SWIVURISO 25

₂Ku twala ka Xikwembu i ku fihla mhaka; kambe ku yi kambisisa i ku twala ka tihosi.

₃Ku tlakuka ka matilo ehenhla ni ku enta ka misava,

Ni timbilu ta tihosi a swi na ku kambiwa.

₄Susa manyelo esilivhereni,

Kutani xifuri xi ta endla mbita ha yona.

₅Susa lowo biha emahlweni ka hosi,

Xitshamo xa yona xi ta tiyisiwa hi ku lulama.

₆U nga tikurisi emahlweni ka hosi,

U nga tshami exitshan'weni xa lavakulu;

₇Hikuva swi nga saseka loko va ku eka wena:

“Tlhandlukela halenu,”

Ku nga ri loko va ku tsongahata emahlweni ka hosi leyi u yi vonaka hi mahlo.

₈U nga hatlisi ku ya eku tengeni,

U nga ti tshuka u nga tivi lexi u nga ta hlamula xona makumu,

Loko u kanetiwa hi warikwenu.

₉Hambi u tenga ni warikwenu,

U nga boxi makungu ya un'wana,

₁₀A nga ti tshuka a swi twa, a ku sandza,

A ku khomisa tingana leti ku namarhelaka.

₁₁Marito lama vulavuriweke hi nkarhi

Ma kotisa malamula ya nsuku entewaneni wa silivhere.

₁₂Eka tindleve ta munhu loyi a yingisaka, la layaka hi ku twisisa

U kotisa senga ra nsuku ni harhi ya nsuku lowunene.

₁₃Ntsumi leyi tshembekeke eka lava yi rhumeke

Yi kotisa gamboko lero titimela enkarhini wa ku tshovela,

Ri titimeta mbilu ya hosi yakwe.

₁₄La tidzunisaka hi ku hanana ka mavunwa,

U kotisa papa ni mheho leyi hungaka, mpfula ku ri hava.

₁₅Hi ku lehisa mbilu, hosi ya fambisiwa,

Ni ririmi ra ku olova ri tshova marhambu.

₁₆Xana u kumile vulombe?

U dya hi mpimo,

Kumbe xana u nga kolwa u tlhela u hlanta.

₁₇U nga toloveli ngopfu ndyangu wa warikwenu,

A nga ti kolwa ha wena, a tlhela a ku venga.

₁₈Munhu la hembaka vunwa ku onha warikwavo,

I xigombo, ni fumu, ni nseve wo hlokohla.

₁₉Xihunguki lexi u xi tshembeke hi siku ra khombo,

I tino ro tshoveka ni nenge wo tsekatseka.

₂₀Ku funungula nguvu hi siku ra xirhami,

Ni ku chela ntsuvi ehenhla ka nitra (murhi wa ku leva),

I ku tlhavela mbilu ya nhlomulo tinsimu ta ku tsaka.

₂₁Loko nala wa wena a ri ni ndlala, n'wi he swakudya a dya;

Loko a ri ni torha, n'wi he mati a nwa;

₂₂Ma ta va makala yo hisa u n'wi hlengeletelaka enhlokweni,

Kambe Yehovha u ta ku tlherisela.

₂₃Moya wa dzonga wu humesa mpfula,

Ririmi leri tshivelaka exihundleni ri humesa mombo lowo kariha.

₂₄Ku tiakela emafulelweni ya yindlu,

Swi tlula ku tshama endlwini leyikulu ni nsati wa ku leva.

₂₅Timhaka to nandziha leti humaka etikweni ra le kule,

Ti kota mati ya ku tenga eka munhu la karheleke.

₂₆Xihlovo lexi pfindlusiweke ni lexi onhakeke,

Xi fana ni munhu wo lulama la tsekatsekaka emahlweni ka mudyohi.

₂₇Ku xurha vulombe byo tala a hi swinene,

Kutani ku tilavela ku twala a hi ku twala.

₂₈Munhu la hlulekaka ku fuma mbilu ya yena,

I muti lowu ngheniweke hi valala, wu nga ri na rirhangu.