TIPISALEMA 115

₁Oho Yehovha!

Ku kwetsima ku nga vi ka hina,

Ku nga vi ka hina, kambe a ku ve ka vito ra wena.

Hikwalaho ka tintswalo ta wena ni vunene bya wena!

₂Matiko ma nga vulela yini, ma ku:

“Xi kwihi Xikwembu xa vona?”

₃Xikwembu xa hina xi le matilweni,

Xi endla hinkwaswo leswi xi swi rhandzaka.

₄Swifaniso swa swikwembu swa vona i silivhere ni nsuku,

I ntirho wa mavoko ya vanhu.

₅Swi ni milomu, kambe a swi vulavuri,

Swi ni mahlo, kambe a swi voni,

₆Swi ni tindleve, kambe a swi yingisi,

Swi ni tinhompfu, kambe a swi nun'hweti,

₇Swi tsandzeka ku khoma hi mavoko ya swona,

Hi milenge ya swona a swi fambi,

A ku na rito le ri humaka emikolweni ya swona.

₈Lava swi vumbaka va fana na swona,

Ni hinkwavo lava swi tshembaka.

₉Israele, titshembele Yehovha!

Hi yena mupfuni wa vona ni xitlhangu xa vona.

₁₀N'wina yindlu ya Aroni, titshembeleni Yehovha!

Hi yena mupfuni wa vona ni xitlhangu xa vona.

₁₁N'wina mi chavaka Yehovha, titshembeleni Yehovha!

Hi yena mupfuni wa vona ni xitlhangu xa vona.

₁₂Yehovha u hi tsundzukile, u ta katekisa;

U ta katekisa yindlu ya Israele,

U ta katekisa yindlu ya Aroni,

₁₃U ta katekisa lava chavaka Yehovha,

Lavatsongo ni lavakulu.

₁₄Yehovha u ta mi andzisa

N'wina ni vana va n'wina.

₁₅Mi vakateki va Yehovha,

La endleke tilo ni misava.

₁₆Loko ma ri matilo, i matilo ya Yehovha,

Misava, u yi nyikile vana va vanhu.

₁₇A hi vafi lava nga ta vonga Yehovha,

Ni loko va ri lava xikeleke exivandleni xa ku miyela;

₁₈Kambe hina hi ta vonga Yehovha,

Ku sukela sweswi, ni ku yisa hi laha ku nga heriki.

Dzunisani Yehovha!