ₁₄Loko u ri wena, Ninivha, Yehovha u lerisa, a ku: “Vito ra wena a ri nga ha byariwi. Endlwini ya swikwembu swa wena, ndzi ta susa swifaniso leswi vatliweke ni leswi chuluriweke, kutani ndzi ta ku lunghisela sirha, hikuva u xahava.”

₁₅Vonani ehenhla ka tintshava milenge ya la vulavulaka timhaka ta tintswalo, a twarisaka ta ku rhula! Wena, Yuda, endla mikhuvo ya wena, u riha ku hlambanya ka wena, hikuva lowa vumbabva a a nga ha hundzi eka wena; u lovisiwile makumu.