NEHEMIYA 13

₁Enkarhini wolowo ku hlayiwa buku ya Muxe, emahlweni ka tiko, va kuma ku tsariwile leswaku Vaamoni ni Vamowabu, va nga ka va nga ngheni enhlengeletanweni ya Xikwembu, ni siku ni rin'we, ₂hikuva a va yanga va ya hlangana ni vana va Israele hi vuswa ni mati kambe va hakela Balaama leswaku a va rhukana, ntsena Xikwembu xa hina hi xona lexi nga n'wi hlamula ku rhukana hi ku katekisa. ₃Kuteloko va twile milawu, va hlawula vamatiko hinkwavo eka Vaisraele.

₄Leswo swi nga si va kona, Eliyaxibi muprista la nga vekiwa mukamberi wa makamara ya yindlu ya Xikwembu xa hina, warikwavo eka Tobiya, ₅a n'wi lunghiserile kamara leyikulu, laha ku nga hlayisiwa mihlengo ni mirhi ya risuna khale, ni mitirho, ni ku pambula ka vukhume eka koro, ni ka vhinyo leyintshwa, ni mafurha, leswi ngi swi lerisiwile Valevhi ni vayimbeleri, ni valanguteri va tinyangwa, ni mihlengo leyi hlawuleriwaka vaprista. ₆Enkarhini wa timhaka toleto, a ndzi nga ri Yerusalema, hikuva hi lembe ra 32 ra Ataserkisi, hosi ya Babilona, a ndzi tlherile, ndzi ya eka hosi; ₇kuteloko lembe ri herile, ndzi pfumeleriwa hi hosi ku tlhelela eYerusalema, kutani ndzi tsundzuka swo biha leswi endliweke hi Eliyaxibi ematshan'weni ya Tobiya, hilaha a n'wi lunghiseleke kamara hakona exivaveni xa yindlu ya Xikwembu. ₈Ndzi va ni tingana ngopfu, hikwalaho ndzi cukumeta timpahla hinkwato ta yindlu ya Tobiya ehandle ka kamara; ₉ndzi va byela leswaku makamara a ma basisiwe, ndzi vuyisela kona mitirho ya yindlu ya Xikwembu, ni mihlengo, ni mirhi ya risuna.

₁₀Ndzi twa kambe leswaku Valevhi a va nga nyikiwanga ku averiwa ka vona, ni leswaku Valevhi ni vayimbeleri lava tirhaka mitirho, va hangalakile un'wana ni un'wana ensin'wini ya yena; ₁₁kutani ndzi holovela tihosana, ndzi ku: “Yindlu ya Xikwembu mi yi fularhele yini xana?” Ndzi tlhela ndzi va hlengeleta ndzi va tlherisela emitirhweni ya vona. ₁₂Kutani Vayuda hinkwavo va tlhela va humesa ku pambula ka vukhume eka koro ni vhinyo leyintshwa, ni mafurha, evuhlayiselweni; ₁₃ndzi veka Xelemiya, muprista, na Sadoki, mutsari, na Pedaya, va Valevhi, vakamberi va vuhlayiselo, ndzi va tiyisa hi Hanana n'wana Zakuru, n'wana Mataniya; hikuva a va ri lava tshembekaka, va byeriwa leswaku va pambulela vamakwavo ku averiwa ka vona.

₁₄Oho! Xikwembu xa mina, u ndzi anakanya hikwalaho ka sweswo, u nga hlanguli ku endla ka vukhongeri loku ndzi ku endleleke yindlu ya Xikwembu xa mina ni mitirho ya yona!

