SWIVURISO 3

₁N'wananga, u nga rivali nawu wa mina,

Mbilu ya wena a yi hlayise ku lerisa ka mina;

₂Hikuva swi ta engetela masiku ya wena,

Ni malembe ya ku hanya ka wena, ni ku rhula ka wena.

₃Vunene ni ntiyiso swi nga tshuki swi avana na wena;

Titsimbe swona enhan'wini ya wena, u swi tsala embilwini ya wena:

₄U ta kuma tintswalo ni xichavo,

Emahlweni ka Xikwembu ni ka vanhu.

₅Tshemba Yehovha hi mbilu ya wena hinkwayo,

U nga titshembi ku tlhariha ka wena.

₆U n'wi nghenisa emakungwini ya wena hinkwawo,

U ta lulamisa tindlela ta wena.

₇U nga tivoni vutlhari,

Chava Yehovha, u papalata swo biha;

₈Wu ta va murhi enkaveni wa wena,

Ni mongo emarhambyini ya wena.

₉Dzunisa Yehovha hi rifuwo ra wena,

Ni swirhangana swa hinkwaswo leswi ku taleleke:

₁₀Kutani switlati swa wena swi ta tala,

Swikhuvuto swa wena swi ta khapakhapa hi vhinyo yo tsokombela.

₁₁N'wananga, u nga soli ku laya ka Yehovha,

U nga heli mbilu loko u biwa hi yena;

₁₂Hikuva loyi Yehovha a n'wi rhandzaka, wa n'wi tshinya,

Kukotisa tata wa munhu a layaka n'wana loyi a n'wi tsakelaka.

₁₃Ku katekile munhu loyi a kumaka ku twisisa,

Ni loyi a kumaka vutlhari!

₁₄Hikuva bindzu ra byona ri tlula silivhere,

Ni ku andza ka byona ku tlula nsuku;

₁₅Byi tlula tiperela hi risima,

Hinkwaswo leswi navetaka a swi byi ringani.

₁₆Ku leha ka masiku ku le vokweni ra xinene ra byona;

Ku fuma ni ku twala swi le vokweni ra ximatsi.

₁₇Tindlela ta byona i tindlela leti tsakisaka,

Mitila hinkwayo ya byona yi ni ku rhula.

₁₈I murhi wa vutomi eka lava byi fuweke,

Lava byi hlayisaka va katekile.

₁₉Yehovha u khingele misava hi vutlhari,

U yimise matilo hi ku anakanya.

₂₀Hi vutivi bya yena swidziva swa handzuka,

Ni mapapa ma pfutisa mberha.

₂₁N'wananga, leswi swi nga tshuki swi sukela mahlo ya wena;

Hlayisa vutlhari ni ku twisisa.

₂₂Swi ta va vutomi emoyeni wa wena,

Ni swibombiso enhan'wini ya wena.

₂₃Hi kona u nga ta famba u tiyile endleleni ya wena,

Kutani nenge wa wena wu nga ka wu nga khunguvanyeki.

₂₄Loko u ya eku etleleni, u nga ka u nga chavi,

Ni loko u tilatile, vurhongo bya wena byi ta nandziha.

₂₅U nga ka u nga chavi nchavo wa xipuku,

Ni loko xi ri xidzedze lexi nga ta lovisa lavo biha.

₂₆Hikuva Yehovha u ta va xitshembo xa wena,

U ta ponisa nenge wa wena entlhan'wini.

₂₇U nga ali ku endla leswinene eka loyi u nga ni mfanelo eka yena,

Loko swi ri emandleni ya wena.

₂₈U nga vuri eka warikwenu u ku:

“Famba u ta vuya.

Mundzuku ndzi ta ku nyika!”

Kasi lexi a xi pfumalaka xi kona eka wena.

₂₉U nga tshuki u anakanyela warikwenu leswo biha,

Loko a tshamile hi ku rhula na wena.

₃₀U nga tengisani na munhu ntsena

Loko a nga ri na nandzu na wena.

₃₁U nga tsakeli munhu wa lunya,

Mikhuva ya yena, u nga teki ni wun'we.

₃₂Hikuva munhu wo homboloka i manyala eka Yehovha,

Kambe xihundla xa yena, xi na lava lulameke.

₃₃Xirhuko xa Yehovha xi le ndlwini ya vadyohi,

Kambe u katekisa yindlu ya lava lulameke.

₃₄Vasandzi, u va sandza ngopfu,

Kambe u tsetselela lava titsongahataka;

₃₅Lavo tlhariha va ta dya ndzhaka ya xichavo,

Loko swi ri swihunguki, ku twala ka swona i tingana.