1Vito lerinene ri tlula rifuwo lerikulu,
Ku khensiwa, na kona, ku tlula silivhere ni nsuku.
2Mufuwi ni xisiwana va hlangana kun'we;
Loyi a va endleke havambirhi i Yehovha.
3Munhu wa vutlhari u vona khombo, kutani a tumbela,
Kambe varivali va ya emahlweni va biwa.
4Hakelo ya ku titsongahata ni ya ku chava Yehovha i rifuwo, ni ku kwetsima, ni vutomi.
5Mitwa ni mitlhamu yi le ndleleni ya munhu wo homboloka;
La hlayisaka moya wa yena u ta yi papalata.
6Dyondzisa jaha endleleni leyi a fanelaka ku famba ha yona;
Ni loko a dyuhele a nga ka a nga hambuki.
7Mufuwi u fuma swisiwana,
Ni loyi a lombaka i hlonga ra la n'wi lombeke.
8La byalaka ku homboloka u ta tshovela maxangu,
Kutani nhonga ya vukari bya yena yi ta hela.
9Munhu wa tintswalo u ta kateka,
Hikuva u pfuna xisiwana hi swakudya swa yena.
10Hlongorisa musandzi, timholovo ti ta hela;
Ku hambana ni tingana swi ta hela na swona.
11La rhandzaka ku basa ka mbilu,
A ri ni milomu yo saseka, i murhandziwa wa hosi.
12Mahlo ya Yehovha ma hitekela vutivi,
Kambe u herisa timhaka ta mbabva.
13Lolo ri ri: “Nghala yi kona ehandle!
Ndzi nga dlayiwa erivaleni!”
14Milomu ya vavasati va timbiri i rindzi le ri enteke,
Lowo nyenyetsa eka Yehovha u ta wela kona.
15Vuhunguki byi bohelela mbilu ya n'wana,
Kambe nhonga ya ku laya yi ta byi susa eka yena.
16La xanisaka xisiwana u engetela rifuwo ra xona,
La nyikaka mufuwi, u n'wi wisa evusiwaneni.
17Rhiya ndleve, u yingisa ku vulavula ka tintlhari;
U nyiketa mbilu ya wena evutivini bya mina.
18Hikuva swi sasekile loko u swi hlayisa embilwini ya wena,
Hinkwaswo swi tshama swi ri emilon'wini ya wena.
19Ndzi ta ku dyondzisa namuntlha wena hi xiviri,
Leswaku u veka ku tshemba ka wena eka Yehovha.
20Xana a ndzi ku tsalelanga khale,
Mikhongotelo ni ku tsundzuxa,
21Ku ku dyondzisa marito ya ntiyiso ni ku tshembeka,
U ta tiva ku hlamula swinene eka lava ku rhumaka?
22U nga dyeleli xisiwana hi leswi xi nga xisiwana,
U nga xanisi wa nhlomulo enyangweni ya muti;
23Hikuva Yehovha u ta va lamulela,
Lava va dyeke u ta va tekela vutomi.
24U nga tolovelani na munhu wo kariha,
U nga fambi ni lowo hlundzuka,
25U nga ta dyondza mikhuva ya yena,
U nga ta kuma ntlhamu wa moya wa wena.
26U nga yi ni lava khomanaka hi mavoko,
Va tiboha hi milandzu ya van'wana;
27Va nga ku tekela yini sangu ehansi ka wena,
Loko u pfumala swa ku riha ha swona-ke?
28U nga tshineti ndzilakana wa khale,
Lowu nga vekiwa hi vatatana wa khale.
29Xana u tsundzukile munhu la gingiritekaka emitirhweni ya yena-ke?
U ta yima emahlweni ka tihosi,
A nga ka a nga yimi emahlweni ka vanhu ntsena.
