TIPISALEMA 107

₁Dzunisani Yehovha, hikuva u lulamile,

Hikuva tintswalo ta yena hi leti nga heriki.

₂Vakutsuriwa va Yehovha, a va vurise sweswo,

Lava a va poniseke emavokweni ya nala,

₃A va vitaneke ematikweni hinkwawo,

Evuxeni ni le vupeladyambu, en'walungwini ni le dzongeni!

₄A va ri vatsendzeleki exikarhi ka mananga,

Va nga kumi muti wa ku aka eka wona.

₅Va twa ndlala ni torha,

Mimoya ya vona yi titivala.

₆Kambe va huwelela eka Yehovha emahlomulweni ya vona,

Kutani a va londzovota eku tsandzekeni ka vona,

₇A va fambisa hi ndlela leyi lulameke,

A va fikisa emutini laha va nga ta aka kona.

₈A va khense Yehovha hikwalaho ka vunene bya yena,

Hikwalaho ka swihlamariso leswi a swi endlelaka vana va vanhu!

₉Hikuva u korwisile moya lowu nga ni torha,

U xurhisile moya lowu nga ni ndlala.

₁₀Lava akeke emunyameni ni le ndzhutini wa rifu,

Va bohiwile enhlomulweni ni le tinsimbhini,

₁₁Hikwalaho ka ku tiarisa ka vona etimhakeni ta Xikwembu,

Loko va sandza ku tsundzuxa ka Muungameri wa le henhla,

₁₂A tsongahata timbilu ta vona hi ku va vavisa,

Va tikeriwa, va nga pfuniwi hi munhu.

₁₃Kavaloko va huwelela eka Yehovha emapfalweni ya vona,

Kutani a va ponisa eku tsandzekeni ka vona,

₁₄A va humesa emunyameni ni le ndzhutini wa rifu,

A tsema timpecana ta vona.

₁₅A va khense Yehovha hikwalaho ka vunene bya yena.

Hikwalaho ka swihlamariso leswi a swi endlelaka vana va vanhu,

₁₆Hikuva a tshovile swipfalo swa koporo,

A tshovelela timhandze ta nhumbu.

₁₇Swihunguki a swi hlomurisiwa

Hi tindlela ta swona leto biha ni ku homboloka ka swona;

₁₈Mimoya ya swona a yi phiriwa hi swakudya hinkwaswo,

Swi fikile etinyangweni ta rifu.

₁₉Kambe swi huwelela eka Yehovha emapfalweni ya swona;

Kutani a swi kutsula eku tsandzekeni ka swona;

₂₀A rhuma rito ra yena, ri swi tshungula,

A swi humesa emasirheni ya swona.

₂₁A swi khense Yehovha hikwalaho ka vunene bya yena,

Hikwalaho ka swihlamariso leswi a swi endlelaka vana va vanhu;

₂₂A swi humese magandzelo yo khensa,

A swi twarise mitirho ya yena hi ku huwelela ka ku tsaka!

₂₃Lava fambaka elwandle hi tingalava,

Va bindzulaka ematini lamakulu,

₂₄Hi vona lava nga hlalela mitirho ya Yehovha,

Ni mahlori ya yena exikarhi ka swidziva:

₂₅Wa vula, kutani a pfuxa moya wa xidzedze

Lexi tlakusaka magandlati ya lwandle.

₂₆Va tlhandlukela ematilweni, va tlhela va xikela exidziveni.

Mimoya ya vona a yi nyuka hi ku hluleka;

₂₇Va khomiwa hi sululwana, va rhurhumela kukotisa munhu loko a pyopyiwile,

Vutlhari hinkwabyo bya vona byi hangalaka.

₂₈Kambe va huwelela eka Yehovha emaxangwini ya vona,

Kutani a va humesa eku tsandzekeni ka vona.

₂₉A miyeta xihuhuri, wu va moya lowutsongo,

Magandlati ma rhula,

₃₀Va tsaka loko ma miyerile, Kutani a va fikisa laha va rhandzeke ku ya kona.

₃₁A va khense Yehovha hikwalaho ka vunene bya yena,

Hikwalaho ka swihlamariso leswi a swi endlelaka vana va vanhu;

₃₂A va n'wi tlakuse exikarhi ka nhlengeletano ya tiko,

A va n'wi vonge ehubyeni ya vakulukumba!

₃₃U hundzula milambu rivala,

Ni swihlovo swa mati timbala ta ku oma.

₃₄Misava yo nona yi hundzuriwe misava ya munyu

Hikwalaho ka ku biha ka vaaki va kona.

₃₅U hundzule mananga tiko ra mati,

Ni misava ya ku oma swihlovo swa mati.

₃₆U akise kona lava nga ni ndlala,

Kutani va aka miti ku tshama eka yona.

₃₇Va byala mbewu emasin'wini, va byala ni tivhinya,

Kutani va dya mihandzu ya swona.

₃₈A va katekisa, kutani va andza ngopfu;

A nga hungutanga ntsengo wa swifuwo swa vona.

₃₉Kambe va ondzisiwile ni ku tsongahatiwa

Hi ku karhala, ni makhombo, ni nhlomulo.

₄₀U halatele xisolo eka tihosi,

A ti pepetsekisa emananga laha ku nga riki na ndlela,

₄₁Kambe a tlakusa mpfumari ekhombyeni ra yena,

A endla mindyangu kukotisa loko ngi i mitlhambi ya tinyimpfu.

₄₂Lava lulameke va swi vona va tsaka,

Kambe lavo homboloka hinkwavo va pfala milomu.

₄₃I mani la tlhariheke?

A a tsundzuke timhaka teto!

A va a anakanya vunene bya Xikwembu.