Ta homu ya ribungu; mati ya ku basisa.
1Yehovha a byela Muxe na Aroni, a ku: 2“Hi kona ku lerisa ni nawu lowu Yehovha a wu leriseke loko a ku: ‘Byela vana va Israele va ku tisela homu ya ntswele ya ribungu, leyi nga riki na xisandzu ni xivati, leyi nga rhwalangiki joko. 3Mi ta yi nyika Eliyazara, muprista, kutani va ta yi humesa emixaxeni, va yi tlhava emahlweni ka yena. 4Eliyazara, muprista, u ta teka ngati ya homu hi ritiho ra yena, u ta xuva ha yona kantlhanu ni kambirhi etlhelweni ra nyangwa ya tabernakela ya nhlengeletano. 5Kutani va ta hisa homu emahlweni ka wena; va ta hisa dzovo ra yona ni nyama, ni ngati, ni swanyi wa yona. 6Muprista u ta teka murhi wa kedari ni hisopa ni karmesi a swi hoxa endzilweni, laha homu yi hisiwaka kona. 7Muprista u ta hlantswa tinguvu ta yena, a hlamba miri ematini, kutani u ta nghena emixaxeni; kambe muprista u ta va la nga tengangiki ku fika nimadyambu. 8Munhu la hiseke homu u ta hlantswa tinguvu ta yena ematini, a hlamba miri, kutani u ta va la nga tengangiki ku fika nimadyambu. 9Munhu la tengeke u ta ola nkuma wa homu, a wu veka endhawini leyi tengeke, ehandle ka mixaxa, kutani wu ta hlayiseriwa nhlengeletano ya vana va Israele kukotisa mati ya ku basisa; i gandzelo ra ku dyoha. 10La oleleke nkuma wa homu, u ta hlantswa tinguvu ta yena, kutani u ta va la nga tengangiki ku fika nimadyambu. Ku ta va ku lerisa loku nga heriki ka vana va Israele, ni ka muluveri la luvelaka exikarhi ka vona.
11“ ‘La khumbeke mufi hi leswaku miri wihi ni wihi wa munhu, u ta va la nga tengangiki hi masiku ya ntlhanu na mambirhi. 12U ta tibasisa hi mati lawa hi siku ra vunharhu, ni siku ra ntlhanu na mambirhi, kutani u ta tenga; kambe loko a nga tibasisi hi siku ra vunharhu ni ra ntlhanu na mambirhi, a nga ka a nga tengi. 13La khumbeke mufi, hileswaku miri wa munhu la feke, a va a nga tibasisi, u nyamisa Yindlu ya Yehovha. Munhu loyi, u ta susiwa eIsraeleni hikuva mati ya ku basisa a ma cheriwangi ehenhla ka yena; wa ha ri la yilaka; thyaka ra yena ra ha ri ehenhla ka yena.
14“ ‘Hi wona nawu: Kutakuloko munhu a file entsongeni, mani na mani la nghenaka entsongeni, ni swilo hinkwaswo leswi nga entsongeni, swi ta va leswi yilaka hi masiku ya ntlhanu na mambirhi. 15Mbita yin'wana ni yin'wana leyi fununguriweke, leyi nga riki na xifunengeto lexi bohiweke ehenhla ka swona, yi ta va leyi yilaka. 16Mani na mani la khumbeke munhu la dlayiweke hi tlhari emasin'wini, kumbe mufi, kumbe marhambu ya vanhu, kumbe sirha u ta va la yilaka hi masiku ya ntlhanu na mambirhi. 17Va ta tekela la yilaka nkuma wa gandzelo leri hiseriweke ku dyoha, kutani va ta chela mali layo basa ehenhla ka wona ma ri enhlambetweni; 18kutani munhu la tengeke u ta teka hisopa, a yi peta ematini, kutani u ta xuva ntsonga ni swibya hinkwaswo, ni vanhu hinkwavo lava nga kona, ni loyi a khumbeke marhambu, hambi munhu la dlayiweke, hambi mufi, hambi sirha. 19La tengeke u ta xuva la yilaka hi siku ra vunharhu ni ra ntlhanu na mambirhi, kutani ku yila ka yena ku ta susiwa hi siku ra ntlhanu na mambirhi, U ta hlantswa tinguvu ta yena, a hlamba ematini, kutani nimadyambu u ta tenga. 20La tinyamiseke, a va a nga tibasisi; munhu loyi u ta susiwa enhlengeletanweni, hikuva u nyamisile vukwetsimelo bya Yehovha; mati ya ku basisa a ma cheriwanga ehenhla ka yena, u nyamile. 21Ku ta va eka vona ku lerisa lo ku nga heriki. La nga xuva hi mati ya ku basisa, u ta hlantswa tinguvu ta yena; kutani la khumbeke mati ya ku basisa, u ta va la yilaka ku fika nimadyambu. 22Hinkwaswo leswi khumbeke la yilaka swi ta va leswi yilaka; ni loyi a n'wi khumbeke u ta va la yilaka ku fika nimadyambu.’ ”
