SWIVURISO 13

₁N'wana wo tlhariha u yingisela tidyondzo ta tata wa yena,

Kambe musandzi a nga yingisi ku layiwa.

₂Munhu u kuma vunene hi mihandzu ya nomu wa yena,

Kambe ku navela ka timbabva i ku lovisa.

₃La tikhomaka nomu u hlayisa moya wa yena,

Kambe la tshamaka a ahlamisa nomu wa yena, u ta wela eku loveni.

₄Mbilu ya lolo yi dyiwa hi ku navela, hambiswiritano, a ri fuwi nchumu

Kambe moya wa ngingi wu ta nona.

₅La lulameke u venga mavunwa,

Kambe lowo biha wa nyenyiwa, u taleriwa hi tingana.

₆Ku lulama ku ponisa la fambaka eku lulameni,

Kambe ku homboloka ku lovisa mudyohi.

₇Un'wana a tiendla mufuwi, kasi a nga na xilo,

Un'wana a tiendla xisiwana, kasi i mufuwi lonkulu.

₈Rifuwo ra munhu ri n'wi kutsulela ku hanya ka yena,

Kambe xisiwana a xi yingisi ku tshinyiwa.

₉Ku vonakala ka lavo lulama i ku tsaka,

Kambe rivoni ra lavo biha ra timeka.

₁₀Ku tikukumuxa ku humesa ku hambana;

Kambe vutlhari byi le ka lava pfumelaka ku tsundzuxiwa.

₁₁Rifuwo leri laviweke hi mano a ri nga tiyi,

Kambe la hlengeletaka ha switsanana u ta andzeriwa hi rona.

₁₂Ku langutela loku hlwelaka ku vavisa timbilu,

Kambe ku navela, u vuya u swi kuma, i murhi wa vutomi.

₁₃La tsan'waka rito wa tilahla,

Kambe la chavaka nawu u ta kuma hakelo.

₁₄Milawu ya la tlhariheke i xihlovo xa vutomi

Ku tingawurisa vanhu emakheleni ya rifu.

₁₅Ku twisisa ku veleka tintswalo,

Kambe ndlela ya mbabva ya nonon'hwa.

₁₆Muxiyaxiyi u endla hinkwaswo hi ku tiva,

Kambe xihunguki xi tivisa vuhunguki bya xona.

₁₇Murhumiwa lowo biha u ta wela ekhombyeni,

Kambe murhumiwa la tshembekaka wa hanyisa.

₁₈Vusiwana ni tingana i swa la alaka ku layiwa,

Kambe la amukelaka ku tshinyiwa u ta dzunisiwa.

₁₉Ku navela loku hetisekeke ku tsakisa timbilu,

Ku fularhela leswo biha i manyala eka xihunguki.

₂₀La fambaka ni tintlhari u ta tlhariha,

Kambe la tolovelaka swihunguki u ta onhaka.

₂₁Makhombo ma landzela vadyohi,

Kambe mikateko i hakelo ya lavo lulama.

₂₂Munhu lonene u siyela vatukulu ndzhaka,

Kambe rifuwo ra mudyohi ri siyeriwa la lulameke.

₂₃Ku halula ka xisiwana ku veleka ngopfu,

Kambe van'wana va lova hi ku kala ku lulama.

₂₄La pfumataka n'wana wa yena nhonga, u n'wi vengile,

Kambe la n'wi rhandzaka wa n'wi laya.

₂₅Munhu wo lulama u dya a xurha swinene,

Loko ma ri makhwiri ya lavo biha, ma twa ndlala.