TIPISALEMA 111

₁Dzunisani Yehovha!

Ndzi ta dzunisa Yehovha hi mbilu hinkwayo ya mina,

Eku hlanganeni ka valulami ni le nhlengeletanweni.

₂Mitirho ya Yehovha yikulu,

Yi laviwa hi hinkwavo lava yi tsakelaka.

₃Ntirho wa yena i ku kwetsima ni vukulu,

Ku lulama ka yena ku tshama hi laha ku nga heriki.

₄U siyile switsundzuxo swa mahlori ya yena,

Yehovha wa tintswalo ni wa ku tsetselela.

₅U nyikile swakudya eka lava n'wi chavaka;

Wa anakanya ntwanano wa yena hi masiku.

₆U kombisile tiko ra yena matimba ya mitirho ya yena,

Hi ku ri nyika ndzhaka ya matiko.

₇Mitirho ya mavoko ya yena i vunene ni ku lulama;

Swileriso swa yena hinkwaswo swi tiyile;

₈Swi tiyisiwa hi laha ku nga heriki,

Swi endliwe hi vunene ni ku lulama.

₉U rhumele tiko ra yena ku tshunxeka;

U lerisile ntwanano wa yena hi laha ku nga heriki;

Vito ra yena ri hlawulekile, ra chaviseka.

₁₀Ku chava Yehovha i ku sungula ka vutlhari;

Hinkwavo lava ku hlayisaka va ni ku twisisa lokunene.

Ku dzuna ka yena ku tshama hi laha ku nga heriki.