TIPISALEMA 104

₁Moya wanga, khensa Yehovha!

Yehovha, Xikwembu xa mina, u nkulukumba ngopfu!

U funengele ku kwetsima ni ku saseka!

₂U tifunengete hi ku vonakala kukotisa nkumba,

U andlale matilo kukotisa tende.

₃Wa yimisa timhandze ta tindlu ta yena leti tlakukeke exikarhi ka mati,

U endle mapapa golonyi ya yena,

U famba a khandziyile etimpapeni ta moya,

₄U teka mimoya a endla tintsumi ta yena ha yona

U tlhela a teka malangavi ya ndzilo a endla malandza ya yena ha wona.

₅U tiyisile misava emasungulweni ya yona,

Yi nga ka yi nga tsekatseki ni siku ni rin'we.

₆U yi funengetile hi mafuku kukotisa nkumba;

Mati a ma yimile etintshaveni.

₇Kakuloko u tshinya, ma tsutsuma;

Ni loko ma twa rito ra mpfumawulo wa wena,

Ma hatlisa ku tisusa.

₈Tintshava ti tlakuka, mikova yi vumbeka

Endhawini leyi u yi lunghiseleke kona.

₉U vekele mati ndzilakana leswaku ma nga tshuki ma wu tlula,

Ma nga vuyi ma funengeta misava.

₁₀Hi yena a pfelerisaka miseledyana emikoveni;

Mati ya yona ma khiringa exikarhi ka tintshava;

₁₁Swiharhi hinkwaswo swa nhova swi nwa kona,

Ni timangwa ta nhova ti tima torha eka yona,

₁₂Tinyanyana ta tilo ta tiakela xisaka emabuweni ya yona,

Ti twakarisa miloti ya tona emarhavini ya mirhi.

₁₃U chelete tintshava, a ri endlwini ya yena leyi tlakukeke,

Misava yi xurha mihandzu ya mitirho ya wena.

₁₄U mirisela tihomu byanyi,

Ni vanhu timbewu leti va lulamelaka.

U humesa sweswo vuswa emisaveni,

₁₅Ni vhinyo leyi tsakisaka mbilu ya munhu,

Ni mafurha lama vangamisaka mombo wa yena,

Ni vuswa lebyi tiyisaka mbilu ya munhu.

₁₆Mirhi ya Yehovha yi xurhile,

Tona tikedari ta Lebanoni leti a nga ti simeka.

₁₇Tinyanyana ti tiakela swisaka kona.

Ntsavila wu tshama exikarhi ka tikipresi;

₁₈Tintshava leto leha ti lulamele tintshembe,

Maribye, wona, i xichavelo xa timbila.

₁₉U endlile n'weti ku avanyisa lembe ha wona;

Dyambu ri tiva ku pela ka rona.

₂₀U endle munyama, kutani byi va vusiku,

Kavaloko swivandzana hinkwaswo swa le swihlahleni swi tifambela.

₂₁Swinghalana swi dzuma swi lava swiharhi,

Swi lava leswi swi nga dyaka swona eka Xikwembu;

₂₂Dyambu, loko ri huma, swa tlhela,

Swi ya tifihla evukaleni bya swona.

₂₃Kutani munhu a humela ntirho wa yena,

Ku ya tirha ku fikela madyambu.

₂₄Oho Yehovha!

Mitirho ya wena yi tarisile ku yini!

U yi endlile hinkwayo hi vutlhari;

Misava yi tele rifuwo ra wena.

₂₅Ni lwandle lerikulu, lera ku anama,

Ri tele swiharhi leswi nga hlayiwiki,

Leswitsongo ni leswikulu!

₂₆Hi laha tingalava ti fambaka kona,

Na yona Levhiyatani leyi u yi vumbeke

Leswaku yi titlangela kona.

₂₇Swivumbiwa hinkwaswo swi langutela wena,

Leswaku u swi nyika swakudya hi nkarhi lowu fanelaka.

₂₈Loko u swi nyika swona, swa rholela;

Loko u pfula xandla xa wena, swa xurha hi ndzalo;

₂₉Kungakuloko u fihla mombo wa wena swa tsandzeka;

Loko u swi tekela ku hefemula, swa hela,

Kutani swi tlhelela entshurini.

₃₀Loko u engeta u rhuma moya wa wena

Swi vuyela swi velekiwa;

Kutani u sasekisa nghohe ya misava.

₃₁Ku kwetsima ka Yehovha a ku tshame hi laha ku nga heriki!

Yehovha a a tsakele mitirho ya yena!

₃₂A languta misava, kutani yi rhurhumela;

U khumba tintshava, kutani ti huma musi.

₃₃Ndzi ta yimbelela Yehovha loko ndza ha hanya;

Ndzi ta dzunisa Xikwembu xa mina, loko ndza ha ri kona.

₃₄Mianakanyo ya mina a yi n'wi tsakise!

Ndzi ta endla Yehovha ku tsaka ka mina.

₃₅Vadyohi a va lovele emisaveni,

Lavo biha a va nga ha vi kona!

Moya wanga, khensa Yehovha!

Dzunisani Yehovha!