₁₅Enkarhini wolowo ndzi vona vanhu va kandziya exikhuvutelweni hi Savata, etikweni ra Yuda, ni lava chochaka tinyandza ekaya, va rhwexile timbhongolo, ti rhwele vhinyo, ni mihandzu ya vhinya, ni makuwa, ni mitirho yin'wana ya tinxaka, va neha eYerusalema, hi siku ra Savata; kutani ndzi va holovela hi siku rolero va xavisaka swakudya ha rona. ₁₆Ni va Tiri lava akeke eYerusalema, a va tisa tinhlampfi ni mitirho yin'wana ya tinxaka, va xavisa swona hi Savata eka vana va Yuda ni le Yerusalema. ₁₇Ndzi holovela vakulu va Yuda ndzi ku eka vona: “Ku biha loko mi ku endlaka hi ku yini, loko mi nyamisa siku ra Savata-ke? ₁₈Xana leswi Xikwembu xa hina xi hi humeseleke hina ni muti lowu makhombo walawo hinkwawo, xana a hi leswi vatata wa hina va tshamaka va endla leswo tano-ke? Kasi na n'wina mi engetelela Israele vukari, hi ku nyamisa Savata.” ₁₉Sweswo, kuteloko tinyangwa ta Yerusalema, ti funengetiwe hi ndzhuti, loko Savata ri ta sungula, ndzi vula leswaku tinyangwa ti ta pfariwa, ndzi vula kambe, ndzi ku: “Ti nga ha pfuriwi loko ku nga ri loko Savata ri hundzile,” ndzi veka malandza ya mina etinyangweni leswaku ku nga ngheni ndzhwalo ni wun'we hi siku ra Savata. ₂₀Hikwalaho vaxavi ni lava xavisaka mitirho ya tinxaka hinkwato, va tshama nivusiku ehandle ka Yerusalema, kan'we kumbe kambirhi. ₂₁Ndzi va holovela, ndzi ku eka vona: “Mi vundzela yini vusiku ehandle ka rirhangu-ke? Loko mi tlhela mi engeta, ndzi ta mi khoma.” Ku sukela enkarhini wolowo, a va ha tanga hi Savata. ₂₂Kambe ndzi byela Valevhi leswaku va tibasisa, va ta langutela tinyangwa leswaku siku ra Savata ri ta hlawuriwa.

Oho! Xikwembu xa mina! Ndzi anakanye ni le mhakeni leyi, u ndzi tsetselela hi vukulu bya tintswalo ta wena!

₂₃Emikarhini yoleyo kambe, ndzi vona leswaku Vayuda van'wanyana va tekile vasati va Vaaxidodo, ni va Vaamoni, ni va Vamowabu; ₂₄vana va vona a va vulavula hi ririmi ra Vaaxidodo kambe a swi nga hetiseki a va nga tivi ku vulavula hi ririmi ra Vayuda, va vulavula hi ririmi ra matiko man'wana hambi man'wanyana. ₂₅Kutani ndzi va holovela, ndzi va rhukana, ndzi va ni van'wana, ndzi va hluva misisi, ndzi va hlambanyela hi Xikwembu, ndzi ku: “Mi nga nyika vana va n'wina eka vana va vona, mi nga teki vana va vona, na n'wina mi nga tekelani na vona. ₂₆Solomoni, hosi ya Israele a nga dyohanga emhakeni leyi xana? Exikarhi ka matiko layo tala a ku nga ri na hosi leyi fanaka na yena, kambe a a rhandziwa hi Xikwembu xa yena, kutani Xikwembu a xi n'wi vekile hosi ya Vaisraele hinkwavo kambe, hambiswiritano, vasati va matiko va n'wi dyohisile na yena. ₂₇Hi nga mi pfumelerisa ku yini leswaku mi endla swo biha leswo tano, mi karihisa Xikwembu xa hina hi ku teka vavasati va vamatiko?”

₂₈Un'wanyana wa vana va Yehoyada, n'wana Eliyaxibi, muprista lonkulu, a nga mukon'wana wa Sanibalati, Muhoroni, ndzi n'wi hlongola emahlweni ka mina.

₂₉Oho! Xikwembu xa mina, u va anakanya, hikuva va nyamisile vuprista ni xinakulobye xa vaprista ni Valevhi.

₃₀Kutani ndzi va basisa, ndzi va tshikisa hinkwaswo leswi nga swa vamatiko, kutani ndzi lerisa hinkwaswo leswi vaprista ni Valevhi va faneleke ku swi endla, un'wana ni un'wana entirhweni wa yena, ₃₁ndzi lunghisa ni timhaka ta nhlengo wa tihunyi hi mikarhi leyi vekiweke, ni ya swirhangana.

Oho! Xikwembu xa mina, u ndzi anakanya, u ndzi endlela leswinene!