SWIVURISO 27

₁U nga tidzunisi hi siku ra mundzuku,

Hikuva a ku tivi leswi nga ta humelela hi siku rero.

₂La ku dzunisaka a ve un'wana ri nga ri ririmi ra wena,

A a ve un'wana, wu nga ri nomu wa wena.

₃Ribye ra tika, na rona sava,

Kambe ku kariha ka xihunguki ku tlula swilo leswimbirhi.

₄Ku kariha ku ni nsele, ku holova i ku tala ka nambu,

Loko ma ri mavondzo i mani a nga ta yima emahlweni ka wona?

₅Ku tshinya ka le rivaleni,

Ku tlula rirhandzu leri fihliweke.

₆Timbanga leti endliwaka hi munghana ti kombisa rirhandzu ra yena,

Kambe ku ntswontswa ka lava ku vengaka ka kanganyisa.

₇La xurheke u nyenya vulombe;

Kambe wa ndlala, swa ku bava swa nandziha eka yena.

₈Munhu la fambafambaka ekule ni le kaya ka yena,

U kotisa nyanyana leyi wongelaka ekule ni xisaka xa yona.

₉Mafurha, ni leswi nun'hwelaka ku nandziha, swi tsakisa mbilu;

Hi sweswo, ku lerisa loku humaka embilwini ya nakulobye, ka nandziha.

₁₀U nga fularheli nakuloni, hambi a ri munghana wa tata wa wena;

U nga ngheni endlwini ya makwenu siku a nga ekhombyeni;

Loyi u akeke kun'we na wena u tlula makwenu la nga ekule.

₁₁N'wananga, tlhariha, u tsakisa mbilu ya mina,

Ndzi ta kuma rito ku hlamula lava ndzi rhukanaka.

₁₂Munhu wa ku anakanya u vona khombo ra ha ta, a tisivelela;

Murivali, yena, u hundza emahlweni, a rihiseriwa.

₁₃N'wi tekeleni nguvu, hikuva u tibohile hi nandzu wa van'wana,

N'wi rihiseni hikwalaho ka va le handle.

₁₄Loyi a dzunisaka nakulobye wa ha ri mixo hi rito leri tlakukeke,

Va ta ku: “Wa n'wi rhuketela.”

₁₅Yindlu leyi pfutaka hi siku ra mpfula,

Ni nsati wa timholovo, i xilo xin'we;

₁₆La n'wi khomeke, u khomile mheho,

Ni voko ra yena ra xinene ri tamele mafurha.

₁₇Nsimbhi yi lota nsimbhi,

Hi sweswo eka munhu, u hlohlotela vukari bya munhu.

₁₈La rindzaka nkuwa u ta dya mihandzu ya wona,

Ni la hlayisaka n'wini wa yena u ta dzunisiwa.

₁₉Ku kota nghohe leyi voniwaka ematini, yi fana ni n'wini wa yona,

Mbilu ya munhu yi fana ni mbilu ya munhukulobye.

₂₀Xivandla xa vafi ni tihele a swi xurhi,

Mahlo ya munhu, na wona, a ma xurhi.

₂₁Mbita i ya ku nyukisa silivhere, ni fulo ra nsuku;

Munhu u ringisa sweswo nomu lowu n'wi dzunisaka.

₂₂Hambi u kandza xihunguki entshurini,

U kandza hi musi u pfanga ni mavele lama siriwaka,

Vuhunguki bya xona byi nga ka byi nga n'wi sukeli.

₂₃Tivisisa swinene tinyimpfu ta wena ha yin'we,

U hlayisa swinene mitlhambi ya wena;

₂₄Hikuva ndzalo a hi ya malembe hinkwawo,

Ni harhi ya vuhosi a yi tshami hi masiku.

₂₅Byanyi bya susiwa, rihlaza ra humelela,

Ku laviwa byanyi etintshaveni.

₂₆Swinyimpfana swi ta va swa tinguvu ta wena,

Swiphongo swi ta xava nsimu;

₂₇Ntswamba wa timbuti swi ta va swakudya swa wena ni swa yindlu ya wena,

Ni swa malandza ya wena ya xisati.