SWIVURISO 6

₁N'wananga, loko u tibohile hi nandzu wa warikwenu,

Loko u nyikile voko ra wena ku tiyisa un'wana;

₂Loko ku vula ka nomu wa wena ku ku phasile,

Ni marito ya nomu wa wena ma ku bohile,

₃N'wananga, endla sweswo, famba u ya tikutsula,

Hikuva u le mandleni ya warikwenu;

Famba, u khinsama, u tikhongelela eka warikwenu.

₄U nga nyiketi mahlo ya wena vurhongo

U nga pfumeleli tinxiye ta wena ti nembelela;

₅U phonyoka kukota ntshembe emarindzini,

Kukota nyanyana entlhan'wini wa muhloti.

₆Wena lolo, yana eka vusokoti,

U xiya mikhuva ya byona, u ta tlhariha.

₇A byi na murisi,

Hambi mukamberi, kumbe hosi;

₈Byi tilunghisela swakudya swa byona hi ximumu,

Byi tihlengeletela mphamo loko ku tshoveriwa.

₉Wena lolo, u ta etlela ku yisa kwihi xana?

U ta pfuka rini evurhongweni bya wena?

₁₀Ku etlelanyana, ku khudzehela switsanana,

Ku tilata nkarhinyana hi ku khondla mavoko!

₁₁Vusiwana bya wena byi ta ku wonga kukotisa muendzi,

Ni ndlala, kukotisa munhu la hlomeke.

₁₂I munhu wa hava, wo homboloka,

La fambaka hi nomu wa ku kanganyisa;

₁₃A copeta mahlo, a vulavula hi milenge,

A encanyeta timhaka hi tintiho;

₁₄Mbilu ya yena yi onhakile,

Yi kanela swo biha hi masiku,

Yi kucetela ku hambana.

₁₅Hikwalaho ku onhaka ka yena ku ta n'wi tshukisa,

U ta lova hi nomu lowu, ku nga ri na murhi.

₁₆Ku ni swilo swa ntlhanu na xin'we leswi vengiwaka hi Yehovha,

Ndzi ri ntlhanu na swimbirhi lama nga manyala eka yena:

₁₇I mahlo yo tikukumuxa, ni ririmi ra vunwa,

Ni mavoko lama halataka ngati leyi nga riki na nandzu;

₁₈I mbilu leyi kanelaka swo biha,

Ni milenge ya matsambu leyi tsutsumelaka eku biheni.

₁₉I mbhoni ya vunwa leyi vulaka mavunwa,

Ni la pfuxaka timholovo exikarhi ka vamakwavo.

₂₀N'wananga, hlayisa milawu ya tata wa wena,

U nga fularheli dyondzo ya mana wa wena,

₂₁U yi bohelela embilwini ya wena hi masiku,

U yi tsimba enhan'wini ya wena.

₂₂Loko u famba, yi ta ku fambisa,

Ni loko u etlela, yi ta ku rindza;

Loko u pfuka evurhongweni yi ta vulavula na wena.

₂₃Hikuva xitsundzuxo i rivoningo, ni dyondzo i ku vonakala,

Ku tshinya ka ku laya i ndlela ya vutomi:

₂₄Swi ta ku chavisa nsati lowo biha,

Ni ririmi ra mandzendze ra nghwavavana,

₂₅U nga tshiki mbilu ya wena yi navela vubombi bya yena,

U nga kokiwi hi tinxiye ta yena.

₂₆Hikuva hi nsati wa mbiri, munhu u sala ni xipandzwa xa vuswa ntsena,

Ni nsati wa munhu a etlelela vutomi bya risima.

₂₇Xana munhu a nga okela makala exifuveni,

Tinguvu ta yena ti nga tshwi-ke?

₂₈Xana munhu a nga kandziya makala,

Mikondzo ya yena yi nga dzuvuki xana?

₂₉Swi endlisa sweswo eka la yaka eka nsati wa warikwavo,

Mani na mani la n'wi khumbaka a nga pfumali nandzu.

₃₀A va nyenyi muyivi loko a yiva

Ku tixurhisa loko a ri ni ndlala.

₃₁Kambe siku a khomiwaka u fanela ku riha kantlhanu na kambirhi;

A ta humesa xuma hinkwaxo xa yindlu ya yena.

₃₂La oswanaka ni wansati u heleriwe hi ku anakanya,

La endlaka sweswo u lovisa moya wa yena;

₃₃U ta kuma ku biwa, ni tingana;

Ku sandziwa ka yena ku nga ka ku nga susiwi.

₃₄Hikuva mavondzo ma karihisa wanuna,

U ta pfumala tintswalo siku a tirihiselaka.

₃₅A nga ka a nga amukeli miriho,

Vukari bya yena a byi lamuriwi, hambi u humesa xuma lexo tala